ބިރުދައްކައިގެން ނުވަތަ ޖެއްސުން ކޮށްގެން "ދަ ޑިމޮކްރެޓްސް" އުފެއްދުން ނުހުއްޓުވޭނެކަމަށް އެމްޑީޕީން ވަކިވެވަޑައިގެންނެވި އިރު އެ ޕާޓީގެ ނައިބު ރައީސްގެ މަޤާމުގައި ހުންނެވި އަހުމަދު ޝިފާޒު ވިދާޅުވެއްޖެ އެވެ.
ޝިފާޒު މިފަދައިން ވިދާޅުވެފައިވަނީ ރޭ ދަ ޑިމޮކްރެޓްސްއިން ބޭއްވި ހަރުގެ ޖަލްސާގައި ވާހަކަދައްކަވަމުން ނެވެ.
ޝިފާޒު ވިދާޅުވީ އެމްޑީޕީން ވަކިވި ފަރާތްތަކުން އުފައްދަން މަސައްކަތް ކުރާ ސިޔާސީ ޕާޓީ ރަޖިސްޓާކޮށް ނުދިނުމަށް އިލެކްޝަން ކޮމިޝަނުން ބަހަނާތައް ދައްކަމުންދަނީ އެމީހުންނަށް ސަރުކާރުން އަދި ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ޕްރެޝާކޮށްގެން ކަމަށެވެ.
"އިއްޔެ ރައީސުލްޖުމްހޫރިއްޔާ ނިންމައިފި އެބޭފުޅާއަށް ހެދެން އޮތް އެންމެ ބޮޑު އުނދަގުލެއް، ކުރެވެން އޮތް އެންމެ ބޮޑު ދުއްތުރާލެއް މިކަމަށް ކުރަން. އިންތިޚާބަކަށް ދެމަސް ދުވަހަކަށް ވެފައި އޮއްވާ ހައެއްކަ ރަށުގައި ނެގި ބައި އިލެކްޝަނެއް އެ އޮތީ ބޮޑުތަނުން ބަލިވެފައި. ދެން އޭނަގެ (ރައީސްގެ) މިޒާޖު އެނގޭ މީހަކަށް ވާތީ މި ދަންނަވަނީ ވަރަށް ހިތުގަ ޖެހޭނެ، ހަމަ ވަރަށް ރުޅިގަދަވާނެ... ދެން ކީކޭ އަޅުގަނޑު ދަންނަވާނީ ބަލިވީއޭ ހަމަ... ދެން އެ ރުޅިވެރިކަން އަޅުގަނޑުމެންގެ މައްޗަށް ބާލަންވީ ސަބަބެއް ހަގީގަތުގައި ނެތް، އެހެން ނަމަވެސް އެއީ އޭނާ"
އެމްޑީޕީގެ ކުރީގެ ނައިބު ރައީސް ޝިފާޒު
ޝިފާޒު ވިދާޅުވީ އިންތިޒާމުވެގެން ސިޔާސީ ހަރަކާތްތައް ހިންގުމަށް، ސިޔާސީ ޕާޓީއެއް އެ ބޭފުޅުން އެންމެ ފުރަތަމަ ދުވަހު ވެސް އުފެއްދީ ވަރަށް ގިނަ ގޮންޖެހުންތަކުގެ ތެރެއިން ކަމަށެވެ.
މިއަދު އެމްޑީޕީގެ އިސް ސަފުގައި ތިއްބެވި ފޮރިން މިނިސްޓަރު އަބްދުالله ޝާހިދުމެން ފަދަ ބޭބޭފުޅުންނަށް އެމްޑީޕީ އުފައްދަން ކުރި ބުރަ މަސައްކަތް އިހުސާސް ވެސް ނުކުރެވޭނެ ކަމަށާއި، ޝާހިދުމެންނަކީ އެ ދުވަހު އެމްޑީޕީ އުފެއްދުމަށް އެންމެ ބޮޑަށް ހުރަސްއަޅަމުން ދިޔަ މީހުންކަމަށް ޝިފާޒު ވިދާޅުވި އެވެ.
އެއާއެކު އޭނާ ވިދާޅުވީ، ޑިމޮކްރެޓްސް އުފައްދަން ނިކުމެ ތިބީ އެމްޑީޕީ އުފެއްދުމަށް މަގުމަތީގައި ގުރުބާންވި މީހުން ކަމަށެވެ. އެހެންކަމުން، އެހާ އަވަހަށް ފަހަތަށް ޖެހި، ބިރުގަންނާނެ ބަޔަކަށް އެމީހުން ނުވާނެކަން ސަރުކާރަށް ވެސް އަދި ފޮރިން މިނިސްޓަރަށް ވެސް އެނގިވަޑައިގަންނަވަން ވާނެކަމަށް އޭނާ ވިދާޅުވި އެވެ.
" ސާފުވާންވީ އެއްޗަކީ އޭރުގައި ވެސް މިނިސްޓަރު ޝާހިދަކަށް ނުހުއްޓުވުނު. ދެން މިއަދު ވަކި ހިފެހެއްޓޭނެކަަމަށް އެހެން ދެކިގެން ނުވާނެ. އަޅުގަނޑުމެން ސާފުކޮށް މި ދަންނަވަނީ، މި ރާއްޖެއަކު އެއް، މި ރާއްޖޭގެ ސަރުކާރެއްގައެއް، ސަރުކާރެއްގެ ތެރޭގައި ނުލިބޭ ވަކި އިތުރު އަނިޔާއެއް ކުރިމަތިނުވާ އުނދަގުލެއް ނުލާ ޖަލެއް، ނުޖެހޭ ކަރުނަ ގޭހެއް މިއިން އެއްވެސް މީހެއް ނުހުންނާނެ"
އެމްޑީޕީގެ ކުރީގެ ނައިބު ރައީސް ޝިފާޒު
އެކަން ކަން ފާހަގަކޮށް ޝިފާޒު ވިދާޅުވީ ދަ ޑިމޮކްރެޓްސް ދާދި އަވަހަށް އުފައްދާނެ ކަމަށެވެ. އަދި އެ ޕާޓީ ނިކުމެ މި ސަރުކާރު ޖަވާބުދާރީ ކުރުވާނެ ކަމަށާއި، ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހަށް ވެރިކަމުގެ ދެވަނަ ދައުރެއް ނުދޭނެކަމަށް ޝިފާޒު ވަނީ ތަކުރާރުކޮށް ވިދާޅުވެފަ އެވެ.
Advertisement
This content is created and paid for by advertisers and does not involve Voice Journalists
