ބ. އޭދަފުށީގައި ފުލުހުން ހިންގި އޮޕަރޭޝަނެއްގައި ބަނގުރާ ފުޅިތަކަކާއި ބިޔަރު ދަޅު ތަކެއް ހޯދައިފިއެވެ.
މިކަމާއި ގުޅިގެން ފުލުހުން ނެރެފައިވާ ބަޔާނުގައި ބުނެފައިވަނީ އޭދަފުށީގައި ހުރި ގުދަނެއްގައި ބަނގުރާ ހުރިކަމަށް އެ ރަށު ޕޮލިސް ސްޓޭޝަނަށް ލިބުނު މައުލޫމާތަކާ ގުޅިގެން އިއްޔެ ހިންގި އޮޕަރޭޝަނެއްގައި ބަނގުރާ ހޯދައި ފުލުހުންގެ ބެލުމުގެ ދަށަށް ގެނެސްފައިވާ ކަމަށެވެ.
އެގޮތުން އޭދަފުށި ޕޮލިސް ސްޓޭޝަނުން ހިންގި މި އޮޕަރޭޝަނުގައި އެ ގުދަން ބަލައި ފާސްކުރިއިރު ފަސް ފުޅި ބަނގުރާ އަދި 43 ދަޅު ބިޔަރު ފެނިފައިވާާ ކަމަށް ފުލުހުން ވަނީ ބުނެފައެވެ.
މިއާއިއެކު މި މައްސަލައާ ގުޅިގެން އަދި މީހަކު ހައްޔަރުކޮށްފައި ނުވާ ކަމަށާއި މި މައްސަލަ އޭދަފުށި ޕޮލިސް ސްޓޭޝަނުން ގެންދަނީ ތަހުގީގު ކުރަމުން ކަމަށް ވެސް ފުލުހުން ވަނީ ބުނެފައެވެ.
ފަހަކަށް އައިސް މަސްތުވާތަކެއްޗާއި ބަނގުރަލާއި ގުޅިގެން ފުލުހުން ހިންގަމުންދާ އޮޕަރޭޝަންތައް ވަނީ އިތުރު ވެފައެެވެ.
އެގޮތުން މިދިޔަ ހަފްތާގައި ހިތަދޫގައި ފުލުހުން ހިންގި އޮޕަރޭޝަނެއްގައި 50 ފުޅި ބަނގުރާ ހޯދާފައިވާއިރު މި މައްސަލާގައި ހައްޔަރު ކުރި 43 އަހަރުގެ މީހާ ވަނީ ކޯޓަށް ހާޒިރު ކުރުމުން ދޫކޮށްލާފައެވެ.
Advertisement
This content is created and paid for by advertisers and does not involve Voice Journalists
