މިއަހަރުގެ ސެޕްޓެމްބަރު މަހުގެ 9 ވަނަ ދުވަހު އޮންނަ ރިޔާސީ އިންތިޚާބުގައި ބޭނުންކުރާ ވޯޓު ކަރުދާހުގެ ތެރެއިން ބާކީ ވާ ވޯޓު ކަރުދާސްތައް ވަގުތުން ވަގުތަށް ނައްތާނުލި ނަމަވެސް، އެ ކަރުދާސްތައް ވަކި ކުރެވޭނެ ގޮތެއް ހެދުން މުހިންމުކަމަށް ގިނަ ސިޔާސީ ޕާޓީތަކުން ބުނެފި އެވެ.

ރިޔާސީ އިންތިޚާބުގެ ލަފާދޭ ކޮމެޓީގެ ބައްދަލުވުމެއް މިއަދު އިލެކްޝަން ކޮމިޝަނުން ބާއްވާފައިވާއިރު، އެ ބައްދަލުވުމަށް ވަނީ ކޮމެޓީގެ ލަފާއަށް ބައެއް ކަންކަން ހުށައަޅާފަ އެވެ.

އެގޮތުން ރިޔާސީ އިންތިޚާބުގައި ބޭނުންކުރާ ވޯޓު ކަރުދާސްތަކުގެ ތެރެއިން ބާކީވާ ކަރުދާސްތައް ނައްތާލުމަށް ޕީޕީއެމުން ހުށައެޅި ހުށައެޅުމަށް ކޮމެޓީގެ ލަފާއަށް މިއަދުގެ ބައްދަލުވުމުގައި ވަނީ ހުށައަޅާފަ އެވެ.

އެ ހުށައެޅުމާއި ގުޅޭގޮތުން ޕީޕީއެމްގެ ނައިބު ރައީސް އަހުމަދު ޝިޔާމު ވިދާޅުވީ ވޯޓުލާ ނިމިގެން ބާކީ ވާ ކަރުދާސްތަކާއި ދޭތެރޭގައި ރައްޔިތުންގެ ވަރަށް ބޮޑު ކަންބޮޑުވުމެއް އޮންނަ ކަމަށެވެ.

ވަކިން ޚާއްސަކޮށް ސަރުކާރުން ކޮމިޝަންތަކަށް ވަރަށް ބޮޑަށް ނުފޫޒު ފޯރުވަމުންދާއިރު، ބާކީ ކަރުދާސްތައް ބޭނުންކޮށްގެން ވޯޓު އޮޅުވާލާނެކަމުގެ ބިރު ރައްޔިތުންގެ މެދުގައި އޮތްކަމަށް ޝިޔާމު ވިދާޅުވި އެވެ. އަދި ވޯޓުލާ ކޮންމެ މަރުކަޒެއްގައި ހުންނަ ބާކީ ކަރުދާސްތައް ނާއްތާލުމަށް ޕީޕީއެމުން ހުށައެޅީ އެ ފުރުސަތު ނުދިނުމަށް ކަމަށް ޝިޔާމު ފާހަގަކުރެއްވި އެވެ.

އެ ހުށައެޅުމާއި ގުޅޭގޮތުން އިލެކްޝަންސް ކޮމިޝަންގެ ނައިބު ރައީސް އިސްމާއިލް ހަބީބު ވިދާޅުވީ ވޯޓު ކަރުދާސްތައް އެ ދުވަހުން ދުވަހަށް ނައްތާލުމަކީ ގާނޫނު ތަންދޭ ކަމެއް ނޫން ކަމަށެވެ.

އެހެން ނަމަވެސް، ޕީޕިއެމުން ހުށައެޅި އެ މައްސަލައަށް ޙައްލު ހޯދުމަށް ވޯޓު ކަރުދާސްކޮޅު ތައްޔާރުކުރާއިރު، ކަރުދާސްކޮޅުގެ އެއް ކަން ކަނޑާލެވޭގޮތަށް ފަރުމާ ކުރެވިދާނެކަމަށް އޭނާ ވިދާޅުވި އެވެ. އަދި ބާކީ ކަރުދާސްކޮޅު ޕަންޗުކޮށް ބޮޅެއް އަޅައިގެން ނަމަވެސް ފާހަގަކުރެވޭނެ ގޮތެއް ހެދިދާނެކަމަށް އޭނާ ވިދާޅުވި އެވެ.

އެ މައްސަލައަށް ލަފާދޭ ކޮމެޓީގައި ބައިވެރިވާ ގިނަ ސިޔާސީ ޕާޓީތަކުން ވަނީ ތާއީދުކޮށްފަ އެވެ.

