ޖުމްހޫރީ ޕާޓީގެ ވެރިކަމެއްގައި ދިވެހިރާއްޖޭގައި ތިބި 65 އަހަރުން މަތީގެ މީހުން (އިސް ރަށްވެހިންނަށް) ދޭ އިނާޔަތް 7000 ރުފިޔާއަށް ބޮޑުކުރާނެކަމަށް ޖޭޕީގެ ރިޔާސީ ކެންޑިޑޭޓު އަދި އެ ޕާޓީގެ ލީޑަރު ޤާސިމް އިބްރާހިމް ވިދާޅުވެއްޖެ އެވެ. 

ޤާސިމް މިފަދައިން ވިދާޅުވެފައިވަނީ 2023 ވަނަ އަހަރުގެ ރިޔާސީ އިންތިޚާބަށް ޖުމްހޫރީ ޕާޓީން އެކުލަވާލާފައިވާ މެނިފެސްޓޯގައި ހިމެނޭ ބައެއްކަންކަން ހިއްސާކުރައްވާ ޖޭޕީގެ ރިޔާސީ ޓިކެޓު ޤާސިމަށް އެރުވުމަށް ބޭއްވި ޖަލްސާގައި ވާހަކަދައްކަވަމުން ނެވެ. 

ޤާސިމްގެ މެނިފެސްޓޯގައި ޚާއްސަކުރެވިފައިވާ އެއް ދާއިރާއަކީ އިސް ރަށްވެހިންކަމަށް އޭނާ ވިދާޅުވި އެވެ. އަދި ވިދާޅުވީ އެމަނިކުފާނަށް ވެރިކަން ލިބިވަޑައިގެންފި ނަމަ އިސް ރަށްވެހިންނަށް ދޭ އެލަވަންސް 7000 ރުފިޔާއަށް ބޮޑުކުރައްވާނެ ކަމަށެވެ. 

ޤާސިމް ވިދާޅުވީ އެމަނިކުފާނަކީ ރައްޔިތުންނަށް ހުވަފެން ދައްކާނެ ބޭފުޅަކަށް ވެވަޑައި ނުގަންނަވާނެ ކަމަށެވެ. 

އިސް ރަށްވެހިންގެ އިތުރުން ސިއްހީ ދާއިރާއަށް ވެސް ހެޔޮ ބަދަލުތަކެއް ގެނައުމަށް މެނިފެސްޓޯގައި ހިމަނުއްވާފައިވާކަން ޤާސިމް ހާމަކުރެއްވި އެވެ. 

އެގޮތުން ޤާސިމް ވިދާޅުވީ ސްޕެލިސްޓު ޑޮކްޓަރަކަށް ނުދެއްކިގެން ކިޔުގައި ނުވަތަ ވެއިޓިންގައި މަޑުކުރަން ޖެހޭޖެހުން ނިމުމަކަށް ގެންނަވާނެ ކަމަށެވެ. އަދި ގިނަވެގެން 7 ދުވަސްތެރޭ ސްޕެޝަލިސްޓު ޑޮކްޓަރަށް ދެއްކޭނެ ގޮތަށް ރިފަރަލް ސިސްޓަމް ހަރުދަނާ ކުރައްވާނެ ކަމަށެވެ. 

އާސަންދައިގެ އިސްރާފު ކުޑަކޮށް، އާސަންދައަކީ ބޭސްފަރުވާއަށް ސަލާންޖަހާން ނުޖެހޭ ނަޒާހަތްތެރި ނިޒާމަކަށް ބަދަލުކުރައްވާނެކަމަށް ޤާސިމް ވަނީ ވިދާޅުވެފަ އެވެ. 

ޤާސިމް އިތުރަށް ވިދާޅުވީ ޖަލްސާގައި އެމަނިކުފާނު އިއުމާލުކުރެއްވި ކަންކަމުގެ އިތުރުން ވެސް ރައްޔިތުންނަށް މުހިންމު އެތައް ކަމެއް މެނިފެސްޓޯގައި ހިމަނާފައިވާނެ ކަމަށެވެ. އަދި އެ ވައުދުތައް ފުއްދުމަށް މިފަހަރު ޖޭޕީއަށް އިތުބާރުކޮށް އެމަނިކުފާނަށް ވޯޓުދެއްވުމަށް ޤާސިމް ވަނީ އެދިވަޑައިގެންފަ އެވެ.