ވެރިކަން ލިބިވަޑައިގެންފިކަމަށް ވާނަމަ، ހިޔާ މަޝްރޫއުގެ ދަށުން ހުޅުމާލޭގައި އަޅާފައިވާ ފްލެޓުތަކާއި، ސިފައިންނާއި ފުލުހުންނަށް ދީފައިހުރި ފްލެޓުތަކުގެ ކުލި މާފުކޮށްދެއްވާނެކަމަށް ޖުމްހޫރީ ޕާޓީގެ ރިޔާސީ ކެންޑިޑޭޓު ޤާސިމް އިބްރާހިމް ވިދާޅުވެއްޖެ އެވެ. 

ޖުމްހޫރީ ޕާޓީގެ 158 ވަނަ ކައުންސިލް ބައްދަލުވުމުގައި ވާހަކަދައްކަވަމުން ޤާސިމް ވަނީ ބޯހިޔާވަހިކަން ފޯރުކޮށްދިނުމަށް މި ސަރުކާރުން ތަފާތުކުރުންތައް ގެންގުޅޭކަން ފާހަގަކުރައްވާ ނުރުހުން ފާޅުކުރައްވާފަ އެވެ. 

ބޯހިޔާވަހިކަމަކީ އަސާސީ ހައްޤަކަށް ވާއިރު، ބައެއް ފަރާތްތަކަށް އަގުބޮޑުކޮށް ބިންތައް ދޫކުރާއިރު، ސަރުކާރުގެ ވަކި ސިޔާސަތެއްގެ ތެރެއިން ހިލޭ ބިންތައް ބަހަން ނިންމާފައިވާކަން އެމަނިކުފާނު ފާހަގަކުރެއްވި އެވެ. އަދި މިހާރު ދޫކޮށްފައިވާ ފްލެޓުތައް ހަދާފައިވާ އަގާއި ނުބައްދަލު ކުލި ނަގަމުންދާކަމަށް ޤާސިމް ވިދާޅުވި އެވެ. 

Advertisement

އެކަންކަން ފާހަގަކުރައްވާ ޤާސިމް ވިދާޅުވީ ރައްޔިތުންގެ މެދުގައި އޮތް ތަފާތުކުރުންތައް ނައްތާލުމަށް އެމަނިފާނުގެ ވެރިކަމެއްގައި ހުޅުމާލޭގައި ސަރުކާރުން ބޯހިޔާވަހިކަން ފޯރުކޮށްދިނުމަށް އަޅާފައިވާ ފްލެޓުތަކުގެ ކުލި އެއްކޮށް މާފުކޮށްދޭނެ ކަމަށެވެ. 

ޤާސިމް ވިދާޅުވީ އެއީ އޭނާ ސަމާސާއަކަށް ދައްކާ ވާހަކައެއް ނޫން ކަމަށެވެ. ރައްޔިތުންގެ މެދުގައި ތަފާތުކުރުންތައް އެެއްވެސް ސަރުކާރަކުން ގެންގުޅިގެން ނުވާނެ ކަމަށާއި، އިންސާފު ގާއިމްކުރުމާއި، ހަމަހަމަކަން ގާއިމް ކުރުމަކީ ކޮންމެހެން ކުރަން ޖެހޭ ކަމެއްކަން އެމަނިކުފާނު ފާހަގަކުރެއްވި އެވެ. 

އަދި އެކަން ކަށަވަރުކުރުމަށް ފްލެޓުތަކުގެ ކުލި އެއްފަހަރާ މާފުކޮށްދެއްވާނެކަމުގެ ޔަގީންކަން ޤާސިމް ވަނީ ދެއްވާފަ އެވެ.