ތަރީޚަށް ނަޒަރު ހިންގާލާއިރުގައި، މިއަދުވެސް ދިވެހިންނަށް މިއޮތީ ދިވެހިންގެ މިނިވަންކަމުގެ ވާހަކަ ދައްކަން ޖެހިފައި ކަމަށް ރާއްޖޭގެ ފުންނާބު އުސް ދީނީ ޢިލްމުވެރިޔާ އައްޝެއިޚު އަހުމަދު ސަމީރު ވިދާޅުވެއްޖެއެވެ.
ޖަމިއްޔަތުއް ސަލަފުން އިންތިޒާމްކޮށްގެން "މިނިވަންކަން" މި މަޢުލޫއަށް ރޭ ބޭއްވި ދަރުހުގައި ޝެއިޚު ސަމީރު ވަނީ، ރާއްޖެ އަކީ މިނިވަން ގައުމަކަށް ވުމަކާއި، ބޭރުގެ އެކިއެކި ބާރު ތަކުން ދިވެހި ގައުމު މިނިވަންކުރުމަށް އެކި ފަހަރު މަތިން، ކުރަންޖެހުނު މަސައްކަތާއި ޖިހާދުގެ މައްޗަށް އަލި އަޅުއްްވާލައްްވާފައެވެ. އެގޮތުން، ދިވެހި އެކިއެކި އަބުޠާލުންނާއި، ދިވެހި ގައުމު ދެކެ ލޯބިވާ ދިވެހި ރައްޔިތުން، އަބަދުވެސް ދައްކާފައިވަނީ ބޮޑެތި ބާރު ތަކުގެ ކުރިމަތީގައި ކުޑަކަކޫ ނުޖަހާނެކަމަށާ، ރާއްޖެއަކީ ކިތަންމެ ކުޑަ ގައުމަކަށްވީ ނަމަވެސް ދިވެހިންގެ ޢަޒުމާއި، ހިތްވަރުން ބޮޑެތި ގައުމުތަކާއި ދެކޮޅަށް ނުކުމެ الله ގެ ވާގިފުޅާއިއެކު ނަސްރު ހޯދާފައިވާ ކަން ޝެއިޚު ފާހަގަކުރެއްވިއެވެ.
މިއާއެކު ޝެއިޚު ވިދާޅުވީ، ދިވެހިރާއްޖޭގެ މިނިވަންކަމުގެ ވާހަކައާއި، މިނިވަންކަމަށް ކަންބޮޑުވުމާއި، މިނިވަންކަމުގެ އިހްސާސްގެ ވާހަކައަކީ ދިވެހިރާއްޖޭގެ ކޮންމެ ރައްޔިތަކު ވެސް ދައްކަންޖެހޭ ވާހަކައެއް ކަމަށެވެ. އަދި ތާރީޚަށް ނަޒަރު ހިންގާލާނަމަ، މިއަދުވެސް މިނިވަންކަމުގެ ވާހަކަ ދިވެހިން ދައްކަން ޖެހިފައިވާ ކަމަށް ޝެއިޚް ވިދާޅުވި އެވެ.
"ތަރީޚަށް ނަޒަރު ހިންގާލާއިރުގައި، މިއަދުވެސް ދިވެހިންނަށް މިއޮތީ އެވާހަކަ ދައްކަން ޖެހިފައި. މިއަދު އަޅުގަނޑުމެން އުފެދޭ ސުވާލަކީ ތާރީޚް އަލުން އެނބުރި އަނެއްކާ އިޢާދަވަނީބާވައޭ. ސިއްރު ސިއްރުން ކޮށްފައިހުރި ކަންކަމުގެ ސުންޕާކަން ދިވެހިންނަށް ތާރީޚްގައި ވެސް އައިސްފައިވާއިރުގައި، އަނެއްކާ ވާން މިއުޅެނީ ކިހިނެއް ބާވައޭ. ހަމަ ގައިމުވެސް މިއަދު ދިވެހިންގެ ތެރެއިން ވަރަށް ގިނަ ބަޔަކު އެ ސުވާލު އެބަ އުފައްދާ. ހާމަ ނުކުރެވޭ ސިއްރު އެގްރީމެންޓް ދަށުގައި ދިވެހިރާއްޖޭގައި ކިތައް އަސްކަރިއްޔާާގެ މީހުން ތިބިތޯ ސުވާލު އުފެދޭ މިއަދު އެބަ. ބިރުވެރިކަމާއި ނާމާކަން މިއަދު މިއޮތީ. އެމީހުން އަޅުގަނޑުމެންނާ ދޭތެރޭ ކަންތައް ކުރާނީ ކިހިނެއްތޯ ކުރީގައި ކަންތައް ކުރި ގޮތަށް ބަލާފައި އަޅުގަނޑުމެންގެ ތަޖުރިބާ އެބައޮތް. އަޅުގަނޑުމެންގައިގައި ކަށިޖަހާފައި ހުރީ އެއްފަހަރަކު ދެފަހަރަކު ނޫން. އެހެންވީމާ ދެންވެސް ކަށިޖަހާފާނެ ކަމުގެ ވިސްނުން އަޅުގަނޑުމެންގެ އޮންނަން ޖެހޭނެ. ރާއްޖޭގެ މިނިވަންކަމަށް ބުރޫ އަރާފަދަ އެއްވެސް ކަމެއް ހިނގުމަށް އަޅުގަނޑުމެން ޖާގަދީގެން ނުވާނެ."
