ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ބަލިވެއްޖެ ކަމަށާއި، މިހާރު އެމަނިކުފާނުގެ ވެރިކަން ހިފަހައްޓަމުން ދަނީ ފައިސާ ބައްސަވައިގެން ކަމަށް ރައްޔިތުންގެ މަޖިލީހުގެ މެދު ހެންވޭރު ދާއިރާގެ މެމްބަރު އަލީ އާޒިމް ވިދާޅުވެއްޖެ އެވެ.
އާޒިމް މިފަދައިން ވިދާޅުވެފައި ވަނީ މި ސަރުކާރު ބަލިކުރުމަށް ދި ޑިމޮކްރެޓްސްއާއި ޕީޕީއެމް ކުރިއަށް ގެންދިޔަ ދެވަނަ މަޝްވަރާ ބައްދަލުވުމަށްފަހު ނޫސްވެރިންނަށް މައުލޫމާތު ދިނުމަށް ބޭއްވި ޕްރެސް ކޮންފަރެންސްގައި ނޫސްވެރިއަކު ކުރި ސުވާލަށް ޖަވާބުދެއްވަމުން ނެވެ.
އާޒިމް ވިދާޅުވީ ރައީސް ޞާލިހަށް ދެވަނަ ދައުރެއް ހޯދާދިނުމަށް އެމަނިކުފާނާއި އެކުގައި ތިބި ސިޔާސީ ޕާޓީތަކަކީ އާންމު ރައްޔިތުންގެ މާބޮޑު ތާއީދެއް އޮތް ޕާޓީތަކެއް ނޫން ކަމަށެވެ.
އެގޮތުން މިހާރު ރައީސް ޞާލިހާއެކު ކޯލިޝަން ހަދައިގެން ތިބި އަދާލަތު ޕާޓީއާއި އެމްޑީއޭގައި 3000 މީހުން ތިބިކަމާމެދު ވެސް ޝައްކު ކުރެވޭކަމަށް އޭވާ ވިދާޅުވި އެވެ.
އެއާއެކު އާޒިމް ވިދާޅުވީ، ރިޔާސީ އިންތިޚާބުގައި ރައީސް ޞާލިހު އެކަނިވެ ބާކީވާ މަންޒަރު ފެނިގެން ދިއުމަކީ ވެސް އެކަށީގެންވާ ކަމެއް ކަމަށެވެ.
"ރައީސް ޞާލިހު އެކަނިވެގެން ދިއުމަކީ ވަރަށް ފުރުސަތު ބޮޑުކަމެއްގެ ގޮތުގައި ފެންނަނީ ކުރިއަށް އޮތް ރިޔާސީ އިންތިޚާބަށް. އަޅުގަނޑަށް ޝައްކު އަދާލަތު ޕާޓީވެސް ސަން ޓްރެވަލްސް ޝިޔާމު ޕާޓީ އެމްޑީއޭ ވެސް ރިޔާސީ އިންތިޚާބަށް ވާންވާއިރަށް ރައީސް ޞާލިހާއި އެކު އޮންނާނެކަމަށް"
މެމްބަރު އަލީ އާޒިމް
އާޒިމް އިތުރަށް ވިދާޅުވީ ހަޤީގަތުގައި ރައީސް ޞާލިހުގެ ވެރިކަން މިހާރު މިއޮތީ ނިމިފައި ކަމަށެވެ. އަދި އެމަނިކުފާނު މިހާރު ވެރިކަމުގައި އެ ހުންނަވަނީ ތާއީދުބޮޑުކަމުން ނޫން ކަމަށާއި، ފައިސާ ޚަރަދުކުރައްވައިގެން ކަމަށެވެ.
"އިބްރާހިމް މުޙައްމަދު ޞާލިހު ދެރަވާތަން އެބަ ފެނޭ. މިހާރު އެ ހިފަހައްޓަނީ ފައިސާ ދީގެން.. ފައިސާ އަކީ ވަޒީފާވެސް ދީގެން. ބިރުދައްކައިގެން. ދެން ފައިސާ ޗާޕުކުރި ވާހަކަ އަޅުގަނޑު ފާހަގަކޮށްފިން"
މެމްބަރު އަލީ އާޒިމް
އާޒިމް އިތުރަށް ވިދާޅުވީ ސަރުކާރު މިހާރު ހިނގަމުންދާ ގޮތާއި މެދު ގިނަ ސިޔާސީ ޕާޓީތަކެއްގެ ކަންބޮޑުވުން މިހާރު ވެސް ފާޅުކުރަމުންދާ ކަމަށެވެ. އަދި މިނިވަން މުއައްސަސާތަކުގެ ބާރު ކަނޑުވާލާފައި އޮތް އޮތުމަށްވެސް ގިނަ ޕާޓީތަކުގެ ފާޑުކިޔުން އަމާޒުވެފައި ވާ ކަމަށެވެ.
އެހެން ކަމުން ކުރިއަށް އޮތް ތަނުގައި މި ސަރުކާރު ބަދަލުކުރުމަށް ގިނަ ޕާޓީތަކެއް ޕީޕީއެމް އަދި ޑި ޑިމޮކްރެޓްސްގެ މަސައްކަތްތަކާއި ގުޅުމަކީ ވެސް އެކަށީގެންވާ ކަމެއްކަމަށް އާޒިމް ވިދާޅުވި އެވެ.
Advertisement
This content is created and paid for by advertisers and does not involve Voice Journalists
