ކޯވިޑް-19 ގެ ދަތި ދުވަސްވަރު ޖުމްހޫރީ ޕާޓީގެ ލީޑަރު އަދި އެ ޕާޓީގެ ރިޔާސީ ކެންޑިޑޭޓު ޤާސިމް އިބްރާހިމްގެ އަތްޕުޅުގައި މީހަކަށް ދިއްކޮށްލާނެ އެއްޗެއް ނެތިގެން އެމަނިކުފާނު ހުންނެވީ ވަރަށް ބޮޑަށް ލަދުފުޅުން ކަމަށް ޖުމްހޫރީ ޕާޓީގެ ސެކެޓްރީ ޖެނެރަލް އަލީ އާރިފް ވިދާޅުވެއްޖެ އެވެ. 

އަލީ އާރިފް މިފަދައިން ވިދާޅުވެފައިވަނީ ޤާސިމްގެ ދީލަތި ކަމާއި ގުޅޭގޮތުން ޖުމްހޫރީ ޕާޓީން ރޭ ބޭއްވި ކެމްޕޭނު ޖަލްސާގައި ވާހަކަދައްކަވަމުން ނެވެ. 

އާރިފު ވިދާޅުވީ ކޯވިޑް-19 ގެ ދުވަސްވަރު މުޅި ގައުމު ބަންދުވެފައި އޮތް އިރު، ޤާސިމް އިބްރާހިމާއި، އޭނާގެ ވިޔަފާރިތައް ވެސް އޮތީ ބަންދުވެފައި ކަމަށެވެ. 

އެހެންކަމުން، ޤާސިމު އިބްރާހިމް ހުންނެވީ އެ ހާލަތުގައި މީހަކަށް ދިއްކޮށްލާނެ އެއްޗެއް އެމަނިކުފާނުގެ އަތްޕުޅުގައި ނެތީމަ ވަރަށް ބޮޑަށް ދެރަފުޅުވެ ލަދުފުޅުގެންފައި ކަމަށް އާރިފު ވިދާޅުވި އެވެ. 

ޖޭޕީގެ އެސްޖީ އަލީ އާރިފް 

އާރިފް ވިދާޅުވީ ޤާސިމްގެ އެ ވާހަކަފުޅު އަޑުއައްސަވާ އޭނާ ވަރަށް ބޮޑަށް ހައިރާންވެވަޑައިގެން ކަމަށެވެ. 

އެހެން ލީޑަރުން އަބަދުވެސް މަސައްކަތްޕުޅު ކުރައްވަނީ ރައްޔިތުންނަށް ފިލަން ކަމަށާއި، އެހެން ނަމަވެސް ޤާސިމް އިބްރާހިމް ރައްޔިތަކަށް ދިއްކޮށްލާނެ އެއްޗެއް އެމަނިކުފާނުގެ އަތްޕުޅުގައި ނެތިގެން އެކަމާއި ކަންބޮޑުވެވަޑައިގެން އުޅުއްވާތީ، ވަރަށް ބޮޑަށް ހައިރާންވެވަޑައިގެން ކަމަށް އަލީ އާރިފް ވިދާޅުވި އެވެ. 

ޖޭޕީގެ އެސްޖީ އަލީ އާރިފް 

އަލީ އާރިފް ވިދާޅުވީ ރިޔާސީ އިންތިޚާބުގައި ޤާސިމް ވާދަކުރައްވާނެކަން އިއުލާނުކުރައްވާ ރަސްމީކޮށް އެމަނިކުފާނަށް ޓިކެޓު އެރުވި ހިސާބުން އެމަނިކުފާނަށް ބޮޑެތި ފިއްތުންތައް ކުރިމަތިކުރުވަމުން އަންނަ ކަމަށެވެ. 

އެހެން ނަމަވެސް މިފަހަރު ޖުމްހޫރީ ޕާޓީ އޮތީ ފިއްތުންތަކަށް ބަލައިގެން ފަހަތަށް ޖެހޭ ގޮތަށް ނޫން ކަމަށާއި، ރައްޔިތުން ތިބީ ޤާސިމް އިބްރާހިމްގެ ފަހަތްޕުޅުގައި ކަން ޔަގީން ކުރެވޭތީ މި އިންތިޚާބު އެމަނިކުފާނު ކާމިޔާބު ކުރައްވާނެކަމަށް އަލީ އާރިފް ވިދާޅުވި އެވެ.