ކުރިއަށް އޮތް ރިޔާސީ އިންތިޚާބުގައި ޖުމްހޫރީ ޕާޓީން ރަސްމީކޮށް ބޭނުންކުރާނެ ރަސްމީ ސްލޯގަން "ހާސް ކަނޑާލާ، ހަމަޖެހޭނެ، ކުރިއަށް ދިވެހި ޤައުމު" ރަސްމީކޮށް އިފްތިތާހުކޮށްދެއްވައިފި އެވެ.
މި ސްލޯގަން އިފްތިތާހުކޮށްދެއްވީ ޖުމްހޫރީ ޕާޓީގެ ލީޑަރު އަދި ޕާޓީގެ ރިޔާސީ ކެންޑިޑޭޓު ޤާސިމް އިބްރާހިމަށް ރިޔާސީ ޓިކެޓު އެރުވުމަށް ބޭއްވި ޚާއްސަ ޖަލްސާގައި އެމަނިކުފާނެވެ.
މި ޖަލްސާގައި ރިޔާސީ އިންތިޚާބުގައި ޖޭޕީން ބޭނުން ކުރާނެ ރަސްމީ ސްލޯގަންގެ އިތުރުން ކެމްޕޭނުގެ ރަސްމީ ލަވަ ވެސް ވަނީ އިފްތިތާހުކޮށްދެއްވާފަ އެވެ.
ޤާސިމް އިބްރާހިމަށް ޖޭޕީގެ ރިޔާސީ ޓިކެޓު އަރުވާފައިވާއިރު، އެމަނިކުފާނު ވަނީ ޓިކެޓު ޤަބޫލުފުޅު ކުރައްވާފަ އެވެ. ޤާސިމަށް ޖޭޕީގެ ރިޔާސީ ޓިކެޓު ދިނުމަށް ނިންމާފައިވަނީ ޖޭޕީގެ ކައުންސިލްގެ ފުރިހަމަ އަގުލަބިއްޔަތުންނެވެ.
ރިޔާސީ ޓިކެޓު ޤާސިމަށް އެރުވި ޚާއްސަ ހަފްލާގައި ގިނަ ބަޔަކު ބައިވެރިވެވަޑައިގެންފައި ވާއިރު، ކުރިއަށް އޮތް ރިޔާސީ އިންތިޚާބުގައި ޖޭޕީއަށް ފުރުސަތު ދެއްވުމަށް ޤާސިމް ވަނީ އެދިވަޑައިގެންފަ އެވެ.
ޖުމްހޫރީ ޕާޓީއަކީ ފެހި ޤާނޫނު އަސާސީއަށްފަހު ރާއްޖޭގައި އުފެދުނު ކޮންމެ ވެރިކަމަކަށް އެއްބާރުލުން ދެމުން އައި ޕާޓީއެއް ކަމަށާއި، ރާއްޖޭގައި ތިންވަނައަށް އެންމެ މީހުން ގިނަ ޕާޓީއަށް ވެފައި، ތަޖުރިބާކާރުން ގިނަ ޕާޓީއަކަށް ވުމުން، މިފަހަރަކީ ޖޭޕީގެ ފަހަރުކަމުގައި ހައްދަވާ އެ ޕާޓީއަށް ރައްޔިތުން އިތުބާރުކުރެއްވުމަށް ވެސް ޤާސިމް ވަނީ އެދިވަޑައިގަންނަވާފަ އެވެ.
މިރޭގެ ޖަލްސާގައި ރިޔާސީ އިންތިޚާބަށް ޖޭޕީން ތައްޔާރުކޮށްފައިވާ މެނިފެސްޓޯގައި ހިމަނާފައިވާ ބައެއް މުހިންމު ކަންކަން ވެސް ވަނީ ހާމަކުރައްވާފަ އެވެ. އަދި ޤާސިމްގެ މުހިންމު ވައުދުތައް ވެސް ހިއްސާކުރައްވާފައި ވެއެވެ.
Advertisement
This content is created and paid for by advertisers and does not involve Voice Journalists
