ބަންޑާރަނައިބު އިބްރާހިމް ރިއްފަތުގެ އިތުބާރުނެތްކަމުގެ މައްސަލައިގައި ޖަވާބުދާރީ ވާން ވަޑައިނުގެންނެވީ ފިނޑިކަމުން ކަމަށާއި، ދެން އެންމެ ރަނގަޅު ގޮތަކީ އަވަހަށް އިސްތިއުފާދެއްވުން ކަމަށް ރައްޔިތުންގެ މަޖިލީހުގެ ފަރެސްމާތޮޑާ ދާއިރާގެ މެމްބަރު ހުސެއިން މުޙައްމަދު ލަތީފު (ސެންބެ) ވިދާޅުވެއްޖެ އެވެ. 

މެމްބަރު ހުސެއިން މިފަދައިން ވިދާޅުވެފައިވަނީ ރައްޔިތުންގެ މަޖިލީހުގެ މި އަހަރުގެ ދެވަނަ ދައުރުގެ 6 ވަނަ ޖަލްސާގައި ވާހަކަދައްކަވަމުން ނެވެ. ރައްޔިތުންގެ މަޖިލީހުގެ މިއަދުގެ ޖަލްސާގައި ވަނީ ބަންޑާރަ ނައިބުގެ އިތުބާރު ނެތްކަމުގެ މައްސަލައާއި ގުޅިގެން އެމަނިކުފާނު ޖަވާބުދާރީވެ ވަޑައިގަތުމަށް ތާވަލުކޮށްފަ އެވެ. 

އެހެން ނަމަވެސް ހާޒިރުވެވަޑައިނުގެން ބަންޑާރަނައިބުވަނީ ލިޔުމެއް މަޖިލީހަށް ފޮނުއްވާފައެވެ. 

އެއާއެކު ބަންޑާރަނައިބު މަޖިލީހަށް ޖަވާބުދާރީވެލައްވަން ޖެހިވަޑައިގަންނަވާ ގޮތާއި ގުޅިގެން މެމްބަރުންގެ މެދުގައި ޚިޔާލުތަފާތުވެ ޙައްލު ނުކުރެވުމުން ރިޔާސަތުން ވަނީ އެ މައްސަލަ މަޑުޖައްސާ ސުޕްރިމް ކޯޓުގެ ލަފާ ހޯދައިގެން ކުރިއަށް ގެންދިއުމަށް ނިންމާފައެވެ. 

އެކަމަށް އިޝާރާތްކުރައްވާ މެމްބަރު ހުސެއިން ވިދާޅުވީ ބަންޑާރަނައިބު މަޖިލީހަށް ޖަވާބުދާރީވެލައްވަން ޖެހިވަޑައިގަންނަވާ ގޮތް ވަރަށް ސާފުކޮށް ޤާނޫނު އަސާސީގައި ބަޔާންކޮށްފައި ވާ ކަމަށެވެ.

އެކަން، އެމަނިކުފާނަށް ވެސް އެނގިވަޑައިގަންނަވާނެ ކަމަށާއި، މަޖިލީހަށް ވަޑައިނުގަތީ، ފިނޑިވެ ރައްޔިތުންނާއި ކުރިމަތިލައްވަން ނެރިވަޑައި ނުގަންނަވާތީ ކަމަށެވެ. 

އަދި އެމަނިކުފާނު ޖަވާބުދާރީވާން ވަޑައިނުގެންނެވުމުން، ކަނޑުގެ ސަރަހައްދުން ބައެއް ދޫކޮށްލި މައްސަލައިގައި އެމަނިކުފާނުގެ އޮތްކަން ސާފުވެގެން ގޮސްފައިވާކަމަށް މެމްބަރު ހުސެއިން ވިދާޅުވި އެވެ. 

މެމްބަރު ހުސެއިން ވިދާޅުވީ އިޚްލާސްތެރިކަމެއް ހުރި ބޭފުޅެއްނަމަ މަސައްކަތް ކުރައްވާނީ ރާއްޖެއަށް ކަނޑުގެ ސަރަހައްދުން އިންޗިއެއް ވެސް އިތުރުކުރެވޭނެ ގޮތަކަށް ކަމަށެވެ. 

އެހެން ނަމަވެސް މި ސަރުކާރުން ގަސްދުގައި ކަނޑުގެ ސަރަހައްދުން ބައެއް ދޫކޮށްލުމަށްފަހު، ރައްޔިތުންނަށް އޮޅުވާލުމަށް ބޮޑުބައި ލިބުނީ ރާއްޖެއަށް ކަމަށް ބުނެ ހަވާއެރުވި ނަމަވެސް، އެކަން ގަބޫލުކުރާނެ ބަޔަކު ނެތްކަމަށާއި، އެކަމުގެ ސަބަބުން ރާއްޖޭގެ އިޤްތިޞާދަށް ހީވެސް ނުކުރާވަރުގެ ގެއްލުމެއް ލިބިގެންދާނެކަމަށް މެމްބަރު ހުސެއިންގެ ވާހަކައިގައި ފާހަގަކުރެއްވި އެވެ.