ބޯހިޔާވަހިކަމުގެ މައްސަލަ ޙައްލުކޮށްދިނުމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ވެލެއްވި ވައުދު ފުއްދަވާދެއްވައިފިކަމަށް ފޮރިން މިނިސްޓަރު އަބްދުالله ޝާހިދު ވިދާޅުވެއްޖެ އެވެ.
މިނިސްޓަރު ޝާހިދު މިފަދައިން ވިދާޅުވެފައިވަނީ މާލޭ ރައްޔިތުންނަށް ގޯތި ދޫކުރުމަށް ސަރުކާރުން އިއުލާނުކުރި މަޝްރޫއުގެ ތެރެއިން ބިން ލިބުނު ފަރާތްތަކުގެ ލިސްޓު އާންމުކުރުމާއި ގުޅިގެން ކުރެއްވި ޓްވީޓެއްގަ އެވެ.
"މާލޭގެ މާ ނޭވާ، ހަމަ ނޭވާޔަށް ބަދަލުކޮށްދެއްވުމަށް ރައީސް ޞާލިހު ވެވަޑައިގެންނެވި ވައުދު (މިއަދު) ފުއްދަވާދެއްވައިފި"
ފޮރިން މިނިސްޓަރު ޝާހިދު
އަބްދުالله ޝާހިދު ވަނީ މާލޭ ރައްޔިތުންނަށް ގޯތި ދޫކުރުމަށް ސަރުކާރުން ވީ ވައުދު ފުއްދާވާފައިވާކަން ފާހަގަކޮށް އެމަނިކުފާނަށް ޝުކުރު އަދާކުރައްވާފަ އެވެ.
އެއާއެކު ޝާހިދު ވިދާޅުވީ ރައީސް ޞާލިހުގެ އެ ވައުދާއެކު މާލޭގެ ރައްޔިތުންނަށް ކުރިއަށް އޮތީ އުފާވެރި ދުވަސްތަކެއްކަމަށް ޤަބޫލުކުރައްވާކަމަށެވެ.
މާލޭ ރައްޔިތުންނަށް ހިލޭ ގޯތި ދޫކުރުމަށް ސަރުކާރުން އިއުލާނުކުރި ޕްރޮގްރާމުގެ ތެރެއިން 10000 އަށް ވުރެ ގިނަ މީހުންނަށް ގޯތި ލިބިފައިވާއިރު، ގޯތި ލިސްޓުގައި ސަރުކާރުގެ އިސްވެރިންނާއި، ސަރުކާރަށް ތާއީދުކުރާ ގިނަ ފަރާތްތަކެއް ތިބިކަން ފާހަގަކޮށް ގިނަ ފާޑުކިޔުންތަކެއް ވަނީ އަމާޒުވެފަ އެވެ.
އަނެއްކޮޅުން ސަރުކާރުގެ އެ މަޝްރޫއަށް އެތައް ބަޔަކު އަންނަނީ މަރުހަބާ ވެސް ކިޔަމުންނެވެ.
Advertisement
This content is created and paid for by advertisers and does not involve Voice Journalists
