ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހަށް އައްޑޫ ސިޓީގެ ރައްޔިތުން ކީ މަރުހަބާއިންވެސް އެ ސިޓީގެ ރައްޔިތުންގެ ހިތުގައި އެމަނިކުފާނަށް އޮތް ލޯތްބާއި ދެއްވާ ތަރުހީބު ފެނިގެންދިޔަ ކަމަށް ރާއްޖޭގެ ޚާރިޖީ ވަޒީރު އަބްދުالله ޝާހިދު ވިދާޅުވެއްޖެއެވެ.  

އައްޑޫ ސިޓީގައި ސަރުކާރުން ހިންގުމަށް ނިންމާފައިވާ ބައެއް މަޝްރޫޢުތައް ފައްޓަވައި، މިހާރު ކުރިއަށްދާ މަޝްރޫޢުތައް ބައްލަވައިލެއްވުމަށް ރައީސް ޞާލިހު ވަނީ އިއްޔެ އައްޑޫއަށް ވަޑައިގެންފައެވެ. އެމަނިކުފާނުގެ އަރިހުގައި ޝާހިދު އާއި ސަރުކާރުގެ މަތީފަންތީގެ ބޭފުޅުންގެ އިތުރުން، އިންޑިއާ ސަރުކާރުގެ އިސް ބައެއް ބޭފުޅުންވެސް އިއްޔެ ވަނީ އައްޑޫއަށް ވަޑައިގެންފައެވެ. 

އެގޮތުން ރައީސް ޞާލިހު އައްޑޫ އަށް ވަޑައިގެންނެވުމުން، އައްޑޫ ރައްޔިތުން ކިޔާފައިވާ މަރުހަބާގެ ފޮޓޯތައް ޓުވިޓާގައި ހިއްސާކުރައްވަމުން ޝާހިދު ވިދާޅުވީ އެއިންވެސް ފެނިގެންދިޔައީ އައްޑޫ ރައްޔިތުންގެ ހިތުގައި ރައީސް ޞާލިހަށް އޮތް ލޯބި ކަމަށެވެ. 

"ރައީސް ޞާލިހަކީ ކުޑަ ރަށެއް، ބޮޑު ރަށެއް ތަފާތުކުރެއްވުމެއް ނެތި، މުޅި ރާއްޖޭގެ ހުރިހާ ރައްޔިތުންގެ ދިރިއުޅުން އުޖާލާކުރެއްވުމަށް މަސައްކަތްކުރައްވަމުން ގެންދަވާ އޯގާތެރި ވެރިއެއް." ޝާހިދު ވިދާޅުވި އެވެ. 

ރައީސް ޞާލިހު އައްޑޫ އަށް މިކުރައްވާ 3 ދުވަހުގެ ދަތުރުފުޅުގެ ތެރެއިން އިއްޔެ ވަނީ އައްޑޫ ސިޓީގެ ބިން ހިއްކުމުގެ މަޝްރޫއު ފައްޓަވައި ދެއްވައިފައެވެ. މި މަޝްރޫއުގެ ދަށުން 194 ހެކްޓަރުގެ ބިން ހިއްކާ އިރު، އެކަމަށް 1.5 ބިލިއަން ރުފިޔާ ހަރަދުވެއެވެ. މިއީ އައްޑޫ ސިޓީގައި ހިންގުމަށް ހަމަޖެހިފައިވާ އެންމެ ބިޔަ އެއް މަޝްރޫއެވެ.

މީގެ އިތުރުން މިދަތުރުގެބތެރެއިން އިންޑިއާގެ ހައި އިމްޕެކްޓް ކޮމިއުނިޓީ ޑިވެލޮޕްމަންޓް ޕްރޮޖެކްޓެއްގެ ގޮތުގައި ތަރައްޤީކުރެވުނު ފޭދޫ ދިގިހެރާ ޓޫރިޒަމް ޒޯން ވެސް އިއްޔެ ވަނީ އިފްތިތާހު ކޮށްފައެވެ. އިންޑިއާގެ މިނިސްޓަރ އޮފް ސްޓޭޓް ފޮރ އެކްސްޓަރނަލް އެފެއާޒް ވީ.މުރަލީދަރަން މި ޕްރޮޖެކްޓް އިފްތިތާހު ކުރުމުގައި ބައިވެރިވެވަޑައިގެންނެވިއެވެ. 
މި ޒޯންތަކާއެކު، އައްޑޫ ސިޓީއަށް އިޤްތިޞާދީ އާރޯކަމާއި ހަލުވި ތަރައްޤީ ގެނެވި، އައްޑޫ ސިޓީގެ ރައްޔިތުން ދެކެމުން އައި ހުވަފެން ހަޤީގަތަކަށްވެގެންދާނެކަމުގެ ޔަޤީންކަން ސަރުކާރުން އަރުވައެވެ. 

އެ މަޝްރޫއުގެ އިތުރުން ގަން އިންޓަނޭޝަނަލް އެއަރޕޯޓް ތަރައްގީ ކުރުމުގެ މަޝްރޫއު ފެށުމުގެ ރަސްމިއްޔާތުގައި ވެސް ރައީސް ބައިވެރިވެވަޑައިގަތުމަށް ވަނީ ހަމަޖެހިފައެވެ.

އައްޑޫ ސިޓީ ކައުންސިލާއި، އަންހެނުންގެ ތަރައްގީ އަށް މަސައްކަތް ކުރާ ކޮމިޓީ އާ ބައްދަލުކުރެއްވުމުގެ އިތުރުން، އައްޑޫ ސިޓީގެ ރައްޔިތުންނާއެކު ރޭގަނޑުގެ ފަރިއްކޮޅެއްގައި ބައިވެރިވެވަޑައިގަންނަވާނެއެވެ.