މިއަހަރުގެ ހައްޖުގެ އަޅުކަން އަދާކުރުމަށްޓަކައި ހައްޖާޖީން މިއަދު ފުރަން ފަށާތީވެ، ޓްރެފިކް ތޮއްޖެހުން ބޮޑުވާނެެ ކަމަށް ލަފާކޮށް މިކަމަށް ސަމާލު ވުމަށް ފުލުހުން އެދިއްޖެއެވެ.

އެގޮތުން މިކަމާއި ގުޅިގެން ފުލުހުން ކުރި ޓްވީޓެއްގައި ބުނެފައިވަނީ މިއަހަރު ހައްޖަށްދާ ގިނަ އަދަދެއްގެ ޙައްޖުވެރިން ފުރުމަށްޓަކައި މިއަދުން މި މަހު 19 އަށް ވެލާނާ އިންޓަރނޭޝަނަލް އެއާޕޯޓަށް ދިއުމަށް ހަމަޖެހިފައިވާތީ، އެއާޕޯޓުގައި ޓްރެފިކް ތޮއްޖެހުން ބޮޑުވާނެކަމަށް ބެލެވޭ ކަމަށެވެ.

އެހެންކަމުން އޮމާންކަމާއިއެކު ޓްރެފިކް ފްލޯ ކުރިއަށް ދާނެކަން ކަށަވަރުކުރުމަށް މި ދުވަސްތަކުގައި އިތުރު ފުލުހުން އެއާޕޯޓުގައި ހަރަކާތްތެރި ވަމުން ދާނެ ކަމަށެވެ.

Advertisement

މިއާއިއެކު އެކި ބޭނުންތަކުގައި އެއާޕޯޓުން ފުރަންދާ މީހުންނާއި ޙައްޖަށް ދިއުމަށްޓަކައި ފުރަންދާ މީހުންނަށްވެސް ޓްރެފިކް ތޮއްޖެހުމުގެ ސަބަބުން ލަސްތަކެއް ކުރިމަތިވުން އެއީ އެކަށީގެންވާ ކަމެއް ކަމަށް ފުލުހުން ދެކޭ ކަމަށް ވަނީ ފާހަގަކޮށްފައެވެ.

އެހެންކަމުން މި ދުވަސްތަކުގައި އެއާޕޯޓުން ފުރާ މީހުންނާއި ހައްޖުވެރިން ވަގުތު އޮއްވައި އެއާޕޯޓަށް ގޮސް ފުރުމުގެ އިންތިޒާމް ދުރާލާ ނިންމުމަށް ފުލުހުން ވަނީ އިލްތިމާސް ކޮށްފައެވެ.

އަދި މި ދުވަސްތަކުގައި ދަތުރުކުރާ މީހުންނަށް ކުރިމަތިވެދާނެ އުނދަގޫތައް ކުޑަކުރުމަށްޓަކައި ކުރެވެންހުރި ކަންކަން ފުލުހުންގެ އޮފިސަރުން ކުރަމުން ގެންދާނެ ކަމުގެ ޔަގީންކަން ވަނީ އަރުވާފައެވެ.

މީގެ އިތުރުން ފުލުހުން ވަނީ ޙައްޖުވެރިން ފުރުވުމަށްޓަކައި ވަޑައިގަންނަވާ ގާތްތިމާގެ މީހުންވެސް ފުލުހުންގެ އޮފިސަރުންގެ އިރުޝާދުތަކާ އެއްގޮތަށް އަމަލު ކުރެއްވުމަށް އެދި، މި އޮފިސަރުން ތިބޭނީ މި ބޭފުޅުންނަށް އެހީތެރިވެދީ، އަމާންކަމާއި އޮމާންކަމާއިއެކު ކަންކަން ކުރިއަށް ދާނެކަން ޔަގީންކުރުމަށްޓަކައި ކަމަށް ބުނެފައެވެ.

އަދި މިއަހަރު ރާއްޖެއިން ހައްޖަށް ފުރާ ހުރިހާ ޙައްޖުވެރިންނަށް މަބްރޫރު ޙައްޖަކަށް އެދުމާއިއެކު ފުލުހުން ވަނީ މިފަދަ ކަންކަމުގައި އާންމު ރައްޔިތުން ދެއްވާ އެއްބާރުލެއްވުމަށް ޝުކުރު ދަންނަވާފައެވެ.