އަދިވެސް މިއުޅެނީ ޖަޒީރާ ރާއްޖޭގެ މަންޒަރުތައް ސާފުނުވެގެން ކަމަށް މިސަރުކާރުގެ ކުރީގެ ހެލްތް މިނިސްޓަރ އަދި ޖުމްހޫރީ ޕާޓީގެ ލީޑަރު ޤާސިމް އިބްރާހިމްގެ ތަރުޖަމާނު ޢަބްދުالله އަމީން ވިދާޅުވެއްޖެއެވެ.

އަމީން މިހެން ވިދާޅުވީ ރޭ ބޭއްވުނު ޖުމްހޫރީ ޕާޓީގެ ކެމްޕޭނު ޖަލްސާގައި ވާހަކަ ދައްކަވަމުން ނެވެ.

އަމީންގެ ވާހަކައިގައި އޭނާ ވަނީ ރައީސް ޞާލިހުގެ މި ސަރުކާރަށް ވަރަށް ބޮޑަށް ފާޑުވިދާޅުވެފައެވެ. 

Advertisement

"އަނެއް ދިވެހިރާއްޖެ ކޮނޑު އަޅުއްވައިގެން ނުކުންނެވި ބޭފުޅުން އަނެއް ދިވެހިރާއްޖެއަށް ދިވެހިން ދެކުނު ހުވަފެންތަކާއިއެކީގަ ޤައުމާއި ރައްޔިތުން ގޮވައިގެން ދިޔައީ ދީނެއް މިއްލަތެއް ނެތް މުޅިން އެހެން ސަހަރަކަށް،  އެސަހަރުގެ މަސްތުގައި ޖެހި ގެއްލުމުގެ މަގުމަތީގައި ތިއްބާ ލިބުނު އުއްމީދުގެ ހުޅުކޮޅާއި އެކު ޤައުމު ހަށިފޮޅާލާނެ ކަމަށް ކުރި އުންމީދު ގޮސް ހުއްޓުނީ މިނިކާަރާއްޖެއަށް، އެރާއްޖޭގެ އަނިޔާވެރިކަމުގެ ކަސްތޮޅުން ނެއްޓުމަށްޓަކައި އެންމެން އެކުގައި ދުއްވައިގަތީ ޖަޒީރާ ރާއްޖެއަށް، އަދިވެސް އަޅުގަނޑުމެން މިއުޅެނީ ޖަޒީރާ ރާއްޖޭގެ މަންޒަރުތައް ސާފުނުވެގެން" އަމީން ވިދާޅުވިއެވެ.

އަހަރުތަކަކަށް ފަހު އަނެއްކާވެސް ރިޔާސީ އިންތިޚާބެއްގެ ތުންފަތްމައްޗަށް ހާޒިރުވެ މިތިބީ ރާއްޖޭގެ މުސްތަޤްބަލަށްޓަކައި އުމްމީދު ތަކެއް ކުރިއަށް ނެރެމުން އަދި ރާއްޖޭގެ ކަންތަތައް ކުރިއަށް އޮތް 5 އަހަރަށް ތަރުތީބުކޮށް ދިވެހިންގެ އުންމީދުތަކާއި ހުވަފެންތަކުގައި ކުލަ ޖެއްސުމުގެ ވަރުގަދަ ޢަޒުމުގައި ކަަމަށް އަމީން ވިދާޅުވިއެވެ.

އަމީން ވިދާޅުވީ ޤާސިމް ވެރިކަމަށް ކަުރިމަތިލައްވަގެން ހުންނެވީ ދިވެހިންގެ އެއުންމީދު ތަކާއި ހުވަފެންތަކުގައި ކުލަ ޖައްސައިދިނުމަށް، ވަރުގަދަ ޢަޒުމް ތަކަކާއި ވަޢުދުތަކަކާއި އެކުގައި ކަމަށެވެ.

ދިވެހި ޤާނޫނު އަސާސީ ހެދިގެން އެއަށް ޢަމަލު ކުރާތާ 15 އަހަރު ވެގެން ދިޔައިރުވެސް އަދިވެސް ދައްކަން މިޖެހެނީ މީގެ 15 އަހަރުކުރިން ކުރި އުންމީދު ތަކުގެ ވާހަކަ ކަމަށާއި މިއަދުވެސް އިހްސާސް ކުރަން ޖެހެނީ މީގެ 15 ވަރަކަށް އަހަރުކުރިން ކުރަމުން އައި ބައެއް އިހްސާސްތަކުގެ ޖަޒްބާތު ކަމަށް އޭނާ ވިދާޅުވިއެވެ.

"އަޅުގަނޑުމެން މިމައިދާނަށް އެއްވެ ސިޔާސީ ވާހަކަ ދައްކައި ވައުދުތައްވެ ވާހަކަ ދައްކަން މިޖެހެނީ ދިވެހިރައްޔިތުން ކުރި އުއްމީދުތައް ހަޤީޤަތަކަށް އަދިވެސް ނުވާތީ،
އަނެއް ދިވެހިރާއްޖެއަށް ނުދެވި، ޖަޒީރާ ރާއްޖެ ނުފެނި ފުސްކަމެއްގައި އުޅެން ޖެހުމުން" އަމީން ވިދާޅުވިއެވެ.

އަމީން ވިދާޅުވީ ވަރަށްގިނަ ތަޖުރިބާ ތަކެއް ކުރެވި ވަރަށް ގިނަ ކަންތައްތަކެއް ތަންފީޒުކުރެވުނު ވާހަކަތަކެއް އެބަދެކެވޭ ކަމަށެވެ.

"އެހެންނަމަވެސް ހާސްކަމެއް ނުފިލާ، ފިނިކަމެއް ނުލިބޭ، މަސްތުގެ ހާލަތުން އަރައެއް ނުގަނެވޭ، ކުށްމަދު މުޖްތަމަޢެއް ނުފެނޭ، ކުލުނުވެރި މުޖްތަމަޢަކަށް ނުދެވޭ، އެހެންވީމާ އަޅުގަނޑުމެންނަށް މިދެވެނީ ރަނގަޅު މަގަކުން ކަން ދެންނެވޭކަށްނެތް" އަމީން ވިދާޅުވިއެވެ.

އަމީން ވިދާޅުވީ ޖޭޕީގެ މެނިފެސްޓޯ އަދި ހާމަނުކުރި ނަަމަވެސް އެ މެނިފެސްޓޯގައި ހުރި ވައުދުތަކަކީ ރައްޔިތުންނަށް އުންމީދީ ވައުދުތަކަކަށްވާނެ ކަމަށެވެ.

ޖުމްހޫރީ ޕާޓީގެ ފަަރާތުން ޤާސިމް އިބްރާހިމަށް ރިޔާސީ ޓިކެޓަ އަރުވައި ކެމްޕޭނުގެ މަސައްކަތްތައް މިހާރު މަޑުމަޑުން ގެންދަން ވަނީ ފަށައިފައެވެ.