ކުރީގެ ކައުންސިލް މެންބަރުން ހިމެނޭގޮތަށް ޖުމްހޫރީ ޕާޓީ (ޖޭޕީ)ގެ ކުރީގެ ގިނަ މެންބަރުންތަކެއް މިއަދު އެމްޑީޕީ އަށް ސޮއި ކުރައްވައިފިއެެވެ.

އެކަން އާއްމު ކުރައްވާ އެމްޑީޕީން ކުރި ޓުވީޓެއްގައި ވަނީ އެ މެމްބަރުންނަށް މަރުހަބާ ކިޔާފައެވެ.

ޖޭޕީއިން ރިޔާސީ އިންތިހާބުގައި ވާދަ ކުރާނެކަން އިއުލާނު ކުރުމާއެކު ސަރުކާރުގެ އެކި މަގާމުތަކުގައި ތިއްބެތި ޖޭޕީގެ ބައެއް މެމްބަރުން ވަނީ ޕާޓީން ވަކިވެފައެވެ.

އޭގެ ތެރެއިން މިއަދު އެމްޑީޕީއާ ގުޅުނު ބައެއް މެމްބަރުންގެ ތެރޭގައި ހެރިޓޭޖް މިނިސްޓްރީގެ ޑެޕިއުޓީ މިނިސްޓަރުގެ މަގާމުގައި ހުންނެވި ވަލީދާ ވަލީދުއާއި މިދިޔަ މަޖިލިސް އިންތިހާބުގައި ޖޭޕީގެ ފަރާތުން މަހިބަދޫ ދާއިރާއަށް ކުރިމަތިލެއްވި އަހުމަދު ސުނިލްއާއި ފިލްމީ ތަރި އަހުމަދު އަޒްމީލް (އަޒޭ) ހިމެނެއެވެ.

ޖުމްޙޫރީ ޕާޓީގެ ސްލޮޓުތަކުގައި ސަރުކާރުގެ އެކި މަޤާމުގައި ތިއްބެވި ފަރާތްތައް އެ ޕާޓީ ދޫކުރައްވާ ރައީސުލްޖުމްޙޫރިއްޔާ އިބްރާހިމް މުޙައްމަދު ޞާލިހަށް ތާޢީދުކުރައްވާކަން އިއުލާނުކުރައްވަމުން ގެންދަވަނީ އެ ބޭފުޅުން މިހާރު ތިއްބެވި މަޤާމު ދިފާޢުކުރެއްވުމަށް ކަމަށް ޖުމްހޫރީ ޕާޓީގެ ލީޑަރު އަދި އެ ޕާޓީގެ ރިޔާސީ ކެންޑިޑޭޓު ޤާސިމް އިބްރާޙިމް މީގެ ކުރިން ވިދާޅުވިއެވެ.