ދިވެހިރާއްޖޭގެ ރައީސްކަމުގެ މަޤާމު ބޭނުންފުޅުވަނީ އިސްލާހީ މަސައްކަތްޕުޅު ކުރެއްވުމުގެ ބޭނުމުގައިކަމަށް ޖުމްހޫރީ ޕާޓީގެ ލީޑަރު އަދި އެ ޕާޓީގެ ކެންޑިޑޭޓު ޤާސިމް އިބްރާހިމް ވިދާޅުވެއްޖެ އެވެ.
ޤާސިމް މިފަދައިން ވިދާޅުވެފައި ވަނީ ސިޔާސީ މަސައްކަތްޕުޅު ފެއްޓެވި ސަބަބާއި، މިހާތަނަށް އެ މަސައްކަތްޕުޅު ކުރެއްވުމުގައި ގެންގުޅުއްވި ވިސްނުންފުޅުތަކާއި ގުޅޭގޮތުން ޖުމްހޫރީ ޕާޓީގެ 158 ވަނަ ކައުންސިލް ބައްދަލުވުމުގައި ވާހަކަދައްކަވަމުން ނެވެ.
ޤާސިމް ވިދާޅުވީ 1984 ވަނަ އަހަރުގެ ކުރީކޮޅު ސިޔާސީ މަސައްކަތްތައް ފެށީ ރާއްޖެއަށް ގެންނަންޖެހޭ ބޮޑެތި އިސްލާހީ ބަދަލުތައް ހުރުމުން އެ މަސައްކަތްތައް ކުރުމުގެ ބޭނުމުގައި ކަމަށެވެ. އެ މަސައްކަތްޕުޅު ފެއްޓެވީ އެއްވެސް ހާލަތެއްގައި ސިޔާސީ "ބޮޑު މަޤާމެއް" ބޭނުންފުޅުވެގެން ނޫންކަމަށް ޤާސިމް ވިދާޅުވި އެވެ.
ޤާސިމް ވިދާޅުވީ އަބަދުވެސް ރާއްޖެއަށް ގެންނަން ޖެހޭ އިސްލާހީ ބަދަލުތައް ގެނައުމަށް އެކި ސިފަސިފައިގައި މަސައްކަތްޕުޅުތަކެއް ކުރެވުނު ކަމަށެވެ. އެހެން ނަމަވެސް ސަރުކާރުތަކުން އަމަލުކުރަމުން އައިސްފައިވާ ގޮތަށް ބަލާއިރު، ރައްޔިތުންގެ ބޭނުންތައް ފުއްދުމަށް އެކަށީގެންވާ މަސައްކަތްތަކެއް ކުރެވިފައި ނުވާކަން ފާހަގަކުރެވޭކަމަށް ޤާސިމް ވިދާޅުވި އެވެ.
ރައްޔިތުންގެ ދިރިއުޅުން ފުދުންތެރި ކުރުމަށް ކުރެވޭނެ އެތައް ކަމެއް ހުރެމެ، އެކަންކަން ސަރުކާރުތަކުން ކޮށްނުދީ މަޑުޖައްސާކަން ފާހަގަކުރެވޭކަމަށް ޤާސިމް ވިދާޅުވި އެވެ.
އެއާއެކު އޭނާ ވިދާޅުވީ ރައީސްކަން ބޭނުންފުޅުވަނީ ވެސް އިސްލާހަށްޓަކައި މަސައްކަތްޕުޅު ކުރެއްވުމަށް ކަމަށެވެ.
"އަޅުގަނޑު ނިކުމެ މި ހުރީ ރާއްޖޭގެ ރައީސުލްޖުމްހޫރިއްޔާ ކަމުގެ މަޤާމަކީ ސިޔާސީ ބޮޑު މަޤާމަކަށް ވާތީ، ބާރުވެރި މަޤާމަކަށް ވާތީއެއް ނޫން، އެކަން ކުރުމުގެ އަޅުގަނޑު ނިކުމެ މިހުރީ އެންމެ ސަބަބަކަށްޓަކައި، އިސްލާހައްޓަކައި. މި ޤައުމު އިސްލާހުކޮށް ކުރަންޖެހޭ ކަންތައްތައް ކުރުމުގެ މަޤްސަދަށްޓަކައި. ދިވެހިރައްޔިތުންގެ ކުރިއެރުމާއި، ދިވެހި ރައްޔިތުންގެ ފުދުންތެރިކަން އިތުރުކޮށްދިނުމާއި، އެބައި މީހުންގެ ޖީބުތަކާއި، އެބައިމީހުންގެ ރިއުންތަކާއި، ކަރުނައެޅުންތަކާއި، އެބައި މީހުންނަށް ނާ އިންސާފުން ލިބޭ އަނިޔާތަކުން ސަލާމަތްކޮށްދީ މިންޖުކޮށްދިނުމަށްޓަކައި"
ޖޭޕީގެ ލީޑަރު ޤާސިމް އިބްރާހިމް
ޤާސިމް ވިދާޅުވީ ރައްޔިތުންގެ ފައިސާ ސަރުކާރުން އިސްރާފު ކުރަމުންދާކަމީ މިއަދު ފެންނަމުންދާ ހަގީގަތް ކަމަށެވެ. އަދި އެއީ ވަރަށް ބޮޑަށް ހިތާމަކުރައްވާ ކަމެއްކަމަށް އޭނާ ވިދާޅުވި އެވެ.
ޤައުމު ތަރައްގީ ކުރެވޭނެ ސްޕީޑު ރަނގަޅަށް އެނގިވަޑައިގަންނަވާ ކަމަށާއި، އެ ސްޕީޑުގައި ގައުމު ކުރިއެރުވުމަށް އެމަނިކުފާނު ހުންނެވީ ތައްޔާރަށްކަމަށް ޤާސިމް ވިދާޅުވި އެވެ. އަދި އެމަނިކުފާނަށް އެ ފުރުސަތު ރައްޔިތުން ދެއްވައިފިނަމަ، ރައްޔިތުންގެ ހައްގުގައި ކުރަން ޖެހުނު ކޮންމެ މަސައްކަތެއް ކުރައްވާނެކަމަށް ޤާސިމް ވަނީ ވިދާޅުވެފަ އެވެ.
Advertisement
This content is created and paid for by advertisers and does not involve Voice Journalists