ޝެއިޚް އަހުމަދު ސަމީރު
ޝެއިޚު ސަމީރު ވިދާޅުވީ، އިގްތިޞާދީގޮތުންނާއި އަސްކަރީގޮތުންވެސް މީގެ ކުރިން ބޭރުގެ އެކިއެކި ގައުމުތައް ރާއްޖެއަށް ކަޅި އަޅަމުންދިޔައީ ރާއްޖެއޮތްތަނުގެ ގޮތުން ކަމުގައިވާއިރު، މިއަދުވެސް ރާއްޖެ އޮތީ ހަމައެތަނުގައި ކަމަށެވެ. އެހެންކަމުން، މިއަދުވެސް މީހެ ކުރިން ރާއްޖެ ހިފުމަށް ދަހިވެތިވި މީހުން، އެކަން ކުރުމަށް ދަހިވެތި ނުވާނެ ކަމަށް ދިވެހިން ގަބޫލުކޮށްގެން ނުވާނެކަމަށެވެ.
އަދި ދިވެހިން މިނިވަން ގައުމެއްގެ ގޮތުގައި މިހާ ދުވަހުވެސް އޮތީ, ދިވެހިންގެ އަގީދާއާއި، ދިވެހިންގެ ހިތްވަރާއި ސާބިތު ކަމުން ކަމަށްވެސް ޝެއިޚު ވިދާޅުވި އެވެ. އެެގޮތުން، ނޮވެމްބަރު 3 ގެ ޢުދުވާނީ ހަމަލާދެވުނު ހިނދު ދިވެހިންގެ ދީނާއި، ދިވެހި ގައުމުގެ ދިފާއުގައި ދިވެހި ސިފައިން ދެއްކެވި ހިތްވަރުގެ ވާހަކައިން ޝެއިޚްވަނީ މިސާލު ޖައްސަވާފައެވެ.
"ނޮވެމްބަރު 3 ގެ ޢުދުވާނީ ހަމަލާގައި ދިވެހިރާއްޖެއިން ނުކުތް، ޒުވާން ލީޑަރުން، ޝަހީދު ހުސައިން އާދަމް ފަދަ، ގޮވަމުން ދިޔައީ، ތިމަންނަގެ ނަފްސް ސަލާމަތްކުރާށެކޭ ނޫނޭ. މި ގައުމުގެ ހިމާޔަތުގައި ޖަހާނެ ވަޒަނެއް އުންޑައެއް އޮތީ ކޮންތާކުތޯ ބަލަމުން ދިޔައީ. އެމީހުންނަށްވެސް ހަމަ ބުނެވޭނެ ތިމަންނަ ވައްދާށޭ މިތާ އެތެރެއަށް. ނޫން. ބައެއް މީހުން މިކަންކަންވެސް ޖޯކަކަށް ހަދައިގެން ވާހަކަ ދައްކަނީ. (އެކަމަކު) އަޅުގަނޑުމެންގެ މިގައުމުގެ ހައްގުގައި އެންމެ ވަޒަނެއް ޖެހި މީހަކުވެސް އެއީ އަޅުގަނޑުމެންގެ ހިތުގައި މަތިވެރި މަގާމެއް ދެވިފައިވާ މީހެއް. އަދި އަޅުގަނޑުމެންގެ ހެޔޮ ދުޢާގައިވެސް އެމީހުން ބައިވެރި ކުރެވެން ޖެހޭނެ"
އައްޝައިޚް އަޙްމަދު ސަމީރު
ޝެއިޚު ސަމީރު ވިދާޅުވީ، އިސްލާމް ދީނުގެ ހިމާޔަތުގައި ދިވެހި އަބުތާލުން ޖިހާދުކޮށް ޝަހީދުވިއިރު، މިއަދު ދިވެހި ރާއްޖޭގައި އިސްލާމްދީން ގަބޫލުނުކުރާ މީހުން އުޅޭ ކަމީ ހިތާމަކުރަންޖެހޭ ކަމެއް ކަމަށެވެ. އަދި އެފަދަ މީހުންގެ ބަސް ދިވެހިންގެ ތެރޭގައި ވިކޭ އިރު، ދިވެހި ރާއްޖޭގެ ބަސްވިކޭ މަގާމުތަކާއި ސިޔާސަތު އެކުލަވާ ލުމުގައިވެސް އެމީހުންގެ ނުފޫޒް ވަރަށް ބޮޑަށް ފޯރާކަމީ ކަންބޮޑުވާންޖެހޭ ކަމެއް ކަމަށް ޝެއިޚު ވިދާޅުވި އެވެ. ކުރީޒަމާނުގައި ކަޅު މުހައްމަދު ރަސްގެފާނު އަރުވާލެވިގެން ހުރީ ގދ. ވާދޫގައި ކަމަށާ، މިއަދު ދީނަށް ހަޖޫ ޖަހާ މީހުން ޖަހަމުން ދަނީ، ދިވެހިންގެ ގޮތުގައި ތިބެގެން، ދިވެހި ބަހުން، އދ ފަދަ ތަންތަނުގައިތިބެގެން ކަން ފާހަގަކުރައްވައި ޝެއިޚު ވިދާޅުވީ އެއީ ނުރައްކާތެރި ކަމެއް ކަމަށެވެ. އެހެންކަމުން، ދިވެހިން އެފަދަ މީހުންނަށް، ނުވަތަ އެއްވެސް ބަޔަކަށް އެ ފުރުސަތު ދީގެން ނުވާނެ ކަމަށްވެސް ޝެއިޚު ވިދާޅުވި އެވެ.
Advertisement
This content is created and paid for by advertisers and does not involve Voice Journalists
