މި އަހަރުގެ މޭ މަހާއި އަޅާ ބަލާއިރު ދައުލަތުގެ ޖުމްލަ ރިޒާވް 46 މިލިއަން ޑޮލަރު ދަށަށް ގޮސްފައިވާކަން މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ ތަފާސް ހިސާބުތަކުން ދައްކައިފި އެވެ. 

އެމްއެމްއޭގެ ތަފާސް ހިސާބުތަކުން ދައްކާގޮތުގައި މި އަހަރުގެ މޭ މަހު ދައުލަތުގެ ޖުމްލަ ރިޒާވުގައި ހުރީ 748.15 މިލިއަން ޑޮލަރެވެ.

އެހެން ނަމަވެސް ޖޫން މަހުގައި  މި އަދަދު ވަނީ 702.16 މިލިއަން ޑޮލަރަށް ވެއްޓިފަ އެވެ. މިއީ ގާތްގަނޑަކަށް 46 މިލިއަން ޑޮލަރުގެ ވެއްޓުމެކެވެ. 

Advertisement

ޖުމްލަ ރިޒާވްގެ އިތުރުން ބޭނުން ކުރެވޭ (ޔޫސަބަލް ރިޒާވް) ވެސް ދަށަށް ގޮސްފައިވާކަން ތަފާސް ހިސާބުތަކުން ވަނީ ހާމަވެފައެވެ. 

މެއި މަހު ޔޫޒަބަލް ރިޒާވުގައި 370 މިލިއަން ޑޮލަރު ހުރި ނަމަވެސް މިހާރު ރިޒާވުގައި ހުރީ 148 މިލިއަން ޑޮލަރެވެ. މިއީ ގާތްގަނޑަކަށް ދެމަހުގެ އިމްޕޯޓަށްވާ ފައިސާ އެވެ.

ދައުލަތުގެ ރިޒާވް ދަށްވެފައިވާއިރު، މިދިޔަ ޑިސެމްބަރު މަހު ރިޒާވް ވަރަށް ބޮޑަށް އިތުރުވެގެން ދިޔަކަން ވެސް ފާހަގަކޮށްލެވެއެވެ. 

އެހެން ނަމަވެސް ޑިސެމްބަރު މަހު ރިޒާވް މަތިވެގެން ދިޔައީ އިންޑިއާގެ މަރުކަޒީ ބޭންކު ރިޒާވް ބޭންކް އޮފް އިންޑިއާ (އާރުބީއައި) އާއި ރާއްޖޭގެ އެމްއެމްއޭއިން ހެދި ކަރަންސީ ސްވޮޕް ނުވަތަ ފައިސާ ބަދަލު ކުރުމުގެ އެއްބަސްވުމުގެ ސަބަބުންކަން ފާހަގަކޮށްލެވެއެވެ.