މަޖިލީހުގެ މެންބަރުން ނިޒާމީ ނުކުތާ ނަންގަވައި "ޗޯރު އިބުރޭ" ލަވަ ޖައްސަވާތީ ބަންޑާރަ ނައިބު އިބްރާހިމް ރިފްއަތުގެ އިތުބާރު ނެތްކަމުގެ މައްސަލައިގެ ޖަލްސާ ކުރިޔަށް ނުގެންދެވި، ސައި ގަނޑި އައުމުން އަނެއްކާވެސް ޖަލްސާ މެދުކަނޑާލައިފިއެވެ.  

ދިވެހިރާއްޖެއާއި ރާއްޖޭގެ ދެކުނުން އޮންނަ ޗާގޯސް އާއި ދެމެދު ފުށުއަރާ ސަރަހަދެއް އޮތްކަމަށް ބުނެ މޮރިޝަސްއިން އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް) އަށް ހުށައެޅި މައްސަލައިގައި ދައުލަތުގެ ބަންޑާރަނައިބު ވަކާލާތުކޮށްފައިވަނީ ރާއްޖެއާއި ރައްޔިތުންގެ މަސްލަހަތު އިސްކޮށްގެން ނޫންކަން ފެންނަންހުރި ހެކިތަކުން ސާފުވާތީކަމަށް ބުނެ ގުޅިފައިވާ އިއްތިހާދުން މަޖިލީހަށް ހުށަހެޅި އޭނާގެ އިތުބާރު ނެތް ކަމުގެ މައްސަލަ އަށް ޖަވާބުދާރީ ވުމަށް ފާއިތުވި ހަފްތާގައި މަޖިިލީހަށް ވަޑައިގެންފައެއް ނުވެއެވެ. އެ ހަފްތާގައި އެ މައްސަލަ އެޖެންޑާ ކޮށްފައިވަނިކޮށް، ރިފްޢަތު ޖަވާބު ފޮނުއްވީ ލިޔުމަކުންނެވެ.

އެކަމާއި ގުޅިގެން މަޖިލީސް ހޫނުވެ، އެ ދުވަހު ޖަލްސާ ނިންމާލުމަށް ފަހު މިއަދަށް ތާވަލު ކުރި މައްސަލަ ވެސް ކުރިޔަށް ގެންދެވޭ ގޮތެއް އަދިވެސް ވަނީ ނުވެފަ އެވެ.

Advertisement

އެގޮތުން، ނިޒާމީ ނުކުތާތައް ނަންގަވައި ފަހަރަކު މެންބަރެއް ގޮވާލަމުން ދިޔައީ، ރިފްއަތު މިދިޔަ ހަފްތާގައި ޖަލްސާއަށް ވަޑައިނުގެންނެވި ސަބަބު ސާފުވާން ޖެހޭ ކަމަށެވެ. އަދި އެފަދައިން ވިދާޅުވެ، މަޑުއްވަރީ ދާއިރާގެ މެންބަރު އާދަމް ޝަރީފް އުމަރުވެސް މައްސަލަ ހުށަނާޅުއްވާތީ ޖަލްސާ މެދު ކަނޑާލަން ޖެހުނެއެވެ. 

އެއަށްފަހު ޖަލއްސާފަށައި، އެތައް އިރެއް ފަހުން، މައްސަލަ ހުށަހަޅުއްވަން ފެއްޓެވުމުންވެސް އިދިކޮޅު މެންބަރުން ވަނީ އިރު އިރުކޮޅާ ނިޒާމީ ނުކުތާ ނަންގަވާފައެވެ. 

އެގޮތުން ނިޒާމީ ނުކުތާތައް ނަންގަވައި، އެބޭފުޅުންގެ މޭޒުގައި ގާއިމުކޮށްފައި ހުރި ސިސްޓަމް މަސައްކަތް ނުކުރާކަމަށާ، މައްސަލަ ކުރިއަށް ގެންދެވޭނީ ރިފްއަތު ކުރިންގެ ޖަލްސާއަށް ވަޑައި ނުގެންނެވި ސަބަބު ހާމަކުރުމުން ކަމަށް މެންބަރުން ދިޔައީ ވިދާޅުވަމުންނެވެ. 

އިދިކޮޅު މެމްބަރުން ނިޒާމީ ނުކުތާތައް ނަންގަވަމުންދާއިރު، ސަރުކާރު މެމްބަރުން ވެސް އެކަމާއި ދެކޮޅަށް އަޑު އުފުއްްލަވައި ނިޒާމީ ނުކުތާ ނަންގަވާގައިވެއެވެ. އަދި އެ މެންބަރުން ވަނީ ރައީސް ނަޝީދަށް ފާޑުވިދާޅުވެ ޖަލްސާ ކުރިޔަށް ގެންދަން ފުރުސަތު ދޭން ގޮވާލާފަ އެވެ.

މެންބަރުންގެ އަޑު ގަދަ ކުރުމާއި ނިޒާމީ ނުކުތާ ނެގުމުގައި މައްސަލަ ހުށަނޭޅު ލަސްވަމުން ދިޔައިރު، ދޭތެރެއަކުން "ޗޯރު އިބުރޭ" ލަވަޖަހާތީވެސް ޖަލްސާއަށް ހުރަސްއެޅެމުންދިޔައެވެ.

ހެނދުނު 09:00 ގައި ފެށުނު ޖަލްސާ، 10:30 ވަންދެންވެސް ދިޔައީ އެގޮތުގައެވެ. އަދި 10:30 ވުމުން ސައިގެ ވަގުތަށް ޖަލްސާ މެދުކަނޑާލި އިރު ވެސް އިތުބާރު ނެތް މައްސަލައިގެ ކިއުން އިއްވޭ ގޮތެއް ނުވި އެވެ.