ބަންޑާރަނައިބު އިބްރާހިމް ރިފްއަތުގެ އިތުބާރު ނެތްކަމަށްބުނެ ގުޅިފައިވާ ސިޔާސީ ޕާޓީތަކުން މަޖިލީހަށް ހުށަހެޅާފައިވާ މައްސަލަ މަޖިލީހުގައި މާދަމާ ކުރިއަށް ގެންދިއުމަށް އަނެއްކާވެސް ތާވަލް ކޮށްފިއެވެ.
މަޖިލީހުގެ މާދަމާގެ އެޖެންޑާގައި ފުރަތަމަ އޮތީ ރިފްއަތުގެ އިތުބާރު ނެތްކަމުގެ މައްސަލައެވެ.
ރިއްފަތުގެ އިތުބާރު ނެތްކަމަށް ކަނޑައަޅާ އޭނާގެ އިތުބާރު ނެތްކަމުގެ މައްސަލަ މަޖިލީހަށް ހުށައަޅާފައި ވަނީ ދިވެހިރާއްޖެއާއި ރާއްޖޭގެ ދެކުނުން އޮންނަ ޗާގޯސް އާއި ދެމެދު ފުށުއަރާ ސަރަހަދެއް އޮތްކަމަށް ބުނެ މޮރިޝަސްއިން އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް) އަށް ހުށައެޅި މައްސަލައިގައި ދައުލަތުގެ ބަންޑާރަނައިބު ވަކާލާތުކޮށްފައިވަނީ ރާއްޖެއާއި ރައްޔިތުންގެ މަސްލަހަތު އިސްކޮށްގެން ނޫންކަން ފެންނަންހުރި ހެކިތަކުން ސާފުވާތީކަމަށް މަޖިލީހުގައި ހަރަކާތްތެރިވާ ގިނަ ސިޔާސީ ޕާޓީތަކުން ވަނީ ބުނެފައެވެ.
އެކަމާ ގުޅިގެން ޖަވާބުދާރީވުމަށް މަޖިލީހަށް ހާޒިރު ނުވެ، ރިފްއަތް ވަނީ ޖަވާބު ލިޔުމުން ފޮނުވާފައެވެ.
ނަމަވެސް މަޖިލީހުގެ އެމްޑީޕީ ފިޔަވައި އެހެން ޕާޓީތަކުން ބުނެފައި ވަނީ، ބަންޑާރަނައިބު ހާޒިރުވެވަޑައިގަންނަވަން ވަގުތު ކަނޑައަޅާފައި ވާތީ ރިފްއަތް މަޖިލީހަށް ހާޒިރުވާން ޖެހޭނެ ކަމަށެވެ.
އޭގެ ފަހުން ބަންޑާރަނައިބު ވިދާޅުވެފައި ވަނީ، ދިފާއުގައި ވާހަކަ ދައްކަން ލިބިދޭ ހައްގުގެ ބޭނުންކުރަން ނިންމަވާފައި ވާކަމަށެވެ. އަދި އެ ފުރުސަތު ފަހިކޮށްދިނުމަށް މަޖިލީހުގެ ރައީސްގެ އަރިހުގައި ރިފްއަތް ވަނީ އެދިވަޑައިގަންނަވާފައެވެ.
Advertisement
This content is created and paid for by advertisers and does not involve Voice Journalists
