ވެރިކަމުގެ ފުރަތަމަ 5 އަހަރު ދުވަސްތެރޭ ދިވެހިރާއްޖޭގައި 100 މިލިއަނަރުން އުފައްދަދާދެއްވާނެކަމަށް ޖުމްހޫރީ ޕާޓީގެ ލީޑަރު އަދި އެ ޕާޓީގެ ރިޔާސީ ކެންޑިޑޭޓު ޤާސިމް އިބްރާހިމް ވައުދުވެވަޑައިގެންފި އެވެ. 

ރިޔާސީ އިންތިޚާބުގައި ޖުމްހޫރީ ޕާޓީން ވާދަކުރައްވާ އެ ޕާޓީގެ ކެންޑިޑޭޓު ޤާސިމް އިބްރާހިމަށް ރިޔާސީ ޓީކެޓު ހަވާލުކުރުމުގެ ޖަލްސާގައި ވާހަކަދައްކަވަމުން ޤާސިމް ވަނީ ކުދި އަދި މެދުފަންތީގެ ވިޔަފާރިތައް ފުޅާކުރުމަށް އެމަނިކުފާނު ގެންގުޅުއްވާ ތަސައްވަރާއި، އެކަމާއި ގުޅޭގޮތުން މެނިފެސްޓޯގައި ހުރި ބައެއް މުހިންމު ކަންކަން ހާމަކުރައްވާފަ އެވެ. 

ޤާސިމް ވިދާޅުވީ އެމަނިކުފާނުގެ ވެރިކަމުގައި ކުދި އަދި މެދުފަންތީގެ ވިޔަފާރިތަކަށް 3 ބިލިއަން ރުފިޔާ ހޭދަކޮށް، 500 ސްމޯލް ބިޒްނަސްމަނުން އުފައްދަވާނެކަމަށެވެ. އަދި ވެރިކަމުގެ ފުރަތަމަ ދައުރުގައި 100 މިލިއަނަރުން ރާއްޖޭގައި އުފައްދަވާދެއްވާނެ ކަމަށެވެ.

Advertisement

ސިޔާސީ މައިދާނުގައި އެތައް ދުވަހެއް ވަންދެން ހަރަކާތްތެރިވަމުން އައިސްފައިވި ނަމަވެސް ޤާސިމަކީ ރާއްޖޭގައި އުފެދުނު އެންމެ ސްމާޓު ބިޒްނަސްމޭން ކަމަށް ޖޭޕީގެ އެޑްވައިޒަރުން ގެންދަވަނީ ފާހަގަކުރައްވަމުން ނެވެ. 

އަމިއްލަ މަސައްކަތުން ޤާސިމް އޭނާގެ ވިޔަފާރި ކޮޅަށް ޖަހައި، މިހާތަނަށް އެ ވިޔަފާރިތައް ބަލަހައްޓަމުން ގެންދަވާ ގޮތަށް ތައުރީފު ހައްގުކަމަށާއި، އެމަނިކުފާނުގެ ހިންގުންތެރިކަމަށް ބަލާފައި ވެސް ވެރިކަމަށް ގެންނަން ރަނގަޅުކަމަށް ޖުމްހޫރީ ޕާޓީގެ އިސް ބޭފުޅުން ދަނީ ވިދާޅުވަމުން ނެވެ. 

އޭގެ އިތުރުން ޤާސިމަކީ އަބަދުވެސް މީހުން ބިނާކުރުމަށް މަސައްކަތްޕުޅު ކުރައްވާ ބޭފުޅެއް ކަމަށާއި، މީހުންގެ ބިނާކުރުމަށް ޚާއްސަ އިސްކަމެއް ދެއްވާ ބޭފުޅެއްގެ ގޮތުގައި ޖުމްހޫރީ ޕާޓީން ދަނީ ސިފަކުރަމުންނެވެ. 

ޤާސިމް އިބްރާހިމްގެ އިޤްތިޞާދީ ސިޔާސަތުގެ ދަށުން 100 މިލިއަނަރުން 5 އަހަރު ތެރޭ އުފެއްދުމަށް ވެލެއްވި ވައުދަކީ މިހާތަނަށް ސިޔާސީ ލީޑަރަކު ވީ އެންމެ ތަފާތު ވައުދުތަކަމަށް ގިނަ ބަޔަކު ދަނީ ފާހަގަކުރަމުން ނެވެ.