އެސްޓީއޯގެ އެހީއާއިއެކު އިއްޔެ ހަވީރު އާންމުންގެ ޖަމިއްޔާގެ 'ނަރިޝް ޓުގެދާރ' ނުވަތަ އެންމެން އެކުގައި ކައިގެން ޕްރޮޖެޓުގެ ދަށުން ހިޔާ ސަރަހައްދުގައި ކާބޯތަކެތި ބަހައިފިއެވެ.

މިކަމާއި ގުޅިގެން އާންމުންގެ ޖަމްއިއްޔާއިން ކުރި ޓްވީޓެއްގައި ބުނެފައިވަނީ ޖުމްލަ 833 މީހުންނަށް 2.5 ޓަނުގެ ކާބޯތަކެތި މި ހަރަކާތުގައި ބަހާފައިވާއިރު، މީގެ ތެރޭގައި 750 ކިލޯ ފުށާއި، 850 ކިލޯ ހަކުރާއި، 900 ކިލޯ ހަނޑޫ ހިމެނޭ ކަމަށެވެ.

މިއާއިއެކު މި ހަރަކާތުގައި އެހީތެރިވުމަށް އެސްޓީއޯއިން ފޯރު ކޮށްދިން 45 ބަސްތާގެ ކާބޯތަކެތީގެ ތެރޭގައި ހަނޑޫ، ހަކުރު އަދި ފުށް، ކޮންމެ ބާވަތަކުން 15 ބަސްތާ ހިމެނޭ ކަމަށްވެސް އެ ޖަމްއިއްޔާއިން ވަނީ ބުނެފައެވެ.

Advertisement

ހިޔާ ސަރަހައްދުގައި އުޅޭ އެހީތެރިކަން ބޭނުންވާ ފަރާތްތަކަށް ކާބޯތަކެތި ފޯރުކޮށް ދިނުމަކީ ފްލެޓު ތަކަށް މީހުން ބަދަލު ވީއްސުރެ ވެސް އާންމުންގެ ޖަމިއްޔާއިން ކުރަމުން ގެންދާ ކަމެއް ކަމަށް އެ ޖަމްއިއްޔާއިން ވަނީ ފާހަގަކޮށްފައެވެ.

އެހެންނަމަވެސް ފަހަކާއި ޖެހެންދެން އެކަން ކުރިއަށް ގެންދެވުނީ ވަރަށް ކުޑަ ސްކޭލް އެއްގައި ކަމަށް އެ ޖަމްއިއްޔާއިން ވަނީ ބުނެފައެވެ.

މި ހަރަކާތާއި ބެހޭ ގޮތުން ވާހަކަ ދައްކަވަމުން އެޗް 4 ގެ އެޑްމިން އަދި ހަރަކާތުގެ އިސްބޭފުޅެއް ކަމަށްވާ މައުމޫނު އަލީ(މާނު) ވިދާޅުވީ މިހާ ގިނަ އަދަދެއްގެ ބަޔަކަށް، އެހާ ކުޑަ ވަގުތުކޮޅެއްގައި، މާބޮޑު މައްސަލަ ތަކެއް ދިމާނުވެ އަމާންކޮށް ހަރަކާތް ކުރިއަށް ގެންދެވުނީ ހުރިހާ ޓަވަރުތަކުގެ އެޑްމިންސް ގެ އެހީތެރިކަމާއި އެއްބާރު ލުމާއި އެކުގައި ކަމަށެވެ.

މީގެ އިތުރުން ކާބޯތަކެތި ބަހަން ކޮތަޅު ފޯރު ކޮށްދިން ޑެލްކޯ މޯލްޑިވްސް ކޮމްޕެނީ އާއި އެއްޗެހި ކޮތަޅަށް އަޅާ ބަންދުކޮށް ބެހުމުގައި މަދަދުވެރިވި ވައިޓް ސްޓާރ ކުންފުނި އަދި ހުޅުމާލެ 3 އެސް ފިހާރަޔަށް މާނު ވަނީ ޝުކުރު އަދާ ކޮށްފައެވެ.

އާންމުންގެ ޖަމްއިއްޔާއިން އިތުރަށް ބުނެފައިވަނީ މިހަރަކާތަކީ ދެމެހެއްޓެނިވި ގޮތަކަށް ކޮންމެ މަހެއްގައިވެސް ކުރިއަށް ގެންދެވޭނެ ހަރަކާތަކަށް ހެދުމަށް އެ ޖަމްއިއްޔާއިން އަންނަނީ މަސައްކަތް ކުރަމުން ރޭވުންތައް ރާވަމުން ކަމަށެވެ.