އެގޮތުން ޖުމްހޫރީ ޕާޓީގެ ފަރާތުން ރިޔާޒު ރަޝީދު ވިދާޅުވީ އީސީގެ ނައިބު ރައީސް ފާހަގަކުރެއްވި ގޮތަށް ކަރުދާސްތައް އެއްކޮށް ނައްތާލައިފިނަމަ ދިމާވެފާނެ މައްސަލަތަކެއް ހުރިކަމަށް ޤަބޫލު ކުރެވޭ ކަމަށެވެ. އަދި ބާކީ ކަރުދާސްކޮޅު ކަންކަނޑާލުން ނުވަތަ ލޯވަޅެއް އަގައިގެން ވެސް ދެވަނަ ފަހަރަށް އެ ބޭނުން ނުކުރެވޭނެ ފަދަ ގޮތަކަށް އެކަން ކުރުމަކީ ޕީޕީއެމްގެ ކަންބޮޑުވުންތަކަށް ޙައްލު ލިބޭނަމަ ރަނގަޅު ކަމެއްކަމަށް ރިޔާޒު ވިދާޅުވި އެވެ.

އިންތިޚާބުގައި ބައިވެރިވާ ފަރާތްތަކުގެ ހައްގުތައް ކަށވަރުކުރުމަށް އެފަދައިން އެކަން ކުރުމަކީ މުހިންމު ކަމެއް ނަމަ އެކަން ކުރުމަކީ އެދެވޭ ކަމެއްކަމަށް ރިޔާޒު ވިދާޅުވި އެވެ.

ލަފާދޭ ކޮމެޓީގައި ބައިވެރިވެވަޑައިގެން އަދާލަތު ޕާޓީގެ މަންބޫދު ޝަފީއު ވެސް ވިދާޅުވީ ބާކީ ކަރުދާސްތައް އަލުން ބޭނުން ނުކުރެވޭ މިންވަރަށް ކަނަކުން ކަފާލުން ނުވަތަ ބޮޅެއް އެޅުމަކީ ރަނގަޅުކަމެއް ކަމަށް ޤަބޫލުކުރައްވާ ކަމަށެވެ. އަދި އެގޮތަށް އެކަން ކުރުމަށް އަދާލަތު ޕާޓީގެ އެއްވެސް މައްސަލައެއް ނެތްކަމަށް އޭނާ ވިދާޅުވި އެވެ.

ރިޔާސީ އިންތިޚާބުގެ ލަފާދޭ ކޮމެޓީގައި އެމްޑީޕީގެ ފަރާތުން ބައިވެރިވެވަޑައިގެންނެވި އިބްރާހީމް ވަހީދު (އިބުރޭ) ވެސް ވަނީ ބާކީ ކަރުދާސްކޮޅާއި ގުޅިގެން ޕީޕީއެމުން ހުށައެޅި މައްސަލައަށް، ބާކީ ކަރުދާސްކޮޅު ނައްތާނުލި ނަމަވެސް ނަން ކަނޑާލައިގެން ނުވަތަ ކަރުދާސް ދެވަނަ ފަހަރަށް ބޭނުން ނުކުރެވޭނެ ގޮތަށް ބޮޅެއް އަޅާލުމަކީ އެ ޕާޓީން ވެސް ދެކޮޅު ހަދާ ކަމެއް ނޫން ކަމަށެވެ.

އިންތިޚާބުގެ ޞައްހަކަން ކަށަވަރުކުރުމަށް ނުވަތަ އިންތިޚާބަކީ އޮޅުވާ ނުލެވޭނެ އިންތިޚާބަކަށް ހެދުމަށް، ޕާޓީތަކުގެ އޮތް ކަންބޮޑުވުންތައް ހައްލުކޮށްދިނުމަކީ މުހިންމުކަމެއް ކަމަށް އެމްޑީޕީން ވެސް ވަނީ ބުނެފައެވެ.

ސިޔާސީ ޕާޓީތަކުގެ އިތުރުން ލަފާދޭ ކޮމެޓީގައި ހިމެނިވަޑައިގަންނަވާ ބައެއް ޖަމުއިއްޔާ ޖަމާއަތްތަކުން ވެސް ވަނީ ބާކީ ކަރުދާސްކޮޅުތައް މާކުކުރުމަކީ އިންތިޚާބުގެ ސައްހަކަން ކަށަވަރުކުރުމަށް މުހިންމުކަމެއްކަމުގައި ފާހަގަކޮށްފައެވެ.

ލަފާދޭ ކޮމެޓީގެ ޚިޔާލަށްފަހު އީސީން ބުނީ، އެ ކޮމެޓީގެ ޚިޔާލާއި އެއްގޮތަށް އެ ބަދަލު ގެނެވެން އޮތްކަމުގައި ވާނަމަ އީސީން އެކަން ކުރައްވާނެ ކަމަށެވެ. އަދި އިންތިޚާބަކީ ވީހާ ވެސް ބޮޑަށް ދެފުށް ފެންނަ އިންތިޚާބަކަށް ހެދުމަށް އެ ކޮމިޝަނުން މަސައްކަތް ކުރަމުން ގެންދާނެ ކަމަށެވެ.