މި ގައުމަށް ވިސްނުންތެރި މީހުން ބޭނުންވާ ކަމަށާއި ކުރީގެ ޓޫރިޒަމް މިނިސްޓަރ އަލީ ވަހީދަކީ އެފަދަ ބޭފުޅެއް ކަމަށް ރައްޔިތުން މަޖިލީހުގެ މާމިގިލި ދާއިރާގެ މެމްބަރު އަދި ޖުމްހޫރީ ޕާޓީގެ ލީޑަރު ޤާސިމް އިބްރާހިމް ވިދާޅުވެއްޖެއެވެ.
ޤާސިމް މިފަދައިން ވިދާޅުވެފައިވަނީ އަލީ ވަހީދު ވިލާ މާމިގިލީ އެއަރޕޯޓަށް ވަޑައިގަތުމުން މަރުހަބާ ދެންނެވުމަށްފަހު ދެއްވި ބަސްދީގަތުމެއްގައެވެ.
އެގޮތުން ޤާސިމް ވިދާޅުވީ މިގައުމަށް ރަނގަޅު ހިތްވަރު ހުރި ވިސްނުންތެރި މީހުން ބޭނުންވާ ކަމަށާއި އަލީ ވަހީދަކީ ކަންތައްތައް ކުރެވޭ ވިސްނުންތެރި ބޭފުޅެއް ކަމަށެވެ.
"މިގައުމަށް ރަނގަޅު، ހިތްވަރު ހުރި، ވިސްނުންތެރި މީހުން ބޭނުން. ކަންތައްތައް ކުރެވޭ. އަލީ ވަހީދަކީ ވަރަށް ވިސްނުންތެރި ވަރަށް ރަނގަޅަށް ކަންތައްތައް ބަރާބަރަށް ކުރާ، ވިސްނޭ، ކަންތައްތަކުގެ ތެރެއަށް ވަނީމަ ބަރާބަރަށް ވަރަށް ބާރަށް ވަރަށް ރަނގަޅަށް ވިސްނި ވަޑައިގަންނަވާ، ކަންތައްތަަކައިގެން ކުރިއަށް ފިޔަވަޅު އަޅައިގެން، ހަރަކާތްތެރި ކަމާއިއެކު މި ކަންތައްތައް ކުރެވޭ ބޭފުޅެއްކަން އަޅުގަނޑު ހަމަގައިމުވެސް ޔަގީން ކުރަން."
ޤާސިމް އިބްރާހިމް
މިއާއިއެކު މިސިފައަކީ މާ ގިނަ މީހުންގެ ހުންނަ ސިފައެއް ނޫން ކަމަށް ޤާސިމް ދެކެވަޑައިގަންނަވާ ކަމަށް ފާހަގަކުރައްވާ ޤާސިމް ވިދާޅުވީ އަލީ ވަހީދަކީ ކަންކަން ވަރަށް ބާރަށް ކުރިއަށް ގެންދާ، އަމަލީ ގޮތުން ކަންތައްތަކުގައި އުޅުއްވާ، ކެރޭ، ވަރަށް މުރާލި، ހީވާގި މީހެއް ކަމަށެވެ.
އަދި މިކަމުގެ ސަބަބުން އަލީ ވަހީދާއި ދޭތެރޭ މީހުން ހަސަދަވެރިވެ ދިމާވި ކަމެއްގައި ތާށި ވުމަށްފަހު އަނެއްކާވެސް ސަލާމަތްވެ ވަޑައިގެން އައިސް ހުންނެވި ކަމަށް ޤާސިމް ވަނީ ފާހަގަކުރައްވާފައެވެ.
"އެހެންވީމަ ބައެއް މީހުން ހަސަދަވެރިވެސް ވާނެ. ހަސަދަވެރި ފަރާތުން އަންނަ އެތިފަހަރުވެސް އަންނާނެ. އެހެންވީމަ އެކަހަލަ އެތިފަހަރެއްގަ މި ދޭތެރެއިން އެ ތާށި ވެގެން ހުންނަވާފަ، އަނެއްކާވެސް އެކަމުން ސަލާމަތްވެ ވަޑައިގެން އެހުންނެވީ."
ޤާސިމް އިބްރާހިމް
ޓޫރިޒަމް މިނިސްޓްރީގެ އަންހެން މުވައްޒަފުންތަކަކަށް ޖިންސީ ގޯނާކުރުމާއި ޖިންސީ އަނިޔާ ދިނުމާއި ރޭޕްކުރަން އުޅުމާއި ބޭއަދަބީ ގޮތުގައި ޖިންސީ ގުނަވަން ހާމަކުރުމާއި ހުއްދަ ނޫން ޖިންސީ މުއާމަލާތެއް ހިންގުމުގެ ދައުވާ އުފުލާފައިވަނިކޮށް، ބޭސްފަރުވާއަށް ކަމަށް ބުނެ ރާއްޖެއިން ބޭރަށް ދިޔުމަށްފަހު، އެ ދައުވާ އަނބުރާ ގެންދިޔުމުން އަލީ ވަހީދު އަނބުރާ ރާއްޖެ ވަޑައިގަންނަވާފައިވަނީ މިދިޔަ އަންގާރަ ދުވަހުއެވެ.
Advertisement
This content is created and paid for by advertisers and does not involve Voice Journalists
