ރާއްޖޭގެ ދެކުނުން އޮންނަ ޚާއްސަ އިޤްތިޞާދީ ސަރަހައްދުން ބައެއް ސަރުކާރުން ވިއްކާލާފައިވާކަމަށް ބުނެ ގެއްލުނު ބައި ހޯދުމަށް ގިނަ ސިޔާސީ ޕާޓީތަކާއި ކުރީގެ ބަންޑާރަނައިބުން ގުޅިގެން އެކުލަވާލާފައިވާ ފޯޅަވަހި ކޯލިޝަނަށް ވެސް އަސްލު މައްސަލައަކީ ކޮބައިކަން އޮޅިވަޑައިގެންފައިވާ ކަމަށާއި، މި މައްސަލައިގައި އެ ބޭފުޅުންނަށް ވެސް އެއްގަލަކަށް ނޭރޭކަމަށް ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެމްބަރު މީކާއިލް އަޙްމަދު ނަސީމް ވިދާޅުވެއްޖެ އެވެ.
ފޯޅަވަހި މައްސަލައާއި ގުޅިގެން ހުށައަޅާފައިވާ ބަންޑާރަ ނައިބު އިބްރާހިމް ރިއްފަތުގެ އިތުބާރު ނެތްކަމުގެ މައްސަލަ މަޖިލީހަށް ހުށައަޅާ ބަހުސްކުރެވިފައިވާއިރު، އެ ބަހުސްގައި ބައިވެރިވެވަޑައިގެން ވާހަކަދައްކަވަމުން މީކާއިލް ވިދާޅުވީ ބަންޑާރަ ނައިބުގެ އިތުބާރު ނެތްކަމުގެ މައްސަލައަކީ އިޚްލާސްތެރި ނިޔަތެއްގައި ވަޒީރު ޖަވާބުދާރީ ކުރުވުމަށް ހުށައަޅާފައިވާ މައްސަލައެއްކަމަށް ގަބޫލު ނުކުރައްވާކަމަށެވެ.
އެގޮތުން ފޯޅަވަހި މައްސަލައިގައި ސަރުކާރުން އަމަލުކޮށްފައިވާ ގޮތް ކުށްވެރިކޮށް، އެކަމާއި ދެކޮޅަށް އުފައްދާފައިވާ ކޯލިޝަނުގައި ތިއްބެވި ބޭފުޅުންނަށް ވެސް އަސްލު މައްސަލައަކީ ކޮބައިކަން އޮތީ އޮޅިވަޑައިގެންފައި ކަމަށާއި، އެ ބޭފުޅުންނަށް ވެސް އަސްލު މައްސަލައާއި މެދު އެއްބަސް ނުވެވޭކަން ދައްކަވަމުންދާ ވާހަކައިން ފާހަގަކުރެއްވޭކަމަށް މީކާއިލް ވިދާޅުވި އެވެ.
ކަނޑު ވިއްކާލުމާއި ދެކޮޅު ކޯލިޝަނުން ބޭއްވި ޕްރެސް ކޮންފަރެންސްގެ ތެރެއިން
"ފޯޅަވަހި ކޯލިޝަނުން ހުށައަޅާ މި ފޯޅަވަހި މައްސަލައިގައި، ޕްރެސް ކޮންފަރެންސް ދެއްވާއިރުގައި އެއްބޭފުޅަކު މި ވިދާޅުވަނީ ޗާގޯސްއަކީ ރާއްޖޭގެ ބަޔެކޭ. ތިމަންނާމެން އެތަން ހިފާނަމޭ. އެބޭފުޅާއާއި ޖެހިގެން އިންނަވާ އަނެއް ބޭފުޅާ، ހަމަ ގާނޫނީ ފުންނާބު އުސް ބޭފުޅުން.. ވަރު ވަރުގެ ބޭފުޅުން، މި ވިދާޅުވަނީ ނޫނެކޭ ޗާގޯސްއަކީ ރާއްޖޭގެ ބައެއް ނޫނޭ، ޖެހިގެން މި އުޅެނީ ކަނޑުގެ މައްސަލައެކޭ. އިމުގެ މައްސަލައެކޭ! ހަމަ އެ ޕްރެސްކޮންފަރެންސްގައި އިންނަވާ އެއް ބަންޑާރަނައިބު އެބަ ވިދާޅުވޭ އަސްލު މައްސަލަ ފެށުނު ހިސާބަކީ އިއްޒަތްތެރި ރައީސްގެ ވެރިކަމުގައި އެމްޑީޕީގެ އެންމެ ފުރަތަމަ ވެރިކަމުގައި ސްޓޭންޑު ބަދަލުކުރި ހިސާބުންނޭ. އެ ބަންޑާރަ ނައިބާއި ޖެހިގެން ކަނާތައް އިންނަވާ ފިކުރެއްގެ ދިރުމުގެ ބޭފުޅާ އެބަ ވިދާޅުވޭ ނޫނެކޭ، އެކަން ކުރީ މި ސަރުކާރުންނޭ.. އިއްޒަތްތެރި ރައީސް! ކޮބާތޯ އަސްލު މައްސަލައަކީ؟ "
މެމްބަރު މީކާއިލް ނަސީމު
މީކާއިލް ވިދާޅުވީ ރައްޔިތުންގެ މަންދޫބުންގެ ގޮތުގައި ތިއްބެވުމުން، ސަރުކާރު ޖަވާބުދާރީ ކުރުވުމަކީ ކުރަން ޖެހޭ ކަމެއްކަމަށެވެ.
އެހެން ނަމަވެސް މިއަދު ފެނިގެން މިދަނީ އެ ޒިންމާ ނެންގެވުމުގެ ބަދަލުގައި މުޅިން އެހެން ނިޔަތެއްގައި މަސައްކަތް ކުރައްވަމުންދާ މަންޒަރުތައް ކަން އޭނާ ފާހަގަކުރެއްވި އެވެ.
އެއާއެކު މީކާއިލް ވިދާޅުވީ ބަންޑާރަ ނައިބަށް ފުރިހަމައަށް އިތުބާރު ކުރައްވާކަމަށާއި، ބަންޑާރަ ނައިބު ރިއްފަތަކީ ދައުލަތަށް ޚިޔާނާތްތެރިވާނެ ބޭފުޅެއް ނޫންކަމަށް މީގެ ކުރިން މަޖިލީހުގެ ރައީސް މުޙައްމަދު ނަޝީދު ވިދާޅުވެފައިވާ ކަމަށެވެ.
އެހެންކަމުން، ނަޝީދު އެފަދައިން ވިދާޅުވެފައިވާތީ، އެ ޔަގީންކަމުގެ މައްޗަށް ބަންޑާރަ ނައިބު އިބްރާހިމް ރިއްފަތަށް ފުރިހަމައަށް އިތުބާރު ކުރައްވާކަމަށް މީކާއިލް ވިދާޅުވި އެވެ.
Advertisement
This content is created and paid for by advertisers and does not involve Voice Journalists
