އިދިކޮޅު ކޯލިޝަންގެ މެމްބަރުންގެ މަޖިލިސްް ގޮނޑިތައް ތަޅުމުން ނެރެ އެ ގޮނޑިތައް ރައީސް އޮފީހަށް ގެންދިޔުމަށް މަސައްކަތްކޮށްފިއެވެ.
އެގޮތުން ރައީސުލްޖުމްހޫރިއްޔާ މުހައްމަދު ޞާލިހުއަށް ދައްކާލެއްވުމަށް ފަރެސްމާތޮޑާ ދާއިރާގެ މެމްބަރު ހުސައިން މުހައްމަދު ލަތީފުގެ މަޖިލިސް ގޮނޑި ހިފައިގެން ރައީސް އޮފީހަށް ދިޔުމަށްް މަޖިލީހުގެ ގޭޓުން ނިކުންނަވަން މަސައްކަތް ކުރެއްވުމުން ސެކިއުރިޓީއިން ވަނީ މިކަމަށް ހުރަސް އަޅާފައެވެ.
"މިއީ ރައްޔިތުންގެ ގޮނޑިއެއް. 5000 މެމްބަރުންގެ ދާއިރާގެ ގޮނޑިއެއް މިއީ. މި ގޮނޑި މިއޮތީ ހުއްޓިފަ. މި ގޮނޑި އަޅުގަނޑު ބޭނުން ރައީސް އާއި ހަމައަށް ގެންދަން."
ލަތީފް ވިދާޅުވިއެވެ.
ލަތީފު އިތުރަށް ވިދާޅުވީ ރައީސުލްޖުމްހޫރިއްޔާއަށް އެ ކުރެއްވެނީ ގާނޫނީ ގޮތުން ކިހާ ބޮޑު ކުުށެއްކަން ހާމަ ކޮށްދޭން ބޭނުންވާ ކަމަށެވެ.
އެހެންކަމުން ލަތީފްގެ ގޮނޑި މަޖިލީހުގެ ދޮރުން ނެރެދިނުމަށް މަޖިލީހުގެ ދޮރު ހުޅުވުމަށް ސެކިއުރިޓީއަށް ދެންނެވުމަށް އޭނާ ވަނީ ޑިފެންސް މިނިސްޓަރ މާރިޔާގެ އަރިހުން އެދިވަޑައިގެންފައެވެ.
އިދިކޮޅު ޕީޕީއެމް އަދި ޕީއެންސީގެ ކޯލިޝަންގެ މެމްބަރުންވަނީ ރައްޔިތުންގެ މަޖިލީހުގެ މަސައްކަތްތައް ހުއްޓިފައިވާތީ އެކަމާ ކަންބޮޑުވުން ފާޅުކޮށް ރައްޔިތުންގެ މަޖިލީހުގެ ރައީސް މުޙައްމަދު ނަޝީދުއާއި މިއަދު ބައްދަލުކުރައްވައިފައެވެ.
އަދި ޖެހިޖެހިގެން ހަފްތާއެއް ވަންދެން ކޮންމެ ދުވަހަކު ރައީސް ޞާލިހުއާއި ބައްދަލުކުރެއްވުމަށް ކަމަށް ވިދާޅުވެ ރައީސް އޮފީހަށް ވެސް އިދިކޮޅު ވަނީ ވަޑައިގަންވާފައެވެ.
Advertisement
This content is created and paid for by advertisers and does not involve Voice Journalists
