އަންހެން ފުލުހަކަށް ގެވެށިއަނިޔާކުރި މައްސަލައެއް ހުށަހެޅުމާ ގުޅިގެން އެމައްސަލަ ދިވެހި ފުލުހުންގެ ޚިދުމަތުން ތަހުގީގުކުރަމުންދާ ކަމަށް އެ ޚިދުމަތުން ބުނެފިއެވެ.

ފުލުހުންގެ ޚިދުމަތުން މިފަދައިން ބުނެފައި މިވަނީ، އެ ޚިދުމަތުގައި މަސައްކަތްކުރާ އަންހެނަކާއެކު އެ އިދާރާގެ ބައެއް ވެރިން ބަދުއަޚުލާގީ އަމަލު ހިންގި މައްސަލައެއް ފެންމަތިވެފައިވާ ކަމަށާ، އަދި މައްސަލަ ބެލުމުގެ ބަދަލުގައި މައްސަލަ އޮއްބައިލަން އެސިސްޓެންޓް ކޮމިޝަނާ އޮފް ޕޮލިސް މުޙައްމަދު ރިޔާޒު މަސައްކަތްކުރައްވާކަމަށް "ދިޔަރެސް"އިން ރިޕޯޓުކުރުމާ ގުޅިގެންނެވެ.

އެކަން ދޮގުކޮށް ފުލުހުންގެ މީޑިއާ އޮފިޝަލް ވިދާޅުވީ، އަންހެން ފުލުހަކަށް ގެވެށިއަނިޔާކުރި މައްސަލައަކާއި ގުޅިގެން އެމައްސަލަ ތަހުގީގުކުރުމުގެ ތެރެއިން ލިބިފައިވާ މައުލޫމާތުގެ އަލީގައި ޕްރޮފެޝަނަލް ސްޓޭޏްޑަޑްސް ކޮމާންޑުން ތަހުގީގެއް ހިންގަމުންދާ ކަމަށެވެ. 

އަދި ފުލުހުން ތަހުގީގުކުރަމުންދާ މައްސަލައެއްގެ ހަގީގަތް އޮޅުވާލަން، ތަހުގީގުގެ ތެރެއިން އުޅޭކަމަށް ބަޔާންކޮށް ދިޔަރެސް ނޫހުން ޝާއިއުކޮށްފައިވާ ޚަބަރަކީ، އެކަމާ ގުޅޭގޮތުން މައުލޫމާތު އޮޅުންފިލުވުމަށް އެއްވެސް މަސައްކަތެއް ނުކޮށް، ލިޔެފައިވާ ދޮގު ޚަބަރެއް ކަމަށްވެސް ބުނެފައިވެއެވެ. 

"ދިވެހި ފުލުހުންގެ ޚިދުމަތުގެ މުވައްޒަފުންގެ ޕްރޮފެޝަނަލް ކޮންޑަކްޓު ކަށަވަރުމުރުމަށް ގާނޫނުތަކުން ތަފާތު އިންތިޒާމުތައް ހަމަޖެހިފައިވާ ހިނދު، އެނިޒާމުތަކާ މެދު ރައްޔިތުންގެ އިތުބާރުގެއްލޭގޮތަށް، ޒިންމާދާރުކަމެއް ނެތި އަދި މައުލޫމާތުގެ ސައްހަކަން ބެލުމަށް އެއްވެސް މަސައްކަތެއް ނުކޮށް މިފަދަ ހައްސާސް ކަންކަމުގައި ހަގީގަތާ ހިލާފު މައުލޫމާތު ހާމަކުރުމަކީ މިޚިދުމަތުން ކަންބޮޑުވާ ކަމެކެވެ." ފުލުހުން ބުނެފައިވެއެވެ.