ޖުމްހޫރީ ޕާޓީގެ ލީޑަރު އަދި އެ ޕާޓީގެ ރިޔާސީ ކެންޑިޑޭޓު ޤާސިމް އިބްރާހީމަކީ ރާއްޖޭގައި އުފެދުނު އެންމެ "ސްމާޓު ބިޒްނެސް މޭން" ކަމަށް ޖުމްހޫރީ ޕާޓީގެ އެޑްވައިޒަރު އިލްހާމް އަހުމަދު ވިދާޅުވެއްޖެ އެވެ.

ޤާސިމަށް ޖޭޕީގެ ރިޔާސީ ޓިކެޓު ހަވާލުކުރުމަށް ހުކުރު ދުވަހުގެރޭ ބާއްވާ ޖަލްސާއާއި ގުޅޭގޮތުން މައުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އިލްހާމް ވިދާޅުވީ ރިޔާސީ އިންތިޚާބަށް ޤާސިމް ކުރިމަތިލައްވަނީ ރާއްޖެއަށް ދިމާވެފައިވާ މައްސަލަތައް ވަރަށް ބޮޑަށް ދެނެވަޑައިގެން ހުންނަވާ ކަމަށެވެ. 

އެމަނިކުފާނަކީ ރާއްޖޭގެ ސިޔާސީ މައިދާނުގައި ހުންނެވި އެންމެ ސްމާޓު ސިޔާސީ ލީޑަރުކަމަށާއި، މައްސަލަތަކަށް ޙައްލު ހޯއްދަަވަން އެމަނިކުފާނަށް އެނގިވަޑައިގަންނަވާނެކަމަށް އިލްހާމު ވިދާޅުވި އެވެ. 

އިލްހާމު އިތުރަށް ވިދާޅުވީ ޓިކެޓު ޖަލްސާގައި ރިޔާސީ އިންތިޚާބަށް ޖުމްހޫރީ ޕާޓީން އެކުލަވާލާފައިވާ މެނިފެސްޓޯގައި ހުރި ބައެއް މުހިންމު ކަންކަމަށް ޤާސިމް އަލިއަޅުވާލައްވާނެ ކަމަށެވެ. 

އަދި އެމަނިކުފާނުގެ ބައެއް މުހިންމު ވައުދުތައްވެސް ރައްޔިތުންނާއި ހިއްސާކުރައްވާނެ ކަމަށެވެ. 

ޤާސިމް އިބްރާހީމަކީ ރާއްޖޭގެ ވަރަށް ގިނަ ބަޔަކަށް އެކި ގޮތްގޮތުން އެހީތެރިކަން ފޯރުކޮށްދެއްވާފައިވާ ބޭފުޅެއް ކަމަށާއި، ވެރިކަމަށް ވަޑައިގަންނަވަނީ ވަރަށް ރަނގަޅު ތަސައްވަރަކާއި އެކުގައިކަމަށް އިލްހާމު ވިދާޅުވި އެވެ. 

ޤާސިމަށް ރިޔާސީ ޓިކެޓު ޖަލްސާއަކީ މިހާތަނަށް ސިޔާސީ ޕާޓީއަކުން ބާއްވާނެ އެންމެ ފުރިހަމަ އަދި ތަފާތު ޖަލްސާއަށް ވެގެންދާނެ ކަމަށާއި، އެ ޖަލްސާގައި ވަރަށް ތަފާތު ހަރަކާތްތައް ހިމަނާފައި ވާނެކަމަށް ޖުމްހޫރީ ޕާޓީން ވަނީ ބުނެފަ އެވެ.