ވެރިކަމަށް ހުވާކުރައްވާތާ ފުރަތަމަ 100 ދުވަސްތެރޭ މިހާރު ހިޔާ ފްލެޓުތަކުގައި ދިރިއުޅޭ ރައްޔިތުންނަށް ދިމާވެފައިވާ ހުރިހާ މައްސަލައެއް ޙައްލުކޮށްދެއްވާނެކަމަށް ޖުމްހޫރީ ޕާޓީގެ ރިޔާސީ ކެންޑިޑޭޓު ޤާސިމް އިބްރާހިމް ވިދާޅުވެއްޖެ އެވެ. 

ޖޭޕީގެ ރިޔާސީ ޓިކެޓު ޤާސިމް އިބްރާހިމަށް ޙަވާލުކުރުމަށް ބޭއްވި ހަލްފާގައި އެމަނިކުފާނު ވަނީ ރިޔާސީ އިންތިޚާބަށް ކުރިމަތިލައްވާއިރު، އެމަނިކުފާނުގެ ރިޔާސީ މެނިފެސްޓޯގައި ހިމެނޭ ބައެއް ކަންކަން ރައްޔިތުންނާއި ހިއްސާކުރައްވާފަ އެވެ. 

އެގޮތުން ޤާސިމް ވިދާޅުވީ ހިޔާ ފްލެޓުގައި ދިރިއުޅޭ ރައްޔިތުންނަށް ދިމާވެފައިވާ މައްސަލަތައް ޙައްލުކުރުމަކީ އެމަނިކުފާނުގެ ވެރިކަމުގައި ޚާއްސަ އަހަންމިއްޔަތުކަމެއް ދީގެން ކުރައްވާނެ މަސައްކަތެއް ކަމަށެވެ. 

Advertisement

ޤާސިމް ވިދާޅުވީ އެމަނިކުފާނުގެ ވެރިކަމެއްގައި ބޯހިޔާވަހިކަމުގެ މައްސަލަ ތަހަންމަލް ކުރަމުންދާ ރައްޔިތުންގެ ހާސްކަމާއި، އެ ރައްޔިތުންގެ އޮތް ނުތަވަސްކަން ފިލުވާ ދެއްވާނެކަމަށެވެ. 

ވެރިކަމުގެ ފުރަތަމަ ދައުރުގައި މަދުވެގެން 20000 ހައުސިން ޔުނިޓު އަޅުއްވާނެ ކަމަށާއި، އަދި ޓާގެޓުކުރައްވަނީ އެ އަދަދު 30000 އަށް ޖެއްސުމަށްކަމަށް އެމަނިކުފާނު ވިދާޅުވި އެވެ.