ވާދަވެރި ސިޔާސީ ލީޑަރު ރައީސް އަބްދުﷲ ޔާމީން އަބްދުލްގައްޔޫމުގެ މައްޗަށް ރ. ފުއްގިރި ކުއްޔަށް ދޫކުރުމުގެ މުއާމަލާތާއި ގުޅުވާ އުފުލާފައިވާ ދައުވާތަކާއި ގުޅޭ ޝަރީއަތުގެ އަޑުއެހުމެއް މާދަމާގެ 9:00 އަށް ކްރިމިނަލް ކޯޓުގައި ތާވަލުކޮށްފި އެވެ.

ފުއްގިރި ކުއްޔަށް ދޫކުރުމުގެ މުއާމަލާތާއި ގުޅިގެން ރައީސް ޔާމިނުގެ މައްޗަށް ދައުލަތުން ވަނީ ރިޝްވަތު ޤަބޫލުކުރުމާއި މަނީ ލޯންޑަރިންގެ ދައުވާ އުފުލާފައެވެ.

މިހާރު ކުރިއަށް ދަނީ އެ ދައުވާތައް ސާބިތުކޮށްދިނުމަށް ދައުލަތުން ހުށައަޅާ ޝަފަވީ ހެކިންގެ ހެކިބަސް ނެގުމުގެ މަރުހަލާއެވެ.

މިހާތަނަށް 6 ފަރާތެއްގެ ހެކިބަސް ވަނީ ނަގާފައެވެ.

އޭގެތެރޭގައި އެމްއެމްޕީއާރުސީގެ ޚިޔާނާތުގެ ކުށް ސާބިތުވެފައިވާ ކުރީގެ ނައިބުރައީސް އަހުމަދު އަދީބާއި އެމްއެމްޕީއާރުސީގެ ކުރީގެ މެނޭޖިން ޑިރެކްޓަރު އަބްދުﷲ ޒިޔަތު ހިމެނެއެވެ.

ރައީސް ޔާމިނާއި ދެކޮޅަށް އަދީބާއި ޒިޔަތުގެ ހެކިބަސް ނުނެގޭނެ ކަމަށާއި، އެ ދެމީހުންނަކީވެސް ރައީސް ޔާމިނުގެ އަދާވާތްތެރިންކަމަށް އެމަނިކުފާނުގެ ގާނޫނީ ވަކީލުން ވަނީ ފާހަގަކުރައްވާފަ އެވެ.

އެހެން ނަމަވެސް ދައުލަތުން ބުނީ މި މައްސަލައިގައި ދައުލަތުން ރައީސް ޔާމިނުގެ މައްޗަށް އުފުލާ ދައުވާތައް ސާބިތުކުރުމަށް އަދީބާއި ޒިޔަތުގެ ހެކިބަސް ނޫން އިތުރު ކާފީ ހެއްކެއް ނެތުމުން، އެ ދެމީހުންގެ ހެކިބަސް ބަލައިގަންނަން ޖެހޭ ކަމަށެވެ.

އެއާއެކު ކޯޓުން ވަނީ އަދީބާއި ޒިޔަތުގެ ހެކިބަސް ބަލައިގަތުމަށް ނިންމާފައެވެ. އަދި ހެއްކަށް ބުރަދަން ދޭނެތޯ ނޫންތޯ ކަނޑައަޅާނީ ހުކުން ކުރަމުންކަމަށް ގާޒީވަނީ ވިދާޅުވެފަ އެވެ.

ފުއްގިރި މައްސަލައިގެ އަޑުއެހުމެއް މާދަމާއަށް ތާވަލުކޮށްފައިވާއިރު، މި މަހުގެ 4،6،9،11 އަދި 13 ގައިވެސް މި މައްސަލައިގެ އަޑުއެހުންތައް އޮތީ ތާވަލުކޮށްފަ އެވެ.

އޭގެ އިތުރުން ޖުލައިމަހުގައި ރައީސް ޔާމީނުގެ ފަރާތްޕުޅުން ހައިކޯޓުގައި އިސްތިއުނާފުކޮށްފައިވާ އާރަށު މައްސަލައިގެ ހުކުމާއި ގުޅޭ އަޑުއެހުންތައް ވެސް އެ ކޯޓުން ކުރިއަށް ގެންދިއުމަށް ވަނީ ނިންމާފަ އެވެ.

ދަށު ކޯޓުގައި އޮތް މައްސަލަ ފަސްކޮށްފައި ނަމަވެސް އާރަށު މައްސަލައިގެ އިސްތިއުނާފު އަވަސްކޮށްދިނުމަށް ރައީސް ޔާމިނުގެ ފަރާތްޕުޅުން ވަނީ އެދިވަޑައިގެންފަ އެވެ.

އާރަށު ހުކުން އިސްތިއުނާފު މައްސަލައިގައި ރައީސް ޔާމީނުގެ ފަރާތްޕުޅުން މިހާރު ވަނީ އިސްތިއުނާފީ ނުކުތާތައް ހުށައަޅާފަ އެވެ.

ދެން އޮންނަ އަޑުއެހުމެއްގައި އޮންނާނީ ރައީސް ޔާމިނުގެ ފަރާތްޕުޅުން ހުށައެޅި ކަންކަމަށް ދައުލަތުން ޖަވާބުދިނުމެވެ. އެފަހުން އެ މައްސަލައިގެ އަޑުއަހުންތައް ނިންމާނެއެވެ. އަދި ހުކުން އިއްވާނެއެވެ.