ރައްޔިތުން މަޖިލީހުގެ މިއަހަރުގެ 2 ވަނަ ދައުރުން ބޭރުގައި ޖަލްސާތައް ބޭއްވުމަށް އެމްޑީޕީގެ ޕީޖީއިން އެދިއްޖެއެވެ.

އެގޮތުން މެޖޯރިޓީ ލީޑަރ އަދި ހިތަދޫ އުތުރު ދާއިރާގެ މެންބަރު މުހައްމަދު އަސްލަމް ރައްޔިތުން މަޖިލީހުގެ ރައީސް މުހައްމަދު ނަޝީދަށް ފޮނުއްވާފައިވާ ސިޓީގައި ވިދާޅުވެފައިވަނީ ރައްޔިތުން މަޖިލީހުގެ މިއަހަރުގެ 2 ވަނަ ދައުރު ނިންމާލައިފާވަނީ މުހިންމު މައްސަލަތަކެއް ހުށަހެޅި ގޮތެއް ނުނިމިފައިވާ ވަގުތެއްގައި ކަމަށެވެ.

އަދި ވަކިން ޚާއްސަކޮށް ރައްޔިތުންގެ މަޖިލީހުގެ ގަވާއިދުގެ 106 ވަނަ މާއްދާގައި ލާޒިމް ކުރާ ރައްޔިތުންގެ މަޖިލީހުގެ ދާއިމީ ކޮމިޓީތައް މެދުނުކެނޑި ހިންގުމުގައި ގޮތެއް ނުނިމިވާކަން އަސްލަމް ވަނީ ފާހަގަކުރައްވާފައެވެ.

Advertisement

މިއާއިއެކު މިއަދު ބޭއްވުނު ރައްޔިތުންގެ މަޖިލީހުގެ ޖަލްސާގެ އެޖެންޑާ އެކުލަވާލާފައިވަނީ އޭގައި ހިމެނުމަށް މަޖިލީހުގެ ގަވައިދުން ލާޒިމްކުރާގޮތަށް ހުށަހެޅިފައިވާ އެއްވެސް މައްސަލައެއް ތާވަލު ނުކޮށް ކަމަށް ވެސް އަސްލަމް ވަނީ ފާހަގަކޮށްފައެވެ.

އެހެންކަމުން، މަޖިލީހުގެ ގަވައިދުގެ 45 ވަނަ މާއްދާގެ (ރ) ގައިވާ ގޮތުގެ މަތިން ދައުރުން ބޭރުގެ ޖަލްސާތަކެއް ބާއްވައިދެއްވުމަށް އަސްލަމް ވަނީ އެދިފައެވެ.

އެގޮތުން އަަންނަނިވި ގޮތެއް ނިމެންދެން ރައްޔިތުން މަޖިލީހުގެ އެ ޖަލްސާތައް ކުރިއަށް ގެންދިޔުމަށް އެދިފައިވާ ކަންކަން:

-މަޖިލީހުގެ ދާއިމީ ކޮމިޓީތައް މެދުނުކެނޑި ހިންގުމުގެ މައްސަލަ އަދި އިތުރު ޖަލްސާތަކެއް ބާއްވަން ޖެހޭނަމަ އެ ޖަލްސާތައް

-ރައްޔިތުންގެ މަޖިލީހުގެ ގަވާއިދަށް އިސްލާހު ގެނައުމުގެ މައްސަލަ އަދި އިތުރު ޖަލްސާތަކެއް ބާއްވަން ޖެހޭނަމަ އެ ޖަލްސާތައް

-މަޖިލީހުގެ ރައީސާއި ނައިބު ރައީސްގެ އިތުބާރުނެތްކަމުގެ މައްސަލައާއި ގުޅިގެން އިތުރު ޖަލްސާތަކެއް ބާއްވަން ޖެހޭނަމަ އެ ޖަލްސާތައް

އެމްޑީޕީއިން ދައުރުން ބޭރުގައި ޖަލްސާތައް ބޭއްވުމަށް ހުށައަޅާފައިވަނީ ޖުމްލަ 29 މަޖިލިސް މެމްބަރުންގެ ސޮއިއާއި އެކުގައެވެ.