ޖުމްހޫރީ ޕާޓީގެ ވެރިކަމެއްގައި އެންމެ އިސްކަން ދެއްވާނީ އަރަބިއްޔާ ސުކޫލަށް ދިމާވެފައިވާ މައްސަލަތައް ޙައްލުކުރުމަށް ކަމަށް އެ ޕާޓީގެ ރިޔާސީ ކެންޑިޑޭޓު އަދި ޕާޓީގެ ލީޑަރު ޤާސިމް އިބްރާހިމް ވިދާޅުވެއްޖެ އެވެ. 

ޖުމްހޫރީ ޕާޓީގެ ރިޔާސީ ޓިކެޓު ޕާޓީގެ ކެންޑިޑޭޓު ޤާސިމް އިބްރާހިމަށް އެރުވުމަށް ބޭއްވި ޚާއްސަ ރަސްމިޔާތުގައި ވާހަކަދައްކަވަމުން ޤާސިމް ވިދާޅުވީ އެމަނިކުފާނުގެ ވެރިކަމެއްގައި އެންމެ އިސްކަމެއް ދެއްވާނެ ކަމަކީ ދިވެހިރާއްޖޭގައި އަރަބި އިސްލާމީ ތައުލީމު ކިޔވައިދޭ ހަމައެކަނި ސުކޫލުކަމަށްވާ އަރަބިއްޔާ ސުކޫލަށް މިހާރު ދިމާވެފައިވާ މައްސަލަތަކަށް ދާއިމީ ޙައްލެއް ހޯއްދަވާދެއްވުމަށެވެ. 

އަރަބިއްޔާ ސުކޫލުގެ އިމާރާތް މަރާމާތުނުކުރެވި ގިނަ ދުވަސްތަކެއް ވެގެންދިއުމާއި ގުޅިގެން އެ ސުލޫކުގެ އިމާރާތް މަރާމާތުނުކޮށް ކިޔަވައިދެމުން ދިއުމަކީ ދަރިވަރުންނަށް ރައްކާތެރިގޮތެއް ކަމަށް ނުފެންނާނީ ބެލެނިވެރިން މުޒާހަރާކޮށްގެން ކުދިން ވަނީ ވަގުތީ އިމާރާތަކަށް ބަދަލުކޮށްފަ އެވެ. އަދި ސުކޫލުގެ ދާއިމީ އިމާރާތް މި ދައުރުގައި ނިންމާނެކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ވަނީ ވައުދުވެވަޑައިގެންފަ އެވެ. 

Advertisement

އެހެން ނަމަވެސް މިހާތަނަށް އެ ސުކޫލުގެ އަމަލީ މަސައްކަތް ނިންމާފައެއް ނުވެއެވެ. އަދި އެ މަސައްކަތް ދާ ސްޕީޑާއި ގުޅިގެން ދައުރު ނިމެންވާއިރަށް ސުކޫލު އިމާރާތް ނިންމާލެވިދާނެ ކަމާމެދު ބެލެނިވެރިން ގެންދަނީ ސުވާލު އުފައްދަވަމުންނެވެ. 

މިހާރު އެ ސުކޫލުގެ ދަރިވަރުން ކިޔަވަމުންދަނީ ފޮރިން މިނިސްޓްރީގެ ވަގުތީ އިމާރާތުގައެވެ. އެތަނުގއި ދަރިވަރުން ކިޔަވަމުންދާއިރު އަސާސީ އެތައް ކަމަކުން ދަރިވަރުން މަހުރޫމުވެފައިވާކަން ބެލެނިވެރިން ދަނީ ފާހަގަކުރަމުން ނެވެ. އަދި އެކަން ޙައްލުކޮށްދިނުމަށް އެދި ބެލިވެރިން ވަނީ އެކިފަހަރުމަތިން އިހުތިޖާޖުވެސް ކޮށްފަ އެވެ. 

އޭގެ އިތުރުން އަރަބިއްޔާ ސުކޫލުގައި މޫނު ބުރުގާ އަޅައިގެން ކިޔަވަންދާ ދަރިވަރުންނަށް، މޫނު ބުރުގާނަގަން މަޖުބޫރުކުރުމާއި ސުކޫލުގައި ފުރައްސާރަކުރުންފަދަ އެތައް ކަމެއް ކުރިމަތިވަމުންދާކަން ބެލެނިވެރިން ގެންދަނީ ފާހަގަކުރަމުން ނެވެ. އަދި އެ ސުކޫލާއި އެހެން ސުކޫލުތަކާއި ތަފާތުކުރާ ކަމުގެ އެތައް ޝަކުވާއެއް ބެލެނިވެރިން ކުރަމުންދާކަން ވެސް ފާހަގަކޮށްލެވެއެވެ. 

ޓިކެޓު ޖަލްސާގައި ޤާސިމްގެ ވެރިކަމުގެ ތައުލީމީ ސިޔާސަތާއި ގުޅޭގޮތުން ވާހަކަދައްކަވަމުން ވިދާޅުވީ އެމަނިކުފާނުގެ ވެރިކަމުގައި އަރަބިއްޔާ ސުކޫލަށް ދިމާވެފައިވާ މައްސަލަތައް ހައްލުކުރުމަކީ އެންމެ އިސްކަން ދީގެން ކުރައްވާނެ މަސައްކަތް ކަމަށެވެ. 

ޤާސިމް ވިދާޅުވީ އެމަނިކުފާނުގެ ވެރިކަމުގައި ތައުލީމީ ސިޔާސަތަށް ވެސް ބޮޑު ބަދަލެއް ގެންނަވާނެ ކަމަށެވެ. އަދި ސުކޫލުތަކުން ކިޔަވައިގެން ނިކުންނަ ދަރިވަރުން މަސައްކަތުގެ މާހައުލަށް އަހުލުވެރި ކުރުވުމަށްޓަކައި ވެސް މުހިންމު ގިނަ މަސައްކަތްޕުޅުތަކެއް ކުރައްވާނެކަމަށް ޤާސިމް ވަނީ ވިދާޅުވެފަ އެވެ.