މަޖިލީހުގެ ސަލާމަތީ ހިދުމަތްތަކާ ބެހޭ ކޮމިިޓީ، (241 ކޮމިޓީ)ގެ މުގައްރިރުކަން އަލުން ލިބިއްޖެނަމަ، ޗާގޯސްގެ މައްޗަށް މޮރިޝަސްގެ ސިޔާދަތީ ބާރު ލިބިގެންވާ ކަމަށް ރާއްޖޭން ބަލައިގަންނަކަން ބަޔާންކޮށް ރައީސް އިބްރާހިމް މުހައްމަދު ޞާލިހު މޮރިޝަސްގެ ބޮޑުވަޒީރަށް ފޮނުއްވާފައިވާ ސިޓީފުޅު ހޯދަން ރައީސް އޮފީހަށް ހުށަހަޅާނެ ކަމަށް އެ ކޮމިޓީގެ މުގައްރިރުކަން މިހާތަނަށްވެސް ކުރައްވަމުން އައި އެމްޑީޕީ ޕާލަމެންޓްރީ ގްރޫޕްގެ ލީޑަރު މުހައްމަދު އަސްލަމް ވިދާޅުވެއްޖެއެވެ.
މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތް ކަމުގެ މައްސަލަ ހުށަހަޅަން އެމްޑީޕީގެ ޕީޖީ ގްރޫޕުން ފާސްކޮށްފައިވާކަން އިއުލާނު ކުރަން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އަސްލަމް ވަނީ، އެމްޑީޕީގެ މެންބަރުންތަކެއް އެ ޕާޓީން ކެނޑުމާއި ގުޅިގެން މަޖިލީހުގެ މެންބަރުންގެ ކޮމްޕޮޒިޝަނަށް އައި ބަދަލާއެކު އަދިވެސް މަޖިލީހުގެ ދާއިމީ ކޮމިޓީތައް އެކުލަވާނުލެވި އޮތުމުގެ ސަބަބުން ގިނަ މައްސަލަތަކެއް ކުރިމަތިވަމުންދާ ކަމަށް ވިދާޅުވެފައެވެ.
އަދި ދާއިމީ ކޮމިޓީތައް އެކުލަވާލެވިފައި ނުވަނީ ޕާޓީތަކުގެ މެދުގައި އުފެދިފައިވާ ހިޔާލުތަފާތުވުންތަކާއި ހުރެ ކަމަށް ރިޔާސަތުން ވިދާޅުވާ ކަމަށާ، އޭގެ ސަބަބުން ކޮމިޓީތަކުގެ މަސައްކަތް އެއްކޮށް ހުއްޓިފައިވާ ކަން އޭނާ ފާހަގަކުރެއްވިއެވެ.
މިއާއެކު މަޖިލީހުގެ ކޮމިޓީ ތަކުގައި މިހާރުވެސް ވަރަށް ގިނަ، މުހިއްމު، ހައްސާސް ބިލްތަކާއި މައްސަލަތައް ތާށިވެފައިވާ ކަން ފާހަގަކުރައްވައި އަސްލަމް ވަނީ 241 ކޮމިޓީއަށް ހުށަހެޅިފައިވާ، ރައީސް ޞާލިހުގެ ސިޓީފުޅުގެ މައްސަލަ މިސާލެއްގެ ގޮތުން ނަންގަވާފައެވެ.
"ވަކިން ހާއްސަކޮށް އަޅުގަނޑު މިވީ ހިސާބަށް ޗެއާ ކުރަމުން އައި 241 ކޮމިޓީ [ސަލާމަތީ ހިދުމަތްތަކާ ބެހޭ ކޮމިިޓީ]އާ ގުޅޭގޮތުން ދަންނަވާ ކަމުގައި ވަނީ ނަމަވެސް، ރައީސުލްޖުމްހޫރިއްޔާ ފޮނުއްވި ސިޓީއާ ގުޅޭގޮތުން އަޅުގަނޑަށް އަސްލު ގޮތެއް ނުނިންމިފައި އޮތީ މިހާރު 241 ކޮމިޓީ ނުބޭއްވިގެން،"
މުހައްމަދު އަސްލަމް
އަސްލަމް ވިދާޅުވީ، އަލުން ކޮމިޓީތައް އެކުލަވާލައި، 241 ކޮމިޓީގެ މުގައްރިރު ކަން ލިބިއްޖެ ނަމަ އެންމެ ފުރަތަމަ ކަމަކަށް ކުރައްވާނެ ކަމަކީވެސް އެ ސިޓީ ހޯއްދެވުމުގެ މަސައްކަތް ކަމަށެވެ.
"241 ކޮމިޓީ ބޭއްވޭ ފުރަތަމަ ދުވަހު އަޅުގަނޑު އެ ކޮމިޓީގެ ޗެއާގައި އިތުރަށް އިންނަ ކަމުގައި ވަނީނަމަ، ރައީސުލްޖުމްހޫރިއްޔާގެ ސިޓީފުޅު ހޯދަން ވެސް، 241 ކޮމިޓީން ރައީސުލްޖުމްހޫރިއްޔާގެ އޮފީހަށް ސިޓީ ފޮނުވަންވެސް އަޅުގަނޑު މިހުރީ ގަސްތުކޮށްގެން."
މުހައްމަދު އަސްލަމް
ރާއްޖެ އާއި ޗާގޯސްގެ އިން ވަކިކުރުމުގެ މައްސަލަ ދުނިޔޭގެ ކަނޑުތަކާ ބެހޭ ޓްރައިބިއުނަލް (އިޓްލޮސް) އިން މައްސަލަ ނިންމުމުގެ ކުރިންވެސް އިދިކޮޅު ފަރާތްތަކުން ރައީސްގެ ސިޓީ ހާމަކުރުމަށް ދިޔައީ ގޮވާލަމުންނެވެ. އެގޮތުން ކުއްލި މައްސަލަވެސް މަޖިލީހަށް ވައްދާފައިވާ އިރު އެ މައްސަލަ ވަނީ މަޖިލީހުން ބޭރުކޮށްލާފައެވެ. އަދި އެ މައްސަލަ 241 ކޮމިޓީގައި އޮންނަތާ މިވީހާ ދުވަހުގައިވެސް އަސްލަމް އާއި އެމްޑީޕީގެެ މެންބަރުން ވެސް އެސިޓީ ހާމަ ކުރުމަށް އެދޭނެ ކަމުގެ އެއްވެސް އިޝާރާތެއް ދެއްވާފައެއް ނުވެއެވެ.
Advertisement
This content is created and paid for by advertisers and does not involve Voice Journalists
