މިދިޔަ އަހަރު އެސްޓީއޯ އަށް ލިބުނު ފައިދާއިން ކޮންމެ ހިއްސާއަކަށް 77ރ. ބަހަން ސްޓޭޓް ޓްރޭޑިން އޯގަނައިޒޭޝަން (އެސްޓީއޯ)ގެ ބޯޑުން ނިންމައި ، ފާސްކޮށްފި އެވެ.

މިއީ 2021 އަށްވުރެ 12ރ. އިތުރު އަދަދެކެވެ.

ރޭ ހުޅުމާލެ ސެންޓްރަލް ޕާކުގައި ބޭއްވި އެސްޓީއޯގެ އަހަރީ އާންމު ޖަލްސާގައި ފައިދާ ބެހުމަށް ފާސްކޮށްފައިވެއެވެ.

Advertisement

މީގެ އިތުރުން އާންމު ހިއްސާދާރުންގެ ތެރެއިން މުހައްމަދު އަހުސަން ސަލީމް ބޯޑް އޮފް ޑިރެކްޓަރ ގައި ހިމަނައި އައު ބޯޑް އޮފް ޑިރެކްޓަރަސް ވެސް ވަނީ ކަނޑައަޅައި ފާސްކޮށްފައެވެ.

ފާއިތުވި އަހަރުގެ ރިޕޯޓުގައި ވާ  ގޮތުން  ނިމިގެން ދިޔަ 2022 ވަނަ އަހަރު އާމްދަނީގެ ގޮތުގައި 18.2 ބިލިއަން ރުފިޔާ އެސްޓީއޯއަށް ލިބިފައިވެ އެވެ. އޭގެ ކުރީ އަހަރު އާމްދަނީގެ ގޮތުގައި އެސްޓީއޯއަށް ލިބިފައި ވަނީ 10.2 ބިލިއަން ރުފިޔާ އެވެ.

މިދިޔަ އަހަރު ކުންފުންޏަށް ފައިދާގެ ގޮތުގައި ދެ ބިލިއަން ރުފިޔާ ލިބިފައި ވާއިރު، އޭގެ ކުރީ އަހަރު އެ ކުންފުންޏަށް ޖުމްލަ ފައިދާގެ ގޮތުގައި ލިބުނީ 1.5 ބިލިއަން ރުފިޔާ އެވެ. އެހެންކަމުން 2021 ވަނަ އަހަރާ އަޅާ ބަލާއިރު ފައިދާގެ ގޮތުގައި އެ ކުންފުންޏަށް ލިބުނު އަދަދު ވެސް ވަނީ 41 ޕަސެންޓުގެ ކުރިއެރުމެއް ހޯދާފަ އެވެ.