2023 ވަނަ އަހަރަށް އެކަނި ބަލާލިޔަސް ފެންނަނީ މުޖުތަމައުގައި އޮތް ބިރުވެރިކަމާއި ނާމާންކަން ކަމަށް މަހިބަދޫ ދާއިރާގެ މެންބަރު އަހުމަދު ޠާރިގު ވިދާޅުވެއްޖެއެވެ. 

ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހާއި، އެމަނިކުފާނަށް ތާއީދު ކުރައްވާ މެންބަރުން އެންމެ އަޑު ހަރުކޮށް ދައްކަވާ ވާހަކަ އަކީ ރައީސް ޞާލިހުގެ މި ފަސް އަހަރު މުޖުތަމަޢުގައި އަމާންކަން ގާއިމް ކުރެވިފައިވާ ވާހަކައެވެ. މުޖުތަމައުގައި ކުށްތައް މަދު ކަމާއި، އާއްމުންނަށް ރައްކާތެރިކަންވެސް ހީދައި ދެވުނު ވާހަކައެވެ. 

އެވާހަކަތަކަށް ރައްދު ދެއްވައި، މި ދައުރުގެ ހަމައެކަނި 2022 އަދި 2023 ގައި މިހާތަނަށް ހިނގާފައިވާ މަރުގެ މައްސަލަ ތަކުގެ ޚަބަރުތަކަށް އިޝާރަތްކުރައްވާ ޠާރިގު ކުރެއްްވި ޓުވީޓެއްގައި ވިދާޅުވީ ރައީސް ޞާލިހް އަށް ދެވަނަ ދައުރެއް ދޭށޭ ބުނެ ސަބަބަކަށް ދައްކަނީ ދިވެހިރާއްޖެއަށް އަމާންކަން ގެނެވިއްޖެކަމުގެ ވާހަކަ ކަމަށެވެ.

Advertisement

އެހެން ނަމަވެސް، 2022 އަދި 2023 އަށް އެކަނި ބަލާލިޔަސް ފެންނަނީ މުޖުތަމައުގައި އޮތް ބިރުވެރިކަމާއި ނާމާންކަން ކަމަށް ޠާރިގު ވިދާޅުވިއެވެ. 

"ރައީސް ޞާލިހު ބޭލުން ނޫންގޮތެއްނެތް." ޠާރިގު ވިދާޅުވިއެވެ. 

ރައީސް ޞާލިހުގެ މި ދައުރަކީ އަމާން ދައުރެއް ކަމަށް އެމަނިކުފާނާއި ސަރުކާރަށް ތާއީދު ކުރައްވާ މެންބަރުން ވިދާޅުވާއިރު، ރާއްޖޭގައި ހިނގައިދިޔަ އެންމެ އަނިޔާވެރި އެއް ގަތުރު ކަމުގައިވާ ޏ. ފުވައްމުލަކު ޝިޢާއުގެ ގަތުލު ހިނގާފައިވަނީ މިދައުރު ތެރޭގައެވެ. އަދި މީގެ އިތުރުން އދ. ދަނގެތީ މަހުމޫދު އާއި، ހުޅުމާލޭގައި 13 އަހަރުގެ ކުއްޖެއް އަނިޔާވެރި ގޮތެއްގައި މަރާލުމަށްފަހު ފޮއްޓަކަށް ލާފައި އެއްލާލީވެސް ހަމަ މިދައުރު ތެރޭގައެވެ. 

މިނޫންވެސް އެތައް ބިރުވެރި، ނާމަން ކަންކަމާއި، ކުށްތައް އިންތިހާއަށް މިދައުރުގައި ގިނަވެގެން ގޮސްފައިވާއިރު، މި ދައުރަކީ އަމާން ދައުރެއް ކަމުގައި ސަރުކާރުން ބުނާ ކޮންމެ ފަހަރަކު ރައްޔިތުން އެވާހަކަތައް ސަރުކާރަށް ހަނދާން ކޮށްދެއެވެ.