ދިވެހިރާއްޖޭގެ ދެކުނުގެ ޚާއްސަ އިޤްރިޞާދީ ސަރަހައްދުން ބައެއް ދޫކޮށްލާފައިވާކަމަށް ބުނެ ސަރުކާރާއި ދެކޮޅަށް އިދިކޮޅު ފަރާތްތައް ކުރަމުންދާ މަސައްކަތަކީ ސިޔާސީ ލަނގިރި ޖެހުންކަމަށް ރައްޔިތުންގެ މަޖިލީހުގެ އިހަވަންދޫ ދާއިރާގެ މެމްބަރު މުޙައްމަދު ޝިފާއު ވިދާޅުވެއްޖެ އެވެ. 

ބަންޑާރަ ނައިބު އިބްރާހިމް ރިއްފަތުގެ އިތުބާރު ނެތްކަމުގެ މައްސަލައިގެ ބަހުސް މިއަދު މަޖިލީހުގައި ވަނީ ފަށާފައެވެ. އެ މައްސަލައަށް ބަހުސްކުރައްވަން ފައްޓަވަމުން ޝިފާއު ވިދާޅުވީ މި ސަރުކާރާއި، ސަރުކާރުގެ ވަޒީރުންނަށް ރައްޔިތުން ފުރިހަމައަށް އިތުބާރު ކުރާ ކަމަށެވެ. 

ރައްޔިތުންގެ މަސްލަހަތު ދޫކޮށްލާ، ނުވަތަ ރައްޔިތުންގެ މަސްލަހަތށްވުރެ އެހެން ބައެއްގެ މަސްލަހަތު މި ސަރުކާރުން އިސް ނުކުރާނެ ކަމުގެ ފުރިހަމަ ޔަގީންކަން ރައްޔިތުންގެ އޮތްކަމަށް ޝިފާއު ވަނީ ވިދާޅުވެފައެވެ. 

އެ ވާހަކައާއި ގުޅުވާ ޝިފާއު ވިދާޅުވީ މި ސަރުކާރަކީ ރައްޔިތުންނަށް ފުރިހަމަ ބޭސް ފަރުވާއާއި، ތައުލީމު ހޯދައިދިން ސަރުކާރުކަމަށެވެ. އަދި ރަށު ބަންދުން ރައްޔިތުން ވީއްލާ، މުޅި ރާއްޖެ ހުޅުވާދެއްވާ، އަތޮޅުތެރެއަށް އުމްރާނީ ތަރައްގީގެ ބިޔަ މަޝްރޫއުތަކެއް މި ސަރުކާރުން ހިންގަވަމުންދާ ކަމަށެވެ. 

އެހެންކަމުން މި ސަރުކާރަކީ ރައްޔިތުންގެ ފުދުންތެރިކަން އިތުރުކޮށް އިޤްތިޞާދީ ގޮތުން ރާއްޖެއަށް އިންގިލާބީ ބަދަލުތަކެއް ގެންނަމުންދާކަން ރައްޔިތުން ގަބޫލުކުރާކަމަށް ޝިފާއު ވިދާޅުވި އެވެ. 

އެކަން ފާހަގަކުރައްވާ ޝިފާއު ވިދާޅުވީ ރާއްޖޭގެ ޚާއްސަ އިޤްތިޞާދީ ސަރަހައްދާއި ގުޅުވާ އިދިކޮޅުން ކުރަމުންދާ މަސައްކަތަކީ ސަރުކާރާއި ދެކޮޅަށް ކުރާ ސިޔާސީ މަސައްކަތެއް ކަމަށެވެ. 

މެމްބަރު ޝިފާއު އިތުރަށް ވިދާޅުވީ ރައްޔިތުން ބޭނުންވަނީ މިވެރިކަން ދަމަހައްޓާ ނަގަހައްޓަން ކަމަށެވެ. އަދި ރައްޔިތުން ތަރައްގީގެ ރޭހުގައި ފަހަތަށް ދާން ބޭނުން ނުވާކަމަށާއި، އަންނަ ރިޔާސީ އިންތިޚާބުގައި ބޮޑު ތަފާތަކުން ރައްޔިތުން ނިކުމެ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ދެވަނަ ދައުރަކަށް އިންތިޚާބު ކުރައްވާނެކަމުގެ ޔަގީންކަން އޮތްކަމަށް ޝިފާއުގެ ވާހަކައިގައި ވަނީ ވިދާޅުވެފަ އެވެ.