މޯލްޑިވްސް ޑިމޮކްރެޓިކް ޕާޓީ (އެމްޑީޕީ)ގެ މި ސަރުކާރުން ކުރި އެންމެ މުޙިންމު ކަމަކީ ޝަރޫއީ ދާއިރާއަށް އޮތް ނުފޫޒު ނައްތާލާ މިނިވަންކަމާއެކު ހުކުމްތައް ކުރުމުގެ މަގުފަހިކޮށް ދިނުން ކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ވިދާޅުވެއްޖެ އެވެ.

ރައީސް ޞާލިހު މިފަދައިން ވިދާޅުވެފައިވަނީ އެ މަނިކުފާނު ށ. އަތޮޅަށް ކުރައްވާ ކެމްޕޭނު ދަތުރުފުޅުގައި އެ އަތޮޅުގެ ނޫމަރާއަށް ވަޑައިގެން ބޭއްވި ޖަގަހަ ޖަލްސާގައި ވާހަކަދައްކަވަމުން ނެވެ. 

ރައީސް ޞާލިހު ވިދާޅުވީ މި ފަސް އަހަރުގައި މި ސަރުކާރުން ކުރި އެންމެ މުހިންމު ކަމަކީ ޤާނޫނީ އިމުގެ ތެރެއިން ވެރިކަން ކުރުމާއި ޤާނޫނީ އިމުގެ ތެރެއިން ކަންކަން ކުރެއްވުން ކަމަށެވެ. 

އެގޮތުން ޝަރުއީ ދާއިރާއަށް އޮތް ނުފޫޒު ނައްތާލެވި، މިނިވަންކަމާއެކު ހުކުމް ކުރުމުގެ ބާރު ވޯޓުތަކަށް މި ސަރުކާރުން ފަހިކޮށްދީފައިވާކަމަށް ރައީސް ޞާލިހު ވިދާޅުވި އެވެ. 

ރައީސް ޞާލިހު ވިދާޅުވީ އެމަނިކުފާނުގެ ވެރިކަމުގެ ފަސް އަހަރަކީ ސިޔާސީ ހަލަބޮލިކަމުން ނިކުމެ ތިބެ ރައްޔިތުންނަށް އަސާސީ ޚިދުމަތްތައް ފޯރުކޮށްދެވުނު ފަސް އަހަރުކަމުގައި ދެކިވަޑައިގަންނަވާ ކަމަށެވެ. 

ދިވެހިރާއްޖޭގެ އެކި ކަންކޮޅުތަކުގައި ކުރިއަށްދާ ތަރައްގީ މަޝްރޫއުތަކަކީ ސިޔާސީ ހަލަބޮލިކަމުން ގައުމު ސަލާމަތްކޮށް އަމާން ގައުމެއް ބުނާކުރުމަށް ކުރެވުނު މަސައްކަތްތަކުގެ ނަތީޖާ ކަމަށާއި، މި އަމާންކަމާއި ރައްކާތެރިކަން ދެމެހެއްޓުމުގެ ބާރު އޮތީ ރައްޔިތުންގެ އަތްމަތީގައި ކަމަށް ރައީސް ޞާލިހު ވިދާޅުވި އެވެ. 

ރައީސް ޞާލިހު އިތުރަށް ވިދާޅުވީ އެމަނިކުފާނު ސިޔާސީ ވާދަވެރިކަމަށް ވުރެ އަބަދުވެސް އިންކުރާނީ ރައްޔިތުންގެ ހިތްހަމަޖެހުމާއި، ރާއްޖެއަކީ އަމާން ގައުމެއްގެ ގޮތުގައި ބޭއްވޭނެ ގޮތްތަކަކަށް ކަމަށެވެ.

މިއަހަރުގެ ރިޔާސީ އިންތިޚާބުގައި އެމަނިކުފާނުގެ ސްލޯގަން އަކީވެސް އަމާން ދިވެހި ރާއްޖެ މި ޝިއާރެވެ.