ރައްޔިތުންގެ މަޖިލީސް ބަޔަކު ހައިކެޖު ކޮށްގެން އުޅޭ އުޅުން ނިމުމަކަށް ގެންނަން ޖެހޭކަމަށް މަޖިލީހުގެ މަރަދޫ ދާއިރާގެ މެމްބަރު އިބްރާހިމް ޝަރީފު (މަވޯޓާ) ވިދާޅުވެއްޖެ އެވެ. 

ޝަރީފު މިފަދައިން ވިދާޅުވެފައި ވަނީ މަޖިލީހުގެ ރައީސް މުޙައްމަދު ނަޝީދުގެ އިތުބާރު ނެތްކަމުގެ މައްސަލަ މަޖިލީހަށް ހުށައަޅާފައި ވަނިކޮށް ރިޔާސަތު ބަލަހައްޓަވަން އުޒުރުވެރިވާ ކަމަށް އެމަނިކުފާނު ވިދާޅުވުމާއި ގުޅިގެން ނުރުހުން ފާޅުކުރައްވާ ކުރެއްވި ޓްވީޓެއްގަ އެވެ. 

މަޖިލީހުގެ ރައީސްގެ އިތުބާރު ނެތްކަމުގެ މައްސަލަ އެމްޑީޕީގެ ޕާލަމެންޓްރީ ގުރޫޕުން ހުށައަޅާފައިވަނީ މަޖިލީހުގެ ނައިބުރައީސް އީވާ އަބްދުﷲ ގެ އިތުބާރު ނެތްކަމުގެ މައްސަލަ ވެސް މަޖިލީހަށް ހުށައަޅާ، އެ މައްސަލަ ވަކިގޮތަކަށް ނިންމުމުގެ ކުރިން ނެވެ. 

އަދި ނައިބު ރައީސް އީވާގެ އިތުބާރު ނެތްކަމުގެ މައްސަލަ ވަނީ ހޯދަ ދުވަހުގެ އެޖެންޑާއިން ވެސް އުނިކޮށްފަ އެވެ. 

އެކަމަށް އިޝާރާތްކުރައްވާ ޝަރީފު ވިދާޅުވީ އެއީ ކަނޑައެޅިގެން ގާނޫނާއި ޚިލާފަށް ކޮށްފައިވާ ކަމެއް ކަމަށެވެ. އެ މައްސަލައިގައި ބަހުސްކުރުމަށް އާންމު ކޮމެޓީއިން ވަގުތު ކަނޑަނާޅާއި އޮތްކަމަށް ވާނަމަ މަޖިލީހުގެ ތަޅުމުގައި އެކަމަށް ވަގުތު ކަނޑައެޅޭނަކަމަށް އޭނާ ވިދާޅުވި އެވެ. 

އީވާގެ އިތުބާރު ނެތްކަމުގެ މައްސަލަ އެޖެންޑާ ނުކުރުން ޝަރީފު ސިފަކުރެއްވީ ބަޔަކު މަޖިލީސް ހައިޖެކުކޮށްގެން އުޅޭތީ ކުރި ކަމެއްގެ ގޮތުގައެވެ. އަދި އެފަދައިން މަޖިލީސް ހައިޖެކު ކުރުން ނިމުމަކަށް ގެންނަން ޖެހޭކަމަށް ޝަރީފު ވިދާޅުވި އެވެ. 

އޭގެ އިތުރުން ޝަރީފު ވަނީ ނަޝީދަށް ވެސް ފާޑުވިދާޅުވެފަ އެވެ. 

އޭނާ ވިދާޅުވީ މަޖިލީހުގެ ރައީސްކަމުގެ މަގާމަކީ ބޭނުންވީމާ ޒިންމާތަކުން އެކަހެރިވެވޭގޮތަށް އޮތް މަގާމެއް ނޫން ކަމަށެވެ. 

މަޤާމުގެ މަސްއޫލިއްޔަތުތައް އަދާކުރުމަށް އުޒުރުވެރިވާނަމަ އެންމެ ރަނގަޅުވާނީ ރައްޔިތުންނަށް "މުސީބާތަކަށް" ވެވަޑއި ނުގެން ނަޝީދު އިސްތިއުފާދެއްވުންކަމަށް ޝަރީފު ވަނީ ވިދާޅުވެފަ އެވެ.