ކ. ވާވެއްދިފަޅާ ގުޅިގެން ވިލާ ކުންފުނިން އެއްވެސް މުޢާމަލާތެއް ނުހިންގުމަށް އޭސީސީ އިން ވިލާ ކުންފުންޏަށް އެންގީ އެ ކުންފުނީގެ ޗެއަރ އަދި ޖުމްހޫރީ ޕާޓީގެ ރިޔާސީ ކެންޑިޑޭޓް ގާސިމް އިބްރާހިމްގެ ކެންޕެއިނަށް ހުރަސްއެޅުއްވުމަށް ކަމަށް ދާދިފަހުން ޖުމްހޫރީ ޕާޓީ އާއި ގުޅިވަޑައިގެންނެވި ކްރިމިނަލް ކޯޓުގެ ކުރީގެ އިސް ގާޒީ އަހުމަދު ހައިލަމް ވިދާޅުވެއްޖެއެވެ.

ޓޫރިޒަމް މިނިސްޓްރީން ދޫކުރި ބޭނުމާ އެއްގޮތަށް މަސައްކަތް ކުރިއަށް ނުދާ ކަމަށް ބުނެ ވާވެއްދި ފަޅު ވިލާ ކުންފުނީގެ އަތުން އަތުލީ ކުރީގެ ރައީސް އަބްދުالله ޔާމީންގެ ވެރިކަމުގައި 2015 ގައެވެ.  އޭރު އަތުލި ތަންތަނުގެ ތެރޭގައި ވާވެއްދި ފަޅާއި ކ. ބޮލިދިއްފަރާއި ރ. މާނެންފުއްޓާއި ގދ. ގަޒީރާ އާއި ކ. މާދިއްގަރުފަޅު ހިމެނެއެވެ. ނަމަވެސް މި މައްސަލައިގައި ސަރުކާރުން އެއްބަސްވުން އުވާލީ ގާނޫނާ ހިލާފަށް ކަމަށް ބުނެ ސުޕްރީމް ކޯޓުން ވަނީ އެ މައްސަލަ ވިލާއާ އެއްކޮޅަށް ފަހުން ނިންމައިފައެވެ.

އެފަދައިން ކަން ހިނގާފައިވަނިކޮށް، ވާވެއްދިފަޅާއި ގުޅިގެން އެއްވެސް މުޢާމަލާތެއް ނުހިންގުމަށް ދާދިފަހުން އެންޓި-ކޮރަޕްޝަން ކޮމިޝަނުން ވިލާ އަށް ވަނީ އަންގާފައެވެ. 

Advertisement

އެކަމާއި ގުޅިގެން ކްރިމިނަލް ކޯޓުން އެ މައްސަލައިގައި ނިންމި ނިންމުމުގެ ފޮޓޯއަކާއި އެކު ހައިލަމް ކުރެއްވި ޓްވީޓެއްގައި ވިދާޅުވީ، ވާވެއްދިފަޅު ކުއްޔަށް ދިނުމަށްޓަކައި ދައުލަތުން ވިލާ ކުންފުންޏާއެކު ވެފައިވާ އެއްބަސްވުމަށް އިޙްތިރާމްކޮށް، އެއްބަސްވުމާ އެއްގޮތަށް ޢަމަލުކުރުމަށް ދައުލަތުގެ މައްޗަށް 18 އެޕްރީލް 2018 ވަނަ ދުވަހު ސުޕްރީމް ކޯޓުން ޙުކުމް ކޮށްފައިވާ ކަމަށެވެ.

އަދި އެފަޅާއި ގުޅިގެން ވިލާ ކުންފުނިން އެއްވެސް މުޢާމަލާތެއް ނުހިންގުމަށް އޭސީސީ އިން ވިލާ ކުންފުންޏަށް އަންގާފައިވަނީ، ވާވެއްދިފަޅު، ވިލާ ކުންފުންޏަށް ކުއްޔަށްދިނުމުގައި ކޮރަޕްޝަންގެ ކުށެއް އެކުލެވިގެންނުވާކަމަށް އޮކްޓޫބަރު 2018 ގައި އޭސީސީން ނިންމާފައިވަނިކޮށްކަންވެސް ހައިލަމް ފާހަގަ ކުރެއްވިއެވެ.

އަދި އެކަން ކޮށްފައިވަނީ ޤާސިމް އިބްރާހީމް 2023 ވަނަ އަހަރުގެ ރިޔާސީ އިންތީޚާބަށް ކުރިމަތިލައްވާނެކަން އިޢުލާންކުރެއްވުމުން އެމަނިކުފާނުގެ ކެމްޕެއިނަށް ހުރަސްއެޅުމުގެގޮތުން ސަރުކާރުން ވާގިވެރިވެގެން ކަމަށްވެސް އޭނާ ވިދާޅުވި އެވެ. 

"ޖޭޕީގެ ލީޑަރު އޮނަރަބަލް ޤާސިމް އިބްރާހީމް 2023 ވަނަ އަހަރުގެ ރިޔާސީ އިންތީޚާބަށް ކުރިމަތިލައްވާނެކަން އިޢުލާންކުރެއްވުމުން އެމަނިކުފާނުގެ ކެމްޕެއިނަށް ހުރަސްއެޅުމުގެގޮތުން ސަރުކާރުން ވާގިވެރިވެ އަދި ދައުލަތުގެ މުއައްސަސާތަކަށް ނުފޫޒު ފޯރުވައިގެން ހިންގާ ހުތުރުކަންބޮޑު ސިޔާސީ މި ފިނޑިޢަމަލު ޖުމްހޫރީ ޕާޓީގެ ފަރާތުން ހަރުކަށި އިބާރާތުން ކުށްވެރިކުރަމެވެ." ހައިލަމް ވިދާޅުވިއެެވެ.