ޢީދު ބަންދާއި ސުކޫލު ބަންދާ ދިމާކޮށް ފުރާ އުޅަނދުތައް ގިނަވެފައިވާއިރު، ކަނޑު ދަތުރުކުރާ އުޅަނދުފަހަރުގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި ހާއްސަ އޮޮޕަރޭޝަނެއް ފުލުހުންނާއި ގުޅިގެން އެމްއެންޑީއެފް ކޯސްޓްގާޑުން ފަށައިފިއެވެ.

މި އޮޕަރޭޝަނާއި ގުޅޭގޮތުން މައުލޫމާތު ދެމުން އެމްއެންޑީއެފްއިން ކޮށްފައިވާ ޓުވީޓެއްގައި ބުނީ، މި އޮޕަރޭޝަން ގެ ތެރެއިން، އުޅަނދު ފަހަރުގެ ސަލާމަތީ ސެޓްފިކެޓްގައި ބަޔާންކޮށްފައި ހުންނަ ކަންކަން ފުރިހަމަ ކުރެވިފައިވޭތޯ އެމްއެންޑީއެފް މާލޭ އޭރިއާ ކޯސްޓްގާޑު ސްކޮޑްރަންއިން ބަލަމުން ގެންދާނެ ކަމަށެވެ.

އެގޮތުން، ތެރޭގައި މެރިން ވީއެޗްއެފް ޗެކް ކުރުމާއި އުޅަނދުގެ ކެޕްޓަން އަތުގައި ކަނޑުގެ އުޅަނދު ދުއްވުމުގެ ލައިސަންސް އޮތްތޯ ބެލުމުގެ އިތުރުން ދަތުރުވެރިންގެ ސަލާމަތާއި ރައްކާތެރިކަމާ ގުޅޭ ގިނަ ކަންތައްތަކެއް ބަލާނެ ކަމަށް ބުނެފައިވެއެވެ. 

Advertisement

އީދު ބަންދާ ގުޅިގެން މިމަހުގެ 25 އިން ފެށިގެން 29 ގެ ނިޔަލަށް ވަނީ ސަރުކާރު ބަންދު ދުވަސްތަކެއްގެ ގޮތުގައި ހަމަޖައްސާފައެވެ. 

ޢީދު ބަންދުގެ އިތުރުން، ސްކޫލްތަކުގެ ބޮޑު ޗުއްޓީވެސް މިހަފްތާ ފެށިފައިވާއިރު، ދެ ބަންދު އެކީ ދިމާވުމުން ކޮންމެ ދުވަހަކު އެތައް ބަޔަކު ފުރައިގެން ރަށްތަކަށް ދެއެވެ. ސްކޫލްތަކުގެ ބޮޑު ޗުއްޓީގެ ގޮތުގައި ހަމަޖައްސާފައުވަނީ 23 ޖޫން އިން ފެށިގެން އޮގަސްޓް މަހުގެ 5 ވަނަ ދުވަހާއި ހަމައަށެވެ.