ރައީސްކަމުގެ މަޤާމުގައި ހުންނަވާ ބޮޑެތި ގޯސްތައް ނަހައްދަވާ ވެރިކަމުން ދުރަށް ވަޑައިގަތުމަށް ޖޭޕީގެ ލީޑަރު ޤާސިމް އިބްރާހިމް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހަށް ގޮވާލައްވައިފި އެވެ. 

ޤާސިމް ވަނީ ޖުމްހޫރީ ޕާޓީގެ 158 ވަނަ ކައުންސިލް ބައްދަލުވުމުގައި ވާހަކަދައްކަވަމުން މިހާރު ސަރުކާރުން ހަދަމުންދާ ބޮޑެތި ގޯސްތަކަށް އަލިއަޅުވާލައްވާ ގިނަ ފާޑުނިޔުންތަކެއް އަމާޒުކުރައްވާފަ އެވެ. 

ޤާސިމް ވިދާޅުވީ ރައްޔިތުންގެ މަޖިލީހުގައި ތަޅު އަޅުވާ އެ މުއައްސަސާ ޤާނޫނީ ޒިންމާތައް އަދާނުކުރެވޭ ގޮތަށް ތަޅުއަޅުވާފައިވަނީ އެމްޑީޕީން ކަމަށެވެ. އަދި އެމްޑީޕީގެ އެންމެ އިސް ލީޑަރުގެ ހައިސިއްޔަތުން ރައީސް ޞާލިހު އެކަމުގެ ފުރިހަމަ ޒިންމާ ނަންގަވަން ޖެހިވަޑައިގަންނަވާނެ ކަމަށެވެ. 

Advertisement

މަޖިލީހުގެ އިތުރުން، މިހާރު މިނިވަންކަމާއެކު މަސައްކަތް ކުރާ އެއްވެސް މުއައްސަސާއެއް ނެތްކަމަށާއި، ހުރިހާ މުއައްސަސާއެއްގައި އޮތީ ސަރުކާރުން ތަޅުއަޅުވާފައިކަމަށް ޤާސިމް ވިދާޅުވި އެވެ. 

ޤާސިމް ވިދާޅުވީ ޤާނޫނު އަސާސީގެ 115 ވަނަ މާއްދާގައި ރައީސުލްޖުމްހޫރިއްޔާގެ ބާރުތަކާއި މަސްއޫލިއްޔަތުތަކުގެ ވާހަކަ ވަރަށް ރަނގަޅަށް ބަޔާންކޮށްފައިވާނެ ކަމަށެވެ.

އެހެން ނަމަވެސް މުއައްސަސާތަކުގައި ބޮޑު ތަޅު އެޅުވިގެންދާއިރު، އެމަނިކުފާނު އެކަން ކަން ޙައްލު ކުރެއްވުމަށް އެކަށީގެންވާ މަސައްކަތްތަކެއް ކުރަމުން ނުދާކަމަށް ޤާސިމް ވިދާޅުވި އެވެ. 

ޤާސިމް ވިދާޅުވީ ބާރުގައި ހުންނެވުމަށް ރައީސް ޞާލިހު ބޮޑެތި ގޯސްތަކެއް ހައްދަވަމުންދާ ކަމަށެވެ. އަދި އެގޮތަށް އެކަންކަން ކުރައްވާނަމަ އެމަނިކުފާނަށް ޖެހިވަޑައިގަންނަވާނީ ވެރިކަމުން ފައިބާ ވަޑައިގަންނަވަން ކަމަށް ޤާސިމް ވިދާޅުވި އެވެ. 

ޤާސިމް ވިދާޅުވީ ރައީސުލްޖުމްހޫރިއްޔާގެ މަސްއޫލިއްޔަތުތައް ނެންގެވުމުގައި ރައީސް ޞާލިހު ފެއިލްވެވަޑައިގެންފައި ވާ ކަމަށެވެ. 

ދެވަނަ ދައުރެއް ބޭފުޅަކަށް ދޭ ނަމަ، އެކަން ކުރައްވާނީ، މާޒީގައި ކޮށްފައިވާ ކަންތައްތަކަށް ބައްލަވައިގެން ކަމަށާއި، މި ދައުރަށް ވީ ވައުދުތައް ނުފުއްދުނު ފަރާތަކަށް ދެވަނަ ދައުރެއް ދޭން ޖެހޭ އެއްވެސް ސަބަބެއް ނޯންނާނެކަމަށް ޤާސިމް ވަނީ ވިދާޅުވެފަ އެވެ.