ކާރަކަށް އެރުވި ދޮޅު ލައްކަ ރުފިޔާގެ ސާމާނު ވެރިފަރާތަށް ނުލިބިގެން ފުލުހުންނަށް ރިޕޯޓް ކުރުމުން އެތަކެތި ހޯދައި ވެރިފަރާތަށް ހަވާލުކޮށްފިއެވެ.

އެގޮތުން މިކަމާއި ގުޅިގެން ފުލުހުން މިއަދު ކުރި ޓްވީޓެއްގައި ބުނެފައިވަނީ އިއްޔެ ހަވީރު ވެލާނާ އިންޓަނޭޝަނަލް އެއާޕޯޓުގެ ޓެކްސީ ކިއުއިން ނެގި ކާރަކަށް އެރުވި 150،000 ރުފިޔާގެ އިލެކްޓްރޯނިކް ސާމާނު، ގެންދަންޖެހޭ ހިސާބަށް ނުގެންދާކަމުގެ މައްސަލައެއް ފުލުހުންނަށް ހުށަހަޅާފައިވާ ކަމަށެވެ.

އަދި ހުށަހެޅި މައްސަލައާއި ގުޅިގެން މާފަންނުގެ ފުލުހުން ވަނީ ސީސީޓީވީ ފުޓޭޖު ބެލުމަށްފަހު އެ ޓެކްސީ ދެނެގަނެފައި ކަމަށް ފުލުހުން ބުނެފައިވެއެވެ.

މިއާއިއެކު އެތަކެތި ހޯދުމަށްފަހު މިހާރު ވަނީ އޭގެ ވެރިފަރާތާއި ހަވާލުކޮށްފައި ކަމަށް ފުލުހުން ވަނީ ބުނެފައެވެ.

މީގެ އިތުރުން ފުލުހުން ވަނީ ރައްޔިތުންނަށް ކަމެއް ދިމާވާ ހިނދު ދިވެހި ފުލުހުން ތިބޭނީ އެހީތެރިކަން ފޯރުކޮދިނުމުގައި އަބަދުވެސް ރައްޔިތުންނާއި އެންމެ ގާތުގައި ކަމަށް ފާހަގަކޮށްފައެވެ.

"ކަމެއް ދިމާވާ ހިނދު ވީއެންމެ އަވަހަކަށް އަޅުގަނޑުމެންނަށް ރިޕޯޓުކުރައްވާ." ފުލުހުން ބުނެފައިވެއެވެ.