ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުގެ ދެވަނަ ދައުރެއްގައި މ. ނާލާފުއްޓާއި މުލި ގުޅާލުމަށް އެމަނިކުފާނު ވައުދުވެވަޑައިގެންފި އެވެ. 

ރައީސް ޞާލިހު މ އަތޮޅަށް ކުރައްވާ ރިޔާސީ ކެމްޕޭނު ދަތުރުފުޅުގައި އެ އަތޮޅު ނާލާފުށީގައި ބޭއްވި ޖަލްސާއެއްގައި ވާހަކަދައްކަވަމުން ވިދާޅުވީ ނާލާފުއްޓާއި މުލި ގުޅާލުމަކީ ސަރުކާރުން ޕްލޭނުކޮށްފައިވާ ކަމެއް ކަމަށެވެ. 

އެގޮތުން އެމަނިކުފާނަށް ދެވަނަ ދައުރެއް ލިބިއްޖެނަމަ އެ މަސައްކަތް ކުރައްވާނެކަމަށް ރައީސް ޞާލިހު ވަނީ ވިދާޅުވެފަ އެވެ. 

Advertisement

ރައީސް ޞާލިހު ވިދާޅުވީ ނާލާފުއްޓާއި މުލި ގުޅާލުމަކީ ދެރަށުގެ ރައްޔިތުންނަށް ވެސް ބޮޑެތި ފައިދާތަކެއް ލިބިގެންދާނެ ކަމެއް ކަމަށެވެ. 

އެގޮތުން ރަށުން ލިބެން ނެތް ޚިދުމަތްތައް ހޯދުމަށް އެއްގަމު މަގުން ދިއުމުގެ ފުރުސަތު ލިބިގެންދާނެ ކަމަށާއި، ނާލާފުއްޓާއި މުލި ގުޅާލުމަކީ ދެ ރަށުގެ ތަރައްގީއަށް ވެސް އެޅިގެންދާނެ ފާލަމެއްގެ ގޮތުގައި ރައީސް ޞާލިހު ސިފަކުރެއްވި އެވެ. 

ނާލާފުއްޓާއި މުލި ގުޅާލުމުގެ އިތުރުން ރައީސް ޞާލިހު ވަނީ ނާލާފުށީގައި އާ ބަންދަރެއް އަޅުއްވާދެއްވާނެކަމަށް ވެސް ވައުދުވެވަޑައިގެންފަ އެވެ. އަދި މިހާރު ކުރިއަށްދާ އެރަށުގެ ފެނާއި ނަރުދަމާގެ މަސައްކަތް ވެސް މި އަހަރުތެރޭ ނިންމަވާދެއްވާނެކަމަށް ރައީސް ޞާލިހު ވިދާޅުވި އެވެ.