ރައްޔިތުންގެ މަޖިލީހުގެ ފަރެސްމާތޮޑާ ދާއިރާގެ މެންބަރު ހުސައިން މުހައްމަދު ލަތީފް (ސެމްބެ) ގެ މޫނުގައި މަރާދޫ ދާއިރާގެ މެންބަރު އިބްރާހީމް ޝަރީފް (މަވޯޓާ) ޖެއްސެވި ކަމަށް ސެމްބެ ވިދާޅުވެއްޖެއެވެ. 

ރައްޔިތުންގެ މަޖިލީހުގެ މިއަދުގެ ޖަލްސާ ވެސް އެއްކޮށް ނިންމާލާފައިވަނީ އެއްވެސް މަސައްކަތެއް ނުކުރެވި ނިޒާމީ ނުކުތާ ނެންގެވުމާއި، އެކެއް އަނެކަކާ ދިމާއަށް އަވަގުރާނަ ގޮވުމާއި، ގަޔަށް ބޮލަށް އެރުމުގައެވެ. 

އެގޮތުން، ޖަލްސާގައި އެންމެ ފުރަތަަމަ މަސައްކަތަށް އޮތް، ކުއްލި މައްސަލަ ހުށަހެޅުންވެސް ކުރިއަށް ގެންދެވިފައިވާ ނުވާއިރު، އެކަން ކުރުމަށް ފުރުސަތު ނުލިބުނީ، އަމިއްލަ ބައެއް މެންބަރުން ނިޒާމީ ނުކުތާ ނަންގަވައި، ކޮމިޓީ އެކުލަވައި ލުމުގެ މަސައްކަތް މިއަދަށް އެޖެންޑާ ކުރުމުން އެކަމާއި ނުރުހުން ފާޅުކުރައްވަން ފެށި ހިސާބުންނެވެ. އެގޮތުން، މެދު ހެންވޭރު ދާއިރާގެ މެންބަރު އަލީ އާޒިމް ވާހަކަ ދައްކަވަމުން ދަނިކޮށް، އޭނާ އާއި ދިމާއަށް ފޭދޫ ދާއިރާގެ މެންބަރު މުހައްމަދު ނިހާދުވެސް އަވަގުރާނަ ގޮވި ކަމަށް އާޒިމް ވަނީ ވިދާޅުވެފަ އެވެ. 

އެއަށްފަހު، މަވޯޓާވެސް ނިޒާމީ ނުކުތާ ނަންގަވާ ވާހަކަދައްކަވަމުން ދަނިކޮށް، އޭނާގެ ފަހަތުން ގައްދޫ ދާއިރާގެ މެންބަރު ޗޯރު އިބުރޭއޭ ގޮވަމުން ދިޔައިރު ކައިރީގައި ހުންނަވައިގެން ސެމްބެވެސް ވަނީ އަޑުގަދަ ކުރައްވާފައެވެ. 

އެއާއެކު އޭނާ ސެމްބެގެ މޫނުމަތީގައި ޖަހާފައިވާ ކަމަށް ސެމްބެ ވަނީ ވިދާޅުވެފަ އެވެ. އެހެންނަމަވެސް، އެބައި މަޖިލީހުގެ ސްޓްރީމިންގ އިން ކަނޑާލާފައި ނުފެނުނު ނަމަވެސް އޭގެ ފަހުންވެސް ސެމްބެ ވަނީ އެކަމާއި ނުރުހުން ފާޅުކުރައްވައި އޭނާގެ އިމްތިޔާޒަށް އަރައިގެންފައިވާ ކަމަށް ވިދާޅުވެފައެވެ. 

ސެމްބެގެ ވާހަކަތަކާއި ގުޅިގެން މަޖިލީހުގެ ރިޔާސަތުގައި އިންނެވި ވިލިފުށި ދާއިރާގެ މެންބަރު ހަސަން އަފީފު ވަނީ އެ މައްސަލަ ކޮމިޓީއަށް ހުށަހެޅުއްވުމަށް އެދި ލައްވާފައެވެ.