ނަމާދުން ފައިބައިގެން ހިނގާފައިދިޔަ މީހެއްގެ ގައިގައި މަޖީދީ މަގުން ދުއްވާފައި ދިޔަ ސައިކަލަކުން ޖެހި ނުރައްކާތެރި އެކްސިޑެންޓެއް ހިނގައިފިއެވެ.

އެގޮތުން މީސް މީޑީއާގައި އާންމު ވެފައިވާ ވީޑިއޯއެއްގައި އެސަރަހައްދުގައި ތިބި ބަޔަކު ހިނގާފައި ދިޔަ މީހާ އަތުލަފި ކޮށްގެން ގެންދާ މަންޒަރު ފެނިގެން ދިޔައެވެ.

އެވީޑިއޯ އާންމުކުރި ފަރާތުން ބުނެފައިވަނީ ދުއްވި ސައިކަލަކީ ޖީއެން ސައިކަލެއް ކަމަށާއި އެކްސިޑެންޓްގައި އަނިޔާވި ފަރާތަކީ މަސްޖިދުލް އާދިލުން ފަތިސް ނަމާދުކޮށްގެން ފޭބި މީހެއް ކަމަށެވެ.

Advertisement

އަދި އެމީހާގެ ހާލު ސީރިއަސް ކަމަށް ވަނީ ފާހަގަކޮށްފައެވެ.

މިކަމާއި ގުޅިގެން ފުލުހުންގެ މީޑިއާ އޮފިޝަލަކު "ވޮއިސް" އަށް ވިދާޅުވީ މަޖީދީ މަގު ރެޑްވޭވް އާއި ހިސާބުން ހިނގާފައި ދިޔަ މީހެއްގެ ގައިގައި ސައިކަލަކުން ޖެހި އެކްސިޑެންޓެއް ހިނގާފައިވާ ކަމަށް މިއަދު 05:01 ހާއިރު ފުލުހުންނަށް ރިޕޯޓް ކޮށްފައިވާ ކަމަށެވެ.

އަދި މި އެކްސިޑެންޓްގައި އަނިޔާވި 50 އަހަރުގެ ދިވެހި ފިރިހެން މީހާ އަށް ދަނީ އޭޑީކޭގައި ފަރުވާދެމުން ކަމަށެވެ.

މިއާއިއެކު އެކްސިޑެންޓްގައި ސައިކަލް ދުއްވަން އިން 22 އަހަރުގެ ދިވެހި ފިރިހެން މީހާއަކީ ސައިކަލް ދުއްވުމުގެ ލައިސަންސް ނެތް މީހެއް ކަމަށްވެސް ފުލުހުންގެ އޮފިޝަލަކު ވިދާޅުވިއެވެ.

މީގެ އިތުރުން މި މައްސަލަ ފުލުހުން ގެންދަނީ ތަހްގީގު ކުރަމުން ކަމަށްވެސް ވަނީ ފާހަގަކޮށްފައެވެ.

"ވޮއިސް" އިން އޭޑީކޭ ހޮސްފިޓަލާއި ގުޅުމުން ބުނެފައިވަނީ އެމީހާއަށް ފަރުވާ ދެމުން ދަނީ އައިސީޔޫގައި ކަމަށެވެ.