ރާއްޖޭގައި އޮތް އެންމެ ބޮޑު ދެ ޕާޓީކަމަށްވާ ޕީޕީއެމްއާއި އެމްޑީޕީއަށް ވެރިކަން ކުރުމުގެ ފުރުސަތު ރައްޔިތުންނަށް ދެވިއްޖެކަމަށާއި، އަދި އެ ޕާޓީތަކުގެ ވެރިކަން ރައްޔިތުން ތަޖުރިބާ ވެސް ކޮށްފައިވާ ކަމަށާއި، މިހާރު ތަޖުރިބާ ނުކުރެވި އޮތީ ޖުމްހޫރީ ޕާޓީތަކަށް ވާތީ 2023 ވަނަ އަހަރުގެ ރިޔާސީ އިންތިޚާބުގައި ޖޭޕީއަށް ވޯޓުދެއްވާމިފަހަރު ޖުމްހޫރީ ޕާޓީއަށް ވެރިކަން ކުރުމުގެ ފުރުސަތު ދެއްވުމަށް އެ ޕާޓީގެ ރިޔާސީ ކެންޑިޑޭޓު ޤާސިމް އިބްރާހިމް އެދިވަޑައިގެންފި އެވެ.
ޤާސިމް މިފަދައިން އެދިވަޑައިގެންފައި ވަނީ ޖުމްހޫރީ ޕާޓީގެ ރިޔާސީ ޓިކެޓު އެމަނިކުފާނާއި ރަސްމީކޮށް ހަވާލުކުރި ޖަލްސާގައި ވާހަކަދައްކަވުން ނެވެ.
ޤާސިމް ވިދާޅުވީ ފެހި ޤާނޫނު އަސާސީ ވުޖޫދުވިފަހުން އުފެދުނު ކޮންމެ ވެރިކަމެއް ވެސް އުފެދުނީ ޖޭޕީގެ ހިއްސާއާއި އެކުގައި ކަމަށެވެ. އަދި ވެރިކަމަށް އައުމަށްޓަކައި، ޖޭޕީއާއެކު އެކި ސަރުކާރުތަކުން އެއްބަސްވުންތައް ހަދާކަމަށާއި، އެހެން ނަމަވެސް ވެރިކަމަށް ހޮވުމާއެކު ކޯލިޝަންގެ ބޭނުން ކަނޑުވާލާކަމީ ފެންނަމުންދާ ކަމެއްކަމަށް އެމަނިކުފާނު ވިދާޅުވި އެވެ.
އެކަން ފާހަގަކުރައްވާ ޤާސިމް ވިދާޅުވީ ކޯލިޝަން ހަދައިގެން ވެރިކަމަށް އަންނަ ސަރުކާރުތަކުން ކޯލިޝަން ރޫޅާލާ، ނުވަތަ ބާކީކޮށްލަމުން ދިޔަ ނަމަވެސް، ސަރުކާރަށް ޖެއްސުންކުރުމަށް ނުވަތަ ދަތިކުރުމަށް ޖުމްހޫރީ ޕާޓީން މަސައްކަތްކޮށްފައި ނުވާނެ ކަމަށެވެ. އަދި ސަރުކާރަށް ވާގިވެރިވާ ބައެއްގެ ގޮތުގައި ޖޭޕީ ދެމިއޮންނަނީ ރައްޔިތުންގެ ހައްގުގައި ކަމަށެވެ.
ޤާސިމް ވިދާޅުވީ ގައުމަށްޓަކައި، އަދި ރައްޔިތުންގެ ދިރިއުޅުން ތަނަވަސްކޮށް ފާގަތިކުރުމަށްޓަކައި ޖުމްހޫރީ ޕާޓީގެ އަމިއްލަ ވިސްނުންތަކާކާއި ތަސައްވުރެއް އޮންނަ ކަމަށެވެ.
ކޯލިޝަން ހަދައިގެން ވެރިކަމަށް އައުމަށްފަހު، އެ ތަސައްވުރުތަކާއި އެއްގޮތަށް މަސައްކަތްކުރުމުގެ ފަހި ފުރުސަތުތަކެއް ޖޭޕީއަށް މިހާތަނަށް ލިބިފައި ނުވާކަމަށާއި، ޖޭޕީގެ ވެރިކަމެއް މިހާތަނަށް ރައްޔިތުންނަށް ތަޖުރިބާކޮށްލަން ވެސް ލިބިފައި ނުވާއިރު، މި އަހަރުގައި އޮންނަ ރިޔާސީ އިންތިޚާބުގައި އެ ފުރުސަތު ދެއްވުމަށް ޤާސިމް ވަނީ އެދިވަޑައިގެންފަ އެވެ.
"ތިޔަ އިއްޒަތްތެރި ރައްޔިތުން ތިޔަ ވަނީ އެމްޑީޕީއާއި ޕީޕީއެމް ވެސް ތަޖުރިބާކޮށްފައި. ތިޔަ ބޭފުޅުންނަށް ޓެސްޓު ނުކުރެވި އޮތް ސިޔާސީ ފިކުރަކީ 2008 ގެ ފަހުން ރާއްޖޭގައި އުފެދުނު ސަރުކާރުތައް ވެރިކަމަށް ގެނައުމުގައި އެންމެ ބޮޑަށް އެހީތެރިވި ޖުމްހޫރީ ފިކުރު. އެހެންކަމުން ރައްޔިތުންގެ ކިބައިން ފެށިގެން އަންނަ ވެރިކަމުގެ މޫރިތިކަން ހަގީގީ މާނައިގައި ދެކެވަޑައިގަންނަވަން ބޭނުންފުޅުވާނަމަ އެ ފުރުސަތު އަޅުގަނޑަށާއި ޖުމްހޫރީ ޕާޓީއަށް ދެއްވުން ކީއްތޯ"
ޖޭޕީގެ ލީޑަރު ޤާސިމް އިބްރާހިމް
ޤާސިމު ވިދާޅުވީ އެމަނިކުފާނަށް ރައްޔިތުން އިތުބާރުކޮށް 2023 ވަނަ އަހަރުގެ ރިޔާސީ އިންތިޚާބުގައި ވޯޓުދެއްވާ ވެރިކަމަށް ހޮއްވަވައިފި ނަމަ ރައްޔިތުންނަށް އުފާވެރި ހިތްފަސޭހަ އަމާން މާހައުލެއް ގާއިމްކޮށްދިނުމަށް މަސައްކަތްޕުޅު ކުރައްވާނެކަމުގެ ޔަގީންކަން އަރުވާ ކަމަށެވެ.
އަދި އެމަނިކުފާނު އަބަދުވެސް އިސްކުރައްވާނީ ގައުމާއި ރައްޔިތުންގެ މަސްލަހަތު ކަމަށާއި، އެމަނިކުފާނަކީ ދައުލަތުގެ ބައި ރުިފޔާއެއްގައި ވެސް ޖެހިވަޑައިގަންނަވާނެ ބޭފުޅަކަށް ނުވާނެކަމަށް ޤާސިމް ވިދާޅުވި އެވެ.
Advertisement
This content is created and paid for by advertisers and does not involve Voice Journalists
