ސިފައިންނަށް ހާއްސަކޮށްގެން ހުޅުމާލޭގައި އިމާރާތް ކުރަމުން އަންނަ "ސިފްކޯ ހިޔާ"އަށް އަންނަ މަހު ވަދެވޭނެ ކަމަށް ޑިފެންސް މިނިސްޓަރު މާރިޔާ އަހުމަދު ދީދީ ވިދާޅުވެއްޖެއެވެ.

ސިފައިންގެ 131 ވަނަ އަހަރީ ދުވަހުގެ ޖަލްސާގައި ވާހަަކަދައްކަވަމުން މާރިޔާ ވިދާޅުވީ މި ސަރުކާރު ވެރިކަމަށް އައި އިރު ސިފްކޯ ހިޔާ އޮތި "ކޮންކްރީޓް ސްޓްރަކްޗަރ" އެއްހެން ކަމަށެވެ. ނަމަވެސް އެ މަސައްކަތަށް މި ސަރުކާރުން ބޮޑު ހޭދައެއް ކޮށް، މިއަންނަ މަހުގެ ނިޔަލަށް އާއިލާތަކަށް ވަދެވޭ ވަރު ވާނެ ކަމުގެ ޔަގީންކަން ސިފްކޯ އިން ދީފައިވާ ކަމަށްވެސް މާރިޔާ ވިދާޅުވި އެވެ.

މިއާއެކު މާރިޔާ ވިދާޅުވީ، ސިފްކޯ ހިޔާގެ މަސައްކަތް ނިމިގެންދަނީ ސީދާ ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު އެކަމަށް ދެއްވާ އަހަންމިއްޔަތުކަމުގެ ސަބަބުންކަމަށް މިނިސްޓަރު ވިދާޅުވިއެވެ.

"ސިފްކޯ ހިޔާގެ މަސައްކަތް މި ނިމެނީ، ސީދާ ރައީސް އިބްރާހިމް މުހައްމަދު ސޯލިޙް އެކަމަށް ދެއްވާ އަހަންމިއްޔަތުކަމުގެ ސަބަބުންކަން އަޅުގަނޑު ފާހަގަކޮށް، ހުރިހާ ސިފައިންގެ ނަމުގައި އެމަނިކުފާނަށް ޝުކުރު ދަންނަވަން." މާރިޔާ ވިދާޅުވިއެވެ.

ސިފައިންނާއި ސިފައިންގެ އާއިލާތަކަށް ބޯހިޔާވަހިކަން ފޯރުކޮށްދިނުމަށްޓަކައި ސިފްކޯހިޔާގެ ނަމުގައި ބިންގާ އެޅިގެންދިޔަ 330 ފްލެޓުގެ އަމަލީ މަސައްކަތް ފަށާފައިވަނީ 2013 ސެޕްޓެމްބަރު މަހުގެ 02 ވަނަ ދުވަހުއެވެ.

އެ މަސައްކަތް ޑިފެންސް މިނިސްޓްރީން އޭރު ހަވާލުކުރީ ނޫމަޑި ރިސޯޓު އެންޑް ރެޒިޑެންސްއާއެވެ. ނަމަވެސް އެއްބަސްވުމާ އެއްގޮތަށް މަސައްކަތް ނުކުރާތީ އާއި މަޝްރޫއުގެ ސްޕީޑް ލަސްވާތީ އެއްބަސްވުން ބާތިލް ކުރިއެވެ.

އޭގެ ފަހުން އެ މަޝްރޫއު ހިންގީ އައިލެންޑް އެކްސްޕާޓް ނަމަކަށް ކިޔާ ކުންފުންޏަކުންނެވެ. އެކަމަކު ކޮވިޑާ އެކު ކުންފުނި ބަނގުރޫޓުވެ، މުވައްޒަފުންނަށް މުސާރަ ނުދެވުމުން އެ މަސައްކަތް ކުރިއަކަށް ނުދިޔައެވެ.

އެހެންވެ، ސިފައިންގެ ފްލެޓްތައް ނިންމަން އެންމެ ފަހުން ހަވާލު ކުރީ ޗައިނާގެ "ދަ ޓްވެންޓީ ތާޑް މެޓަލުޖިކަލް ކޮންސްޓްރަކްޝަން ގްރޫޕް"އާ އެވެ.

ސިފްކޯހިޔާގައި ހިމެނެނީ ސޯޝަލް ހައުސިންގ ޔުނިޓްތަކަށްވުރެ ލަގްޜަރީ ފެންވަރުގެ، 3 ކޮޓަރީގެ އެޕާޓްމަންޓްތަކެވެ. 3 ޓަވަރު ހިމެނޭގޮތަށް އިމާރާތްކުރާ މި ފްލެޓްތަކުގެ ކޮންމެ އެޕާޓްމެންޓެއްގައިވެސް 900 އަކަފޫޓު ހުރެއެވެ. ސިފައިންގެ ތިން ޓަވަރުގައި ތިން ކޮޓަރީގެ 330 ފްލެޓު، އަދި 20 ޕެންޓް ހައުސް ހުންނާނެކަމަށް ކުރިން ބުނެފައިވެއެވެ. މި މަސައްކަތް ނިމޭއިރު ހުންނާނެ ގޮތުގެ "މޮކަޕް ރޫމެއް" ފްލެޓްތައް ލިބޭ މީހުންނަށް މިދިޔަ އަހަރު ދައްކާލާފައިވެއެވެ.