ރާއްޖޭގެ ދެކުނުގެ ކަނޑުގެ ސަރަހައްދުން ބޮޑުބައެއް ގެއްލިގެން ދިއުމާއި ދެކޮޅަށް ގިނަ ސިޔާސީ ޕާޓީތަކެއް ގުޅިގެން އުފައްދާފައިވާ އިއްތިހާދުން މި ޖޫން މަހުގެ 2 ވަނަ ދުވަހުގެ ރޭ މާލޭގެ ކާނިވާ ސަރަހައްދުގައި ބޭއްވުމަށް އިއުލާނުކޮށްފައިވާ "ބާނަ ބާނަތިއްބާ ތިޔަ ވިއްކާލީ ކަނޑު" ޖަލްސާގައި ޖުމްހޫރީ ޕާޓީގެ ކައުންސިމް މެމްބަރުންނާއި އާންމު މެމްބަރުން ބައިވެރި ނުވުމަށް އެދި ޕާޓީގެ ލީޑަރު އަދި ރިޔާސީ ކެންޑީޑޭޓު ޤާސިމް އިބްރާހިމް އެދިވަޑައިގަންނަވައިފި އެވެ. 

ޤާސިމް މިފަދައިން އެދިވަޑައިގެންފައި ވަނީ ޖޭޕީގެ ކައުންސިލް މެމްބަރުންނާއި ލީޑަޝިޕް މެމްބަރުން ތިއްބަވާ ވަޓްސްއެޕް ގްރޫޕަށް ގާސިމް ފޮނުއްވި މެސެޖެއްގަ އެވެ. 

ޤާސިމްގެ އެ މެސެޖުގައި އިތުރަށް ވިދާޅުވީ އެ މައްސަލައިގެ ހަގީގީ ނަތީޖާއެއް ހާސިލްކުރެވޭނީ އިޓްލޮސްގެ ނިންމުން ބަދަލުކުރެވޭނެ މަގެއް ފެނޭތޯ ގާނޫނީ ބޭފުޅުންގެ ލަފާއެކީ މަސައްކަތް ކުރުންކަމަށް ދެކެވަޑައިގަންނަވާ ކަމަށެވެ. 

ކަނޑުވިއްކާލުމާއި ދެކޮޅު އިއްތިހާދަކީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުގެ ސިއްރު ސިޓީފުޅަކުން ދިވެހިރާއްޖޭގެ ކަނޑުގެ ސަރަހައްދުން ބައެއް ގެއްލިގެން ދިޔަކަމަށްބުނެ، ގެއްލުނު ސަރަހައްދު ހޯދުމުގެ މަސައްކަތް ކުރުމަށް އެކުލަވާލާފައިވާ އިއްތިހާދެކެވެ. 

އެ އިއްތިހާދުގައި ޕީޕީއެމް-ޕީއެންސީ ކޯލިޝަންގެ އިތުރުން، ދި ޑިމޮކްރެޓްސް (ކުރީގެ ފިކުރެއްގެ ދިރުން) އާއި މޯލްޑިވްސް ނެޝަނަލް ޕާޓީ އަދި ޖުމްހޫރީ ޕާޓީ ހިމެނެއެވެ. އެ ކޯލިޝަނުގައި އުމަރު ނަސީރާއި، ކުރީގެ ބަންޑާރަ ނައިބުންވެސް އިސްކޮށް ހަރަކާތްތެރިވެ އެވެ. 

ސިޔާސީ ކަންކަމުގައި ޚިޔާލު ތަފާތުވި ނަމަވެސް، ކަނޑުގެ ސަރަހައްދާއި ގުޅޭ މައްސަލައިގައި އެކުގައި މަަސައްކަތް ކުރުމަށް އެ އިއްތިހާދުން ވަނީ އެއްބަސްވެފައެވެ. 

2 ޖޫންގައި ބާއްވާ ހަރަކާތަކީ އެ އިއްތިހާދުން ކަނޑު ވިއްކާލުމާއި ދެކޮޅަށް ބާއްވާ އެންމެ ބޮޑު ހަރަކާތެވެ. އޭގެ އިތުރުން ކަނޑުވިއްކާލުމާއި ދެކޮޅު ޕެޓިޝަނެއްގައި ސޮއިކުރުމުގެ ހަރަކާތްތަކެއްވެސް ކުރިއަށް ގެންދާކަން ފާހަގަކޮށްލެވެ އެވެ. 

2 ޖޫންގެ ރެލީގައި ބައިވެރިނުވުމަށް ޖޭޕީގެ ލީޑަރު ޤާސިމް އިބްރާހިމް އެދިވަޑައިގެންފައި ވީ ނަމަވެސް، އަދި ކަނޑު ވިއްކާލުމާއި ދެކޮޅު ކޯލިޝަނާއި ޖުމްހޫރީ ޕާޓީ ވަކިވެފައިވާކަން ރަސްމީކޮށް އިއުލާނުކޮށްފައެއް ނުވެއެވެ.