ސަރުކާރަށް ތާއީދު ކުރާ ފަރާތްތަކަށް އޮތް އެންމެ ބޮޑު ބިރަކީ އިދިކޮޅު ކޯލިޝަނެއް ހަދައި ޕާޓީތަކުން ޤާސިމް އިބްރާހިމްއަށް ތާއީދު ކުރުން ކަމަށް ޖުމްހޫރީ ޕާޓީގެ ސިޔާސީ ހަރަކާތްތަކުގައި އިސްކޮށްއުޅުއްވާ، އަދި ކްރިމިނަލް ކޯޓުގެ ކުރީގެ އިސްގާޒީ އަޙްމަދު ހައިލަމް ވިދާޅުވެއްޖެއެވެ.
ހައިލަމް މިހެން ވިދާޅުވީ ކުރީގެ ރައީސް ޢަބްދުﷲ ޔާމިންގެ އެދިލެއްވުމަކަށް ޕީޕީއެމް އަދި ޕީއެންސީގެ އިސްބޭފުޅުން ޖުމްހޫރީ ޕާޓީގެ ލީޑަރު ޤާސިމް އިބްރާހިމާއި އެކު ބައްދަލުވުމެއް މިއަދު ބާއްވަވާފައި ވަނިކޮށެވެ.
"ސަރުކާރަށް ތާއީދުކުރާ ފަރާތްތަކަށް އޮތް އެންމެ ބޮޑު ބިރަކީ އިދިކޮޅު ކޯލިޝަނެއް ހަދައި ޕާޓީތަކުން އޮނަރަބަލް ޤާސިމް އިބްރާހީމަށް ތާއީދުކުރުމުގެ ބިރު. ޖުމްހޫރީ ޕާޓީގެ އެންމެ ބޮޑު އަމާޒަކީ ރައްޔިތުންނަށް ހެޔޮ ބަދަލެއް ގެނެސްދިނުން. އެކަން މިފަހަރު އަޅުގަނޑުމެން ކުރާނަން. إن شاءالله"
ހައިލަމްގެ ޓްވީޓުގައި ވިދާޅުވެފައިވެއެވެ.
ރައީސް ޔާމިންގެ އިސްނެންގެވުމުގެ ދަށުން އިދިކޮޅު ކޯލިޝަންގެ އިސް ލީޑަރުން ވަނީ މިއަދު ސަން އައިލެންޑްގައި ޤާސިމް އިބްރަހިމާއި އެކު މުހިންމު ބައްދަލުވުމެއް ބާއްވާފައެވެ.
މިބައްދަލު ކުރެއްވުމަށްފަހު ޖުމްހޫރީ ޕާޓީއިން ބުނެފައިވަނީ ޤައުމުގައި ހުރި ބޮޑެތި މައްސަލަތަކާއި ގުޅޭ ގޮތުން އިދިކޮޅު ކޯލިޝަނާއި އެކު ބައްދަލުވުމެއް ބޭއްވިފައިވާކަމަށެވެ.
މިބައްދަލު ކުރެއްވުމަށްފަހު ޖުމްހޫރީ ޕާޓީގެ ލީޑަރ ޤާސިމް އިބްރާހިމް ވިދާޅުވެފައިވަނީ ޤާނޫނުއަސާސީ ވުޖޫދަށް އައުމުގެ އެއް މަޤްސަދަކީ މިނިވަންކަމާއި، އިންސާފުވެރިކަމާއެކު، ޢަދުލު އިންޞާފު ޤާއިމުކޮށް ރައްޔިތުންގެ އަސާސީ ހައްޤުތަކާއި މިނިވަންކަން ކަށަވަރު ކުރުން ކަމަށެވެ.
Advertisement
This content is created and paid for by advertisers and does not involve Voice Journalists
