އެމްޑީޕީގެ ރިޔާސީ ކެންޑިޑޭޓު ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ދެވަނަ ދައުރަކަށް ކުރިމަތިލެއްވީ ރައްޔިތުންގެ އިތުބާރު ހޯއްދަވައިގެން ކަމަށް ރައްޔިތުންގެ މަޖިލީހުގެ ދިއްގަރު ދާއިރާގެ މެމްބަރު އިކުރާމް ހަސަން ވިދާޅުވެއްޖެ އެވެ. 

އިކުރާމު މިފަދައިން ވިދާޅުވެފައި ވަނީ ރައީސް ޞާލިހު މ އަތޮޅަށް ކުރައްވާ ކެމްޕޭނު ދަތުރުފުޅުގައި މުލީގައި ބޭއްވި ޖަލްސާއެއްގައި ވާހަކަދައްކަވަމުން ނެވެ. 

އެ ޖަލްސާގައި ވާހަކަދައްކަވަމުން ރައީސް ޞާލިހަށް ދެވަނަ ދައުރެއް ދޭން ޖެހޭ ސަބަބުތައް ވަނީ ތަރައްގީގެ މަޝްރޫއުތަކުގެ ގޮތުގައި އުފައްދަވާދެއްވާފައި ކަމަށެވެ. އެގޮތުން އެމަނިކުފާނު 2018 ވަނަ އަހަރުގެ ރިޔާސީ އިންތިޚާބަށް ވެލެއްވި ވައުދުތަކުގެ ތެރެއިން ބޮޑުވައި ފުއްދަވާދެއްވާފައިވާކަމަށް އޭނާ ވިދާޅުވި އެވެ. 

Advertisement

އިކްރާމް ވިދާޅުވީ އިތުބާރުހުރި، ވެވަޑައިގަންނަވާ ވައުދުފުޅާ އެއްގޮތަށް މަސައްކަތްތައް ކުރިއަށް ގެންދަވާ ވެރިއަކަށް ވޯޓްދޭނަމަ، ވޯޓް ދޭން ޖެހެނީ ރައީސް ޞާލިހަށް ކަމަށެވެ. އަދި އެމަނިކުފާނަކީ ޓެސްޓު ކުރެވި ފާސްވެ ރައްޔިތުންގެ އިތުބާރު ލިބިފައިވާ ރައީސެއްކަން އިކުރާމު ފާހަގަކުރެއްވި އެވެ. 

އިކުރާމު އިތުރަށް ވިދާޅުވީ ރައީސް ޞާލިހުގެ މި ދައުރުގައި މުލީ ރައްޔިތުންނަށް ބޭނުންޖެހިފައިވާ ވަރަށް ގިނަ ކަންތައްތަކެއް ފުރިހަމަކޮށްދެއްވާފައިވާ ކަމަށެވެ. އަދި ދެވަނަ ދައުރެއްގައި ކުރަން ހުރީ މަގު ހެދުންފަދަ މަދު މަސައްކަތްތަކެއް ކަމަށާއި، އެ ކަންކަން އަންނަ ދައުރުގައި ފުރިހަމަ ވެގެންދާއިރު މުއްޔަކީ މ އަތޮޅުގައި އޮތް ރަނގަޅު ފެންވަރުގެ ސިޓީއަކަށް ބަދަލުވެގެންދާނެ ކަމަށް އިކްރާމު ވިދާޅުވި އެވެ.