ވައިގެ މަގުން ޕާކިސްތާނުން ރާއްޖެ އައި ޕާކިސްތާނުގެ ފަސިންޖަރެއްގެ ލަގެޖުން 10.14 ކިލޯގެ މަސްތުވާތަކެތި ކަސްޓަމްސް އިން އަތުލައިގަނެފިއެވެ.

މިިކަމާއި ގުޅިގެން ކަސްޓަމްސް އިން ނެރުން ބަޔާނުގައި ބުނެފައިވަނީ މިތަކެތި އަތުލައިގަނެފައިވަނީ، މިއަދު ޕާކިސްތާނުގެ ފައިސަލް އާބާދުން ރާއްޖެ އައި ޕާކިސްތާނުގެ ފަސިންޖަރަކާ މެދު ޝައްކުކުރެވިގެން އޭނާއާ ސުވާލުކޮށްް، ބަލައި ފާސްކުރުމުގެ ތެރޭގައި ކަމަށެވެ.

އެގޮތުން އުމުރުން 25 އަހަރުގެ ފިރިހެން ފަސިންޖަރު ބަލައި ފާސްކުރުމުގެ ތެރެގައި މަސްތުވާތެކެތި ކަމަށް ޝައްކު ކުރެވޭ ތަކެތި ފެނިފައިވާ ކަމަށްް ކަސްޓަމްސްއިން ވަނީ ބުނެފައެވެ.

Advertisement

މިއާއިއެކު މި ތަކެތި ފުރަތަމަ މަރުހަލާގައި ކަސްޓަމްސް އިން ތަހްލީލު ކުރި އިރު މަސްތުވާ ތަކެތީގެ ބާވަތެއް ކަމަށްވާ ހެެރޮއިން އަށް ޕޮޒިޓިވް ވެފައިވާ ކަމަށް ކަސްޓަމްސްއިން ވަނީ ބުނެފައެވެ.

މި މައްސަލައިގައި އަތުލައިގަނެވުނު މަސްތުވާތަކެތީގެ ބަރުދަނުގައި ޖުމްލަ 10.14 ކިލޯ ހުރިއިރު މިތަކެތީގެ މަގުމަތީ އަގު 13 މިލިއަން ރުފިޔާއަށް ވުރެ މަތިވާނެ ކަމަށް ކަސްޓަމްސް އިން ވަނީ ލަފާ ކޮށްފައެވެ.

ކަސްޓަމްސް އިން އިތުރަށް ބުނީ މި މައްސަލަ އިތުރަށް ތަހްގީގު ކުރުމަށްޓަކައި، މި ފަސިންޖަރާއި އޭނާގެ އަތުން އަތުލައިގަނެވުނު މަސްތުވާތަކެތި ދިވެހި ފުލުހުންގެ ޚިދުމަތާ ހަވާލުކުރެވިފައިވާ ކަމަށެވެ.