މައްޗަންގޮޅީ އުތުރު ދާއިރާގެ މެންބަރު މުހައްމަދު ރަޝީދު (ބޯދިގެ) އާއި އޭނާގެ އަނބިކަނބަލުންނަށް މަރުގެ އިންޒާރުދިން މައްސަލަ ކޮމިޝަނަރ އޮފް ޕޮލިސް މުހައްމަދު ހަމީދަށް ހުށަހެޅިތާ ތިން އަހަރު ވެފައިވާ ކަމަށާ، އެހެން ނަމަވެސް އެކަން ނުބަލާ ކަމަށް އޭނާ ވިދާޅުވި އެވެ.
މިއަދުގެ މަޖިލީހުގެ ޖަލްސާގައި ދެ ބިލެއްގެ ބަހުސް ކުރިއަށް ގެންދެވުނު ކަމުގައިވިއަސް، ބަހުސް ކުރެވެމުން ދިޔައިރު މެންބަރުން ވަނީ އެކަކު އަނެކެއްގެ ބޮލުގައި ވައްކަމުގެ ތުހުމަތު އަޅުވައި، ނިޒާމީ ނުކުތާ ނަންގަވައި، އެއް މެންބަރަކު އަނެއް މެންބަރަށް އިންޒާރު ދެއްވާ ކަމަށް ތުހުމަތު ކުރައްވަމުން ގެންގޮސްފައެވެ.
އެގޮތުން ދިއްގަރު ދާއިރާގެ މެންބަރު އިކްރާމް ހަސަން، ކުނި މެނޭޖް ކުރުމުގެ ބިލަށް ބަހުސް ކުރައްވަމުން ގެންދެވި ދަނޑިވަޅުގައިވެސް، މަޖިލީހުގެ ހެންވޭރު ދެކުނު ދާއިރާގެ މެމްބަރު ހުސެއިން ޝަމީމު (އަނދުން ހުސެއިން) ވަނީ ނިޒާމީ ނުކުތާއެއް ނަންގަވައި، އޭނާއަށް 'ދަ ޑިމޮކްރެޓްސް' ގެ 10 މެންބަރަކު އިންޒާރު ދެއްވި ކަމަށް ވިދާޅުވެފައެވެ.
"ބްރޭކް ގަޑީގައި ސައިބޯން ސައިކޮޓަރިއަށް ދިޔައިރު، ސިޑިމަތިން އަޅުގަނޑަށް ވަނީ އިންޒާރުދީފަ، ދި ޑިމޮކްރެޓްސްގެ 4 މީހަކު އިންޒާރު ދީ ހަޑިހުތުރު އެއްޗެއްހި ގޮވާފައި، އެވާހަކަ އަޅުގަނޑު މަޖިލީހުގެ ރައީސް މުޙައްމަދު ނަޝީދު ސައިކޮޓަރީގައި އިންނަވަނިކޮށް ދެންނަވީމާ އެތައް ބައެއްގެ ކުރިމަތީގައި އެވާހަކަ ދެންނެވީމަ ވިދާޅުވީ އަދި ކަލޭ ކަންފަތްމަތީގައި ވެސް އެމީހުން ލައްވާ ޖައްސުވާނަމޭ، ހޭއަރުވާލާނަމޭ"
ހެންވޭރު ދެކުނު ދާއިރާގެ މެމްބަރު ހުސެއިން ޝަމީމު
އަނދުން ހުސެއިން އެ ވާހަކަތައް ރިޔާސަތުގެ ސަމާލުކަމަށް ގެންނަވައި ވިދާޅުވީ އެ މައްސަލަ ރަސްމީކޮށް ރިޔާސަތަށް ހުށައަޅާކަމަށެވެ. އަދި އެކަމުގައި ފިޔަވަޅު އަޅުއްވައި ދެއްވުމަށް އެދިލައްވާ ކަމަށެވެ.
ހެންވޭރު ދެކުނު ދާއިރާގެ މެމްބަރު ހުސެއިން ޝަމީމު-- ފޮޓޯ/ މަޖިލިސް
ޝަމީމުގެ ވާހަކައާއި ގުޅިގެން ނިޒާމީ ނުކުތާއެއް ނަންގަވާ ރައްޔިތުންގެ މަޖިލީހުގެ ކުޑަހުވަދޫ ދާއިރާގެ މެމްބަރު އަހުމަދު އާމިރު ވެސް ވަނީ އޭނާއަށް ރައްޔިތުންގެ މަޖިލީހުގެ ހަނިމާދޫ ދާއިރާގެ މެމްބަރު އަބްދުލްޣަފޫރު މޫސާ އިންޒާރުދެއްވާފައިވާކަން މަޖިލީހުގެ ރިޔާސަތުގެ ސަމާލުކަމަށް ގެންނަވާފަ އެވެ.
"ހަނިމާދޫ ދާއިރާގެ އިއްޒަތްތެރި މެމްބަރު ސައިކޮޓަރީގައި އަޅުގަނޑަށް "ހޭއަރުވާލާނަމޭ" ވެސް ވިދާޅުވެފައި ވަނީ. އެއީ ކޮން ނިޔަތެއްގައި ކޮން ބޭނުމެއްގައި ކަމެއް ނޭނގޭ އަޅުގަނޑަކަށް"
ކުޑަހުވަދޫ ދާއިރާގެ މެމްބަރު އަހުމަދު އާމިރު
އާމިރު ވިދާޅުވީ މެމްބަރުން އެކަކު އަނެކަކަށް އިންޒާރު ދޭ މައްސަލަ ބެލޭނެ އިންތިޒާމުތައް ހަމަޖެހިފައި އޮތުމަކީ ކޮންމެހެން މުހިންމުކަމެއް ކަމަށް ދެކިވަޑައިގަންނަވާ ކަމަށެވެ.
ކުޑަހުވަދޫ ދާއިރާގެ މެމްބަރު އަހުމަދު އާމިރު-- ފޮޓޯ/ މަޖިލިސް
އެއާއެކު ރިޔާސަތުން ވަނީ އެފަދަ މައްސަލަތައް ބެލޭނެ ނިޒާމެއް މަޖިލީހުގައި ވާ ކަމަށާ، އެހެން ކަމުން އެގޮތުގެ މަތިން މައްސަލަ ހުށަހަޅައިގެން ކުރިއަށް ގެންދެވުމަށް އެދިލައްވާފައެވެ.
އެއަށްފަހުވެސް، ނޮޅިވަރަމް ދާއިރާގެ މެންބަރު މުހައްމަދު ނަޝީދު (މޮސްޓާ) ވަނީ ނިޒާމީ މައްސަލަ ނަންގަވައި، އޭނާ މަޖިލީހުގައި ފެނަކައިގެ ކޮރަޕްޝަންގެ ވާހަކަ ދެއްކެވުމުން، މަރުގެ އިންޒާރު ދީފައިވާ ކަމަށް ވިދާޅުވެފައެވެ.
މަޖިލިސްގެ އިމްތިޔާޒާއި ސުލޫކީ ކޮމިޓީއަށް، ހެންވޭރު ދެކުނު ދާއިރާގެ މެންބަރު ހުސައިން ޝަމީމް ހުށަހަޅާފައިވާ މައްސަލައެއް ޕާކު ކޮށްފައި އޮންނަތާ ދޮޅު އަހަރު މިވަނީ. ދެން ދެވަނަ ނިޒާމީ މައްސަލަ އަކީ އަޅުގަނޑަށް މަރުގެ އިންޒާރު ދިނީ މިތާނގަ ފެނަކައިގެ ވައްކަމުގެ ވާހަކަ ދެއްކީމާ. ފޯނު ނަންބަރަކުން ގުޅާފައި. ޕޮލިހަށް އަޅުގަނޑު އެ މައްސަލަ ހުށަހެޅިން. އަދި އަދަށްވެސް ވީއެއް ނުވީއެއް ނޭނގެ. އެއީ ވަރަށް ބޮޑު ނިޒާމީ މައްސަލަ އެއް.
ނޮޅިވަރަމް މެންބަރު މުހައްމަދު ނަޝީދު (މޮސްޓާ)
މޮސްޓާ ވިދާޅުވީ، މައްސަލައެއް ހުށަހެޅުމުން އެ މައްސަލަ ބެލެން ޖެހޭނެ ކަމަށެވެ.
ނޮޅިވަރަމް މެންބަރު މުހައްމަދު ނަޝީދު (މޮސްޓާ)-- ފޮޓޯ/ މަޖިލިސް
މޮސްޓާގެ ވާހަކަތަކާއި ގުޅުވައި، އަނދުން ހުސައިން ނިޒާމީ ނުކުތާއެއް ނަންގަވައި ވަނީ، ރައްޔިތުންގެ މަޖިލީހުގެ ރައީސް މުހައްމަދު ނަޝީދު، އެމަނިކުފާނުގެ އަތުޕުޅުގައި އޭނާގެ ލޭ ހުރި ކަމަށް ވިދާޅުވުމާއި ގުޅިގެން، އިމްތިޔާޒާއި ގުޅޭ ކޮމިޓީއަށް ހުށަހަޅާފައިވާ ކަން ފާހަގަކުރައްވާފައެވެ. އަދި އެ މައްސަލަ ހުށަހެޅިތާ ދޮޅު އަހަރުވެގެން ދިޔައިރުވެސް ނުބަލާ ކަމަށް އޭނާ ވިދާޅުވި އެވެ.
އަނދުން ހުސައިންގެ ވާހަކައަށްފަހު ބޯދިގުވެސް ވަނީ ނިޒާމީ ނުކުތާ ނަންގަވައި އޭނާއަށް މަރުގެ އިންޒާރު ދިން މައްސަލަ ނުބަލާކަން ރިޔާސަތުގެ ސަމާލު ކަމަށް ގެނެސްފައެވެ.
"އަޅުގަނޑުގެ މައްސަލައެއް، އެމްސީ ހަމީދަށް، ފޯނުން ގުޅާފައި ބުނެފައި، އަޅުގަނޑުގެ އަންހެނުންނާއި އަޅުގަނޑާ މަރާލަންވެގެން ދިން އިންޒާރު، ދިނީމާ ތިން އަހަރުވީ، އެމްސީ ހަމީދު އަތުގައި އޮންނާނެ މިހާރުވެސް. މަޖިލިސް ލެޓާ ހެޑްގައި އަޅުގަނޑު ލާފައި އޮތް ސިޓީ. އިންޒާރު. ނުބަލާ. ކޮން ދޮޅު އަހަރެއްގެ ވާހަކަ ދައްކާކަށް."
މުހައްމަދު ރަޝީދު (ބޯދިގެ)
އެފަދަ ގިނަ ނިޒާމީ މައްސަލަތަކާއި ހުރެ މަޖިލިސް ކުރިއަށް ގެންދެވޭގޮތް ނުވެ މިއަދުގެ މަޖިލިސްވެސް ވަނީ ނިންމާލާފައެވެ.
Advertisement
This content is created and paid for by advertisers and does not involve Voice Journalists